Глядзі, хто ў нас зноў на лясных фота – палескія ваўкі! 🐺 Але… у ашыйніках?!

Тут мы бачым адначасова два сучасныя спосабы вывучэння дзікіх жывёл! Першы – фотапастка. А другі – спецыяльныя ашыйнікі са спадарожнікавымі перадатчыкамі, якія дазваляюць сачыць за тым, як перасоўваюцца і паводзяць сябе ваўкі. 👀

Сам ашыйнік не робіць шкоды і дыскамфорту жывёле. А калі тэрмін яго працы заканчваецца, ён аўтаматычна адшпільваецца – вучоныя потым знаходзяць прыладу па радыёсігнале.

Сачэнне за ваўкамі адбываецца ў межах праекта "Палессе – дзікая прырода без межаў". #wildpolesia

Глядзі, якія атмасферныя фота часам выдаюць аўтаматычныя камеры!

💚 Сакавітая зеляніна, ранішні туман, грацыёзная казуля… Але гэтая ідылія ўяўная: дзе хутканогія капытныя, там і драпежнікі – ваўкі і рысі. Такі закон прыроды! Таму звер на фота не губляе пільнасці: няўважлівасць можа каштаваць яму жыцця. Уцякаючы ад драпежнікаў, казуля можа развіваць хуткасць да 60 кіламетраў за гадзіну!😯

🦌Даследаванне папуляцый капытных жывёл пры дапамозе фотапастак вядзецца ў рамках праекта “Палессе – дзікая прырода без межаў”. #wildpolesia

Ты толькі паглядзі: вось дык госця на гняздзе вялікага арляца (большого подорлика)! Вышыня гнязда – 15 метраў ад зямлі! 😯

📷 Спецыялісты кажуць, раней фотапасткі такога не фіксавалі. Хутчэй за ўсё, маладая рысь забралася сюды з цікаўнасці, адрэагаваўшы на пах птушак і іх здабычы.

🦅 Подлетак вялікага арляца не пацярпеў: падчас візіту рыcі птушкі не было ў гняздзе, інакш для птушаняці ўсё магло скончыцца кепска.

Мы працягваем вывучаць вялікіх арляцоў у рамках праекта "Палессе – дзікая прырода без межаў". #wildpolesia

А ў нас навіна: у нацыянальным парку “Прыпяцкі” ўпершыню закальцавалі вусатую сініцу. Раней гэтых птушак тут не рэгістравалі. Цяпер у “Прыпяцкім” афіцыйна на адзін від больш! 👍🏻😍

Зараз праходзіць кальцаванне птушак у рамках праекта “Палессе – дзікая прырода без межаў”. Нашым арнітолагам дапамагаюць захавальнікі дзікай прыроды і валанцёры.

🐦 Галоўная мэта спецыялістаў – белая сініца. Гэтая “чырванакніжная” птушка ў Беларусі жыве толькі на Палессі, поймы палескіх рэк – яе дом. У астатнім жа гэты від вывучаны слаба. Кальцаванне дапаможа болей даведацца пра перасоўванне гэтых птушак.

📷 Аўтар фота вусатай сініцы – Павел Пінчук. #wildpolesia

У нашых арнітолагаў сёння ўдалы дзень! 😍
Глядзі, хто атрымаў каляровае кольца на лапку – палеская прыгажуня белая сініца, птушка 2022 года! 💙

Наша каманда чатыры дні правяла ў марозных палях на Палессі, але атрымала сапраўдную ўзнагароду за настойлівасць.

👉🏻 Арнітолагі разлічваюць з дапамогай кальцавання высветліць, як белыя сініцы паводзяць сябе на працягу года, ці далёка ад месцаў гнездавання зімуюць. Гэта дапаможа прыняць правільныя меры для захавання “чырванакніжных” птушак.

Кальцаванне белай сініцы праводзіцца ў рамках праекта “Палессе – дзікая прырода без межаў”. #wildpolesia

​​Добрая навіна! Мы з кааліцыяй “Захаваем Палессе” вельмі перажывалі, ці ўключаць водны шлях Е40 у абноўлены стратэгічны дакумент па стварэнні эфектыўнай транспартнай сеткі ў Еўрасаюзе – TEN-T. І вось на мінулым тыдні стала вядома, што не ўключылі. 🙌🏻

❓Чаму гэта добра? Таму што Е40, якім хочуць злучыць Балтыйскае і Чорнае мора, ператворыць у каналы апошнія буйныя дзікія рэкі Еўропы і знішчыць дзікую прыроду на вялізных тэрыторыях у Польшчы, Беларусі і Украіне.

