#CholeraUpdate

ኢትዮጵያን ጨምሮ 16 አገራት ዜጎቻችው በኮሌራ በሽታ እየተያዙ ባሉበት ሰዓት የአለም አቀፍ የጤና ተቋማት የኮሌራ ክትባት ክምችት ማለቁ ተሰምቷል።

የአለም አቀፍ የጤና ተቋማት ያከማቹት የኮሌራ በሽታ መጠባበቂያ ክትባት በኮሌራ ወረርሽኝ ለተጠቁ አገራት በመሰራጨቱ ምክንያት ከወዲሁ የክትባት ክምችቱ ማለቁን የተባበሩት መንግስታት ድርጅት የጤና ኤጀንሲ እና የዓለም ጤና ድርጅት የኮሌራ ቡድን መሪ የሆኑት ፊሊፕ ባርባዛ አስታውቀዋል።

በዚህም በተያዘው አመት በኮሌራ የተጠቁ አገራት በሚፈልጉት የክትባት መጠን እና ባለው የአቅርቦት አቅም መካከል በሚፈጠር ክፍትት በትንሹ 50 ሚሊዮን የክትባት መጠን እጥረት እንደሚኖር ተጠቁሟል።

ኤምኤስኤፍ የተሰኘው ሰብአዊ አለም አቀፍ የህክምና ድርጅት አለም አቀፍ የጤና ተቋማት የሚያሰራጩት የኮሌራ ክትባት መሟጠጡ አሳሳቢ መሆኑን የገለፀ ሲሆን ከፍተኛ ቁጥር ያላቸው ሀገራት በበሽታው የተያዙ ስዎችን ሪፖርት እያደረጉ በመሆኑ፣ በርካታ ነባር እና አዳዲስ የኮሌራ ክትባት አምራቾች አስቸኳይ የአለም አቀፍ የክትባት አቅርቦትን ለማሳደግ ማገዝ አለባቸው ሲል አሳስቧል።

የኤምኤስኤፍ አለም አቀፍ የህክምና አስተባባሪ የሆኑት ዶ/ር ዳንኤላ ጋሮኔ በዓለም ዙሪያ ኢትዮጵያ፣ ሱዳን፣ ዛምቢያ እና ዚምባብዌን ጨምሮ 16 አገራት የኮሌራ ወረርሽኝ ሪፖርት እያደረጉ መሆናቸውን የገለፁ ሲሆን በዚህ ጊዜ የክትባቱ ክምችት መሟጠጥ አሳሳቢ እና አስጊ መሆኑን በመናገር አምራቾች የኮሌራ ክትባቶችን በአስቸኳይ ማምረት እንዳለባቸው ጠቁመዋል።

@TikvahethMagazine

#CholeraUpdate

በኢትዮጵያ ባለፈው ወር ከአፍሪካ ሀገራት ከፍተኛ የኮሌራ ታማሚዎች ቁጥር እንደተመዘገበ ተነገረ

በአፍሪካ ባለፈው መጋቢት ወር በኮሌራ በሽታ ከተያዙ 14,441 አዲስ የኮሌራ ታማሚዎች መሃከል ከአህጉሪቱ ከፍተኛ ታማሚዎች የተመዘገቡባት ኢትዮጵያ መሆኗን የአለም ጤና ድርጅት ሪፖርት አመልክቷል።

በተጠቀሰው ወር በኢትዮጵያ 4009 ሰዎች በኮሌራ መያዛቸው ተነግሯል። በኮሌራ ከተያዙት ሰዎች ውስጥም 24 ሰዎች መሞታቸው ተጠቁሟል። በኢትዮጵያ ባለፉት 3 ወራት 9,429 ሰዎች በኮሌራ ተይዘው 111 ሰዎች መሞታቸውንም ሪፖርቱ አመልክቷል።

በአፍሪካ ከጃንዋሪ 1 ቀን 2023 እስከ ማርች 31 ቀን 2024 በጠቅላላው በ18 ሀገራት 271,119 ሰዎች በኮሌራ በሽታ ሲያዙ በተጠቀሰው ጊዜ በኢትዮጵያ 39,892 ሰዎች በበሽታው ተይዘው 524 ሰዎች መሞታቸውም ነው የተገለፀው።

@TikvahethMagazine

#CholeraUpdate

° " የኮሌራ ወረርሽኝ በአጭር ጊዜ በከፍተኛ ሁኔታ በመሠራጨት ላይ ነው " - የወልዲያ ከተማ  ጤና መምርያ

° በወረርሽኙ የአንድ ሰው ሕይወት ሲያልፍ 85 ሰዎች ታመዋል፡፡

በአማራ ክልል ሰሜን ወሎ ዞን በወልዲያ ከተማ በተከሰተው የኮሌራ ወረርሽኝ፣ እስከ ማክሰኞ መስከረም 7 ቀን 2017 ዓ.ም ድረስ የአንድ ሰው ሕይወት ሲያልፍ፣ በወረርሽኙ የተጠቁ ሰዎች ቁጥር 85 መድረሱ ተገለጸ፡፡