Еўракамісія адзначыла немэтазгоднасць польскага ўчастка Е40: акрамя вельмі высокага кошту – блізу 12 млрд еўра – будаўніцтва несумяшчальнае з аховай прыроды і ўстойлівым развіццём. Альтэрнатывай Е40 Камісія лічыць кліматычна ўстойлівую высокахуткасную чыгунку. Таму фінансаваць Е40 у Польшчы ЕС не будзе.

Для беларускага і ўкраінскага ўчасткаў Е40 вердыкту ў дакуменце няма: хутчэй за ўсё, еўрачыноўнікі будуць рашаць гэтае пытанне на ўзроўні Усходняга партнёрства ў 2022 годзе.
Хай рашэнне будзе правільным – на карысць дзікай прыроды!🐦

📷 На фота крывок (кулик-сорока), які жыве на Палессі. Аўтар – Сяргей Зуёнак.
#savepolesia #wildpolesia #stop_e40

Баталёны ў Telegram! 😍

Кааліцыя "Захаваем Палессе" падрыхтавала падарунак на святы: стыкерпак з прыгожай заўважнай птушкай – баталёнам (турухтаном)! Цяпер дзякаваць калегам, дамаўляцца на сустрэчу з сябрамі і зычыць родным добрай ночы можна разам з баталёнам! 🤗

Каб дадаць стыкеры, пераходзь па спасылцы 👉🏻 t.me/addstickers/savepolesia.

❓Чаму менавіта баталён?
Каля паўмільёна гэтых птушак пралятае праз Палессе за год падчас міграцыі. Гэта адно з найважнейшых месцаў на шляху іх доўгага падарожжа.

Баталёны моцна залежаць ад Прыпяці. Яе разлівы, што ўтвараюць мноства выспачак на мелкаводдзі, даюць ім бяспеку ад драпежнікаў і ежу. Будаўніцтва воднага шляху Е40 ставіць пад пагрозу іх выжыванне, бо змяняе натуральны стан ракі.

🙌🏻 Кааліцыя "Захаваем Палессе" выступае за тое, каб Прыпяць заставалася дзікай ракой і хай баталёны радуюць нас і будучыя пакленні ў дзікай прыродзе.
#savepolesia #wildpolesia #stop_e40

Кіламетры пешшу па бездарожжы, начаванне на балотах, доўгія гадзіны назіранняў, лазанне па дрэвах – так выглядаюць працоўныя будні палявых даследчыкаў!

🦉 Самыя каштоўныя скарбы дзікай прыроды тояцца там, куды не пад’едзеш па асфальце і не дойдзеш за пяць хвілін! Гэта добра ведаюць нашы спецыялісты, якія вядуць даследаванні ў рамках пректа “Палессе – дзікая прырода без межаў”.

Якім коштам дастаюцца навуковыя веды, расказаў эксперт АПБ арнітолаг Дзяніс Кіцель. Чытай больш па спасылцы: ptushki.org/news/710179.html.
#wildpolesia

📷 Фота: Андрэй Шымчук.

💚 Добрая навіна для прыроды Палесся!

Мы перадалі пад ахову 89 месцаў пражывання дзікіх жывёл і ўзрастання дзікіх раслін на тэрыторыі Лельчыцкага раёна Гомельскай вобласці.
Пад больш надзейнай аховай цяпер будуць 32 віды раслін, грыбоў, жывёл (сысуноў, птушак, насякомых, павукоў, рэптылій).🐢🦉🕷

Неабходныя даследаванні і дакументы падрыхтаваны ў рамках праекта “Палессе – дзікая прырода без межаў”. #wildpolesia

🐢 Знаёмся: балотная чарапаха – жыхарка Палесся! Гэта адзін з самых старажытных відаў беларускай фаўны – яму больш за 150 мільёнаў гадоў.

Чарапахам пагражаюць шматлікія драпежнікі. Лісы, ваўкі, рысі, янотападобныя сабакі разбураюць кладкі, ядуць яйкі і чарапашанят.

Але самая вялікая пагроза для віду – дэградацыя і страта звыклых месцаў пражывання: балот, рачных поймаў. Да маштабнай меліярацыі Палесся балотная чарапаха была шырока распаўсюджана. Сёння яна ўключана ў Чырвоную кнігу Беларусі.

🙌🏻 У 2021 годзе ў рамках праекта АПБ “Палессе – дзікая прырода без межаў” знойдзена і перададзена пад ахову 12 месцаў пражывання балотнай чарапахі.

✅ Толькі некаторыя сярод ахоўных мер – забарона відаў гаспадарчай дзейнасці, якія могуць нашкодзіць папуляцыі (меліярацыя, здабыча карысных выкапняў, суцэльнае высяканне лесу, выкарыстанне ўгнаенняў, выпасанне свойскай жывёлы), абмежаванне хуткасці руху транспарту і выкарыстання цяжкай тэхнікі. #wildpolesia

📷 Фота: Ігар Бышнёў (AVES).

🌱 2 лютага – Сусветны дзень водна-балотных угоддзяў.
❓Чаму гэта важна для ўсіх нас?
Водна-балотныя ўгоддзі захоўваюць запасы чыстай вады, абараняюць нас ад навадненняў, засух, пажараў, змяншаюць парніковы эфект, служаць домам для мноства відаў флоры і фаўны.

Водна-балотныя ўгоддзі ў свеце імкліва дэградуюць і знікаюць. Вучоныя папярэджваюць: разам з імі можа знікнуць і жыццё на Зямлі!

❓Што ты можаш зрабіць для водна-балотных угоддзяў?
Для пачатку – паказаць сваю неабыякаваць і расказаць іншым, чаму яны важныя, а іх страта небяспечная.

🏃Далучайся да сусветнай акцыі #WorldWetlandsRun! Умовы вельмі простыя:

✅ выберы зручны маршрут для прабежкі альбо шпацыру (асабліва здорава, калі побач будзе рака, возера, балота);

✅ у любы час з 2-га па 5-га лютага выходзь на прабежку/пешую прагулку па маршруце; 🏃‍♀️

✅ зрабі фота альбо відэа і запосці ў сацыяльных сетках, тэгні АПБ і дадай хэштэгі #WorldWetlandsRun і #wildpolesia.

Далучайся – давай пакажам, што нас шмат і нам не ўсё роўна!

Яшчэ адзін рэдкі і незвычайны від з Палесся – жук-рагач. 😍

Гэта самы вялікі жук у Беларусі – даўжыня цела можа дасягаць 8 сантыметраў! Рагача лёгка пазнаць па вялікіх разгалінаваных “рагах” (насамрэч гэта не што іншае як яго сківіцы!)

Лічынкі насякомага развіваюцца вельмі доўга – некалькі гадоў. У гэты час яны харчуюцца спарахнелай драўнінай.

☝️ Жук-рагач уключаны ў Чырвоную кнігу Беларусі. Адна з асноўных пагроз для яго – вырубка старых шыракалісцевых лясоў, асабліва дуброў, выдаленне сухастойных дрэў і ветравалаў.

🙌 У 2021 годзе ў рамках праекта АПБ “Палессе – дзікая прырода без межаў” #wildpolesia перададзена пад ахову 15 месцаў пражывання жука-рагача.

🌳 Цяпер там прадпісана захоўваць старыя і засохлыя дрэвы, заселеныя жукамі і іх лічынкамі, забаронена прымяняць хімікаты, паліць сухую расліннасць і адходы лесанарыхтоўкі.

Існуе міф, што дзякуючы E40 Беларусь магла атрымаць выйсце адразу да двух мораў (Балтыйскага і Чорнага) за мінімальную цану, што гэта эканамічна выгадны праект. 🤔

❗️Але новае эканамічнае даследаванне зноў паказвае, што нават аптымістычныя сцэнары не могуць выратаваць запланаваны водны шлях E40 ад банкруцтва.

У справаздачы Langhout Ecologisch Advies апісваюцца доўгатэрміновыя страты ў мільярды еўра, якія могуць узнікнуць у выніку будавання ключавой часткі прапанаванага воднага шляху, што ідзе з польскага Гданьска ў беларускі Брэст 👉🏻 ptushki.org/news/711787.html.

📷 Фота: Віктар Малышчыц. #savepolesia #wildpolesia #stop_e40

​​❄️ Ясным марозным днём захавальнікі дзікай прыроды Палесся адправіліся да Прыпяці, каб падлічыць вадаплаўных птушак. Іх чакала цікавая знаходка: вялікае гняздо на дрэве.