ወረርሽኙ ጳጉሜን 4 ቀን 2016 ዓ.ም. በእቴጌ ጣይቱ ብጡል ክፍለ ከተማ አድማስ ባሻገር ተክለ ሃይማኖት ተብሎ በሚጠራው አካባቢ መከሰቱን፣ የወልዲያ ከተማ ጤና መምርያ ሜዲካል ኦፊሰር ሲስተር ዘሬ በቀለ ለሪፖርተር ተናግረዋል፡፡

የሁለት ሰዎችን ናሙና ወደ ደሴ ሆስፒታል ላቦራቶሪ በመላክ ወረርሽኙ መከሰቱ ተረጋግጧል ያሉት ሲስተር ዘሬ፣ ሁለቱ ሰዎች በበሽታው ተጠቅተው እንደነበር አክለዋል፡፡

ወረርሽኙ በፍጥነት በመዛመቱ 85 ሰዎች ታመው በሦስት ጤና ተቋማት ሕክምና እየተደረገላቸው ሲሆን ከታማሚዎቹ መካከል 11 ያህሉ በፅኑ መታከሚያ ከፍተኛ ክትትል እየተደረገላቸው መሆኑን ሲስተር ዘሬ አክለዋል፡፡

በሕክምና መስጫዎች የመድኃኒት፣ የአልጋና የብርድ ልብስ እጥረት እንዳለ የተናገሩት ሲስተር ዘሬ፣ በሚመለከተው አካል ርብርብ እንዲደረግ ጥሪ አቅርበዋል፡፡

@tikvahethmagazine

#CholeraUpdate

° ኢትዮጵያን ጨምሮ ሀገራት የአፍ ኮሌራ ክትባቶችን ጥያቄ ቢያቀርቡም ያለው ክምችት ማለቁን የአለም ጤና ድርጅት አስታውቋል።

የዓለም ጤና ድርጅት ከጥቅምት አራት ወዲህ በአለም አቀፍ ደረጃ በአፍ የሚወሰድ የኮሌራ ክትባት ክምችት ማለቁን እና ምንም ቀሪ ክትባቶች አለመኖራቸውን አስታውቋል።

የተባበሩት መንግስታት የጤና ኤጀንሲ በበኩሉ በወርሃዊ ሪፖርቱ እንዳሰፈረው ዓለም አቀፍ የክትባት ምርት ላይ በሙሉ አቅም እየተሰራ ቢሆንም ፍላጎቱ ከአቅርቦት በላይ እየሆነ ነው ብሏል።

እንደ ድርጅቱ መረጃ ከ ሐምሌ 26 እስከ ጥቅምት 4 ባለው ጊዜ ውስጥ የአለም አቀፍ የክትባት አቅርቦት አስተባባሪ ቡድን ከባንግላዲሽ፣ ሱዳን፣ ኒጀር፣ ኢትዮጵያ እና ምያንማር የአፍ ኮሌራ ክትባቶችን ጥያቄ ተቀብሏል።

ጥያቄዎቹ በድምሩ 8.4 ሚሊዮን ዶዝዎች ሲሆኑ ነገር ግን በክትባቶቹ እጥረት ምክንያት መላክ የተቻለው 7.6 ሚሊዮን ዶዝ ብቻ ነው።

የአለም ጤና ድርጅት "በመጪዎቹ ሳምንታት ውስጥ ተጨማሪ ክትባቶች ቢጠበቁም ይህ እጥረት ወረርሽኙን ለመከላከል በሚደረገው ጥረት ላይ ከፍተኛ ተግዳሮቶችን ከመፍጠሩ በተጨማሪም የበሽታውን ስርጭት ለመቆጣጠር የሚደረገውን ጥረት ያደናቅፋል" ብሏል።

እየተገባደደ በሚገኘው በፈረንጆቹ 2024 መስከረም 29 ድረስ ብቻ በአለም 439,724 የኮሌራ ተጠቂዎች የተመዘገቡ ሲሆን 3,432 ሰዎች ደግሞ በወረርሽኙ ሳቢያ ህይወታቸው አልፏል

እ.ኤ.አ. በ 2024 የተያዙት ሰዎች ቁጥር ከአምናው ተመሳሳይ ወቅት ጋር ሲነጻጸር በ16 በመቶ ያነሰ ቢሆንም በማቾች በኩል ግን የ 126 በመቶ ጭማሪ አለው።