🦅 Непадалёк назіралі арлана-белахвоста – самую буйную драпежную птушку Беларусі з размахам крылаў да 2,5 метра! Арлан-белахвост уключаны ў Чырвоную кнігу Беларусі.

Цалкам магчыма, знойдзенае гняздо – менавіта яго жытло. Ці так гэта, трэба ўдакладніць. Але знаходка ў любым выпадку важная: вялікія гнёзды ў лесе часта належаць “чырванакніжным” птушкам. У такім выпадку ахове падлягае не толькі дрэва з гняздом, але і значны ўчастак лесу вакол яго! 🌳

❓Што рабіць, калі знойдзеш вялікае гняздо, якое можа належаць рэдкай птушцы?

✅ Максімальна дакладна вызначы месцазнаходжанне: каардынаты альбо напрамак і адлегласць ад вядомых аб’ектаў (населеных пунктаў, вадаёмаў і інш.).

✅ Зрабі фота, па магчымасці падрабязна апішы дрэва, гняздо і тое, што знаходзіцца навокал. Калі пад гняздом ёсць пер’е, рэшткі здабычы, таксама зафіксуй гэта.

✅ Звярні ўвагу на гаспадарчую дзейнасць, якая вядзецца паблізу (нарыхтоўка лесу і інш.). Паглядзі, ці няма на дрэвах побач пазнак – гэта можа сведчыць, што іх збіраюцца высякаць.

✅ Сабраныя матэрыялы перадай у Навукова-практычны цэнтр НАН Беларусі па біярэсурсах (калі гаворка пра від жывёл) альбо ў Інстытут эксперыментальнай батанікі НАН Беларусі (калі гаворка пра расліну). #wildpolesia

📷 Фота Юліі Ляшкевіч.

🌱 Расіца прамежкавая (росянка промежуточная) – рэдкая расліна, што сустракаецца на верхавых балотах. Там, дзе яна расце, глебы вельмі бедныя на мінералы, да таго ж карані ў расіцы развітыя слаба, таму яна амаль не здабывае пажыўных рэчываў звычайным для раслін спосабам. Затое атрымлівае іх па-іншаму – ловячы насякомых. 😮

Расіца выдзяляе кропелькі цягучай клейкай вадкасці, якія блішчаць на сонцы і вабяць здабычу. Сеўшы на расліну, яна апынаецца ў пастцы: сок паралізуе яе. “Злавіўшы” насякомае, ліст расіцы згортваецца і выдзяляе рэчывы, падобныя да стрававальных ферментаў. Ператраўліванне доўжыцца некалькі дзён.

💧Расіца моцна залежыць ад воднага рэжыму. Там, дзе яна расце, забаронены асушальная меліярацыя і здабыча торфу. Два месцы ўзрастання расіцы прамежкавай перададзены пад ахову летась у рамках праекта “Палессе – дзікая прырода без межаў”. #wildpolesia

📷 Фота Аляксандра Казуліна.

Глядзі, якія мілыя звяры сустракаюцца ў палескіх лясах! Гэта – соня-палчок. ☺️

Від нездарма так завецца – соня праводзіць у спячцы больш за паўгода. 💤 У астатні час звярок вельмі актыўны, спрытна сноўдае па галінах і можа рабіць вялікія – да 10 метраў – скачкі паміж дрэвамі!

Доўгі хвост дапамагае соні ў руху, бо “працуе” як процівага і руль. Аднак у выпадку атакі драпежніка соня, схопленая за хвост, можа пакінуць у зубах нападніка толькі пухнатую скурку, якая лёгка здымаецца з хваста, як панчоха. 😯

Соня-палчок уладкоўвае гнёзды ў дуплах, радзей – пад паваленымі камлямі ці сярод каранёў дрэў. Вялікую долю рацыёну соні складаюць садавіна, ягады, арэхі. 🌰🍇

У 2021 годзе 6 месцаў пражывання соні-палчка на Палессі перададзена пад ахову ў рамках праекта АПБ “Палессе – дзікая прырода без межаў”. Там, дзе жывуць гэтыя “чырванакніжныя” грызуны, забаронена высякаць пладова-ягадныя і арэхаплодныя кусты і дуплістыя дрэвы, апрацоўваць расліны хімікатамі. #wildpolesia

📷 Фота Ігара Бышнёва.