በመስከረም ወር ብቻ ከ14 ሀገራት 47,234 አዳዲስ የኮሌራ ተማሚዎች ተመዝግበዋል።

@tikvahethmagazine

#CholeraUpdate

° በአማራ ክልል ባለፉት 8 ወራት 66 ሰዎች በኮሌራ በሽታ መሞታቸው ተገለጸ።

በአማራ ክልል በተለያዩ አካባቢዎች ቀደም ብሎ ተከስቶ የነበረው የኮሌራ በሽታ ሥርጭቱ የመቀነስ አዝማማያ ቢያሳይም አሁንም በክልሉ በአንዳንድ አካባቢዎች በቀን እስከ 4 ሰዎች በበሽታው ስለመያዛቸው ሪፖርት እየተደረገ መሆኑ ተነግሯል።

በክልሉ ከመጋቢት 27/2016 ዓም እስከ ጥቅምት 11/2017 ዓም ባለው ጊዜ ውስጥ 4,396 ሰዎች በኮሌራ ተይዘው 66 ሰዎች ለሞት መዳረጋቸውን በአማራ ክልል ህብረተሰብ ጤና ኢንስቲትዩት የበሽታዎች እና የጤና ሁኔታዎች ምላሽ አሰጣጥ ባለሞያ የሆኑት ሲ/ር ሰፊ ደርብ ለቲክቫህ ኢትዮጵያ ተናግረዋል።

ስርጭቱ አሁን በመጠኑም ቢሆን መቀነሱን ያነሱት ባለሞያዋ ምዕራብ ጎንደር ላይ ምዕራብ አርማጭሆ ወረዳ ፣ሰሜን ወሎ ሃሩ ወረዳ እና ደቡብ ጎንደር ላይ ደራ አካባቢ  እስካሁን በበሽታው የተጠቁ ሰዎችን ሪፖርት ማድረግ ቀጥለዋል ብለዋል።

ከዚህ ቀደም ሪፖርት አድርገው የነበሩት ጎንደር ከተማ፣ ማዕከላዊ ጎንደር ዞን፣ ወልቃይት ጠገዴ ሰቲት ሁመራ ዞን፣ ምዕራብ ጎንደር ፣ ደቡብ ጎንደር ፣ሰሜን ጎጃም እና ወልዲያ ከተማ ከፍተኛ ሥርጭት የነበረባቸው ቢሆንም አሁን ስርጭቱን መቀነስ ተችሏል ብለዋል።

በመስከረም ወር ለአስር ቀን በተደረገ የክትባት ዘመቻም በጎንደር ከተማ እና ምዕራብ በለሳ እድሜያቸው ከአንድ ዓመት በላይ ለሆኑ 293,405 ሰዎች ክትባት  መከተብ መቻሉን አክለዋል።

በክትባት ዘመቻው ምዕራብ በለሳ 100 በመቶ ጎንደር ከተማ ደግሞ 86 በመቶ መሸፈን ተችሏል ተብሏል።

ሥርጭቱን ከመከላከል አኳያ ተግዳሮት ስለሆነ ጉዳዮች ጥያቄ ያቀረብንላቸው ባለሞያዋ የጸጥታ ችግር አንዱ ተግዳሮት መሆኑን ጠቁመዋል።

"ለኮሌራ አጋላጭ የሆኑ የስጋት  ቦታዎች በዝተዋል በተለይም የቀን ሠራተኛ በሚበዛባቸው አካባቢዎች ማለትም ማዕከላዊ ጎንደር፣ ወልቃይት ጠገዴ (ሰቲት ሁመራ) እና ምዕራብ ጎንደር ሰፋፊ የእርሻ ቦታዎች ስላሉ እዛ የሚሄድ የቀን ሰራተኛ በሚሊዮን የሚቆጠር ነው ነገር ግን በዛ በቂ የሆነ ውሃ ንጽህናው የተጠበቀ ምግብ ባለመኖሩ ወረርሽኙ እየተከሰተ ነበር" ብለዋል።

የኮሌራ በሽታ ሪፖርት በሚደረግባቸው አካባቢዎች የክትባት ዘመቻው ለምን አልቀጠለም ስንል ላቀረብንላችው ጥያቄም ባለሞያዋ ሲመልሱም :-

"ክትባቱ እኛ ስለፈለግን የምናገኘው አይደለም ይህንን የሚያቀርብ አለም አቀፍ ተቋም አለ የኢትዮጵያ ህብረተሰብ ጤና ኢንስቲትዩት በድንገተኛ (Emergency) ጠይቆ ነው የሚያመጣው ብዙ ጊዜ ክትባቱ ውድ በመሆኑና በእርዳታም የሚመጣ በመሆኑ እኛ ስለፈለግን ብቻ መከተብ አንችልም" ብለዋል።

ነገር ግን አሁንም ክትባት የሚያስፈልጋቸው አካባቢዎች መኖራቸውን ያነሱት ባለሞያዋ ክትባቱ በመጣ ጊዜ ለመስጠት ዝግጁ ነን ሲሉ አክለዋል።

@tikvahethmagazine