У 2024 годзе эксперты кампаніі “Дзікая прырода” праманіторылі захаванасць 196 месцаў з чырванакніжнікамі ў Іванаўскім, Пінскім, Ганцавіцкім, Драгічынскім, Столінскім, Шчучынскім і Гродзенскім раёнах.

Акрамя гэтага яны знайшлі новыя месцы, дзе жывуць ці растуць віды з Чырвонай кнігі і падрыхтавалі 143 пашпарты і ахоўныя абавязкі. Распачалася працэдура перадачы ўсіх дадзеных месцаў пад ахову. #ДзікіяЭкспедыцыі

🙏 Дзякуем усім удзельнікам “Дзікага клуба”, чэмпіянатаў па фотабёрдынгу, пакупнікам кніг пра дзікую прыроду. Вынікі нашай працы – і ваша заслуга. Бо ўвесь прыбытак кампаніі ідзе на ахову дзікай прыроды Беларусі.❤️

❓ Хочаш падтрымаць працу па ахове дзікай прыроды? Далучайся да “Дзікага клуба”, набывай значкі-піны з жывёламі і кветкамі, атлас-вызначальнік раслін, размалёўкі ад арнітолагаў https://dzikajapryroda.aqulas.me

Go into the wild! Натхняльнік кампаніі Барсук Ясь

📷 На фота эксперта Юрыя Янкевіча венерын чаравічак у заказніку "Дзівін – Вялікі Лес", Кобрынскі раён.

З 16 лютага законам забаронена разбураць птушыныя гнёзды!

Да гэтага часу яшчэ можна паклікаць камунальнікаў, каб прыбралі старыя гнёзды. Гэта зменшыць шанцы, што ў цябе пад вокнамі паселіцца калонія гракоў.

🦉 Ранняя забарона звязана ў асноўным з совамі, якія сваіх гнёздаў не будуюць, а займаюць чужыя. У гняздзе грака зараз можа апынуцца вушатая сава з яйкамі ці нават птушанятамі.

#Дзікіфакт Пугачы могуць гнездаваць у буслянках. Такія выпадкі былі неаднаразова зафіксаваны ў Беларусі, нават у населеных пунктах.

☝️ Забарона на разбурэнне птушыных гнёздаў дзейнічае па 14 жніўня ўключна. Парушэнне караецца штрафам.

Калі пасля 15 лютага ты заўважыш, што нехта разбурае гнёзды, трэба адразу пазваніць у раённую інспекцыю Мінпрыроды. Ці можна зарэгістравацца і напісаць у абласны камітэт Мінпрыроды праз сайт адзінай сістэмы паведамленняў https://обращения.бел

Паведамі дату і месца здарэння, пастарайся зрабіць фота ці запісаць відэа. Варта зняць нумар пад’ёмніка і іншых машын, калі адбываецца абрэзка дрэваў з дапамогай такой тэхнікі. Калі магчыма, зафіксуй, што знаходзіцца ў гнёздах, калі яны апынуліся на зямлі. Перапішы ці здымі на фота надпісы на спецвопратцы. Чым больш інфармацыі і доказаў, тым лепш.

📷 На фота Віталя Некрашэвіча птушаня вушатай савы, якое вылупілася ў былым гняздзе шэрай вароны ў Брэсце.

Шэрая кугакаўка (серая неясыть) сустракаецца па ўсёй тэрыторыі Беларусі. Яна часта гняздуецца ў парках і каля населеных пунктаў. Але пачуць яе прасцей, чым убачыць.

🦉 Кугакаўкі пачынаюць сезон размнажэння ўжо ў студзені, і зараз па начах чутны гучныя крыкі самца. Крычаць яны з прыцемак і да самага досвітку. Крык самца працяглы і меладычны – «ууу...у...у...ууууууууу». Ён такуе, седзячы на галіне вялікага дрэва. Самка ў адказ можа кінуць  кароткае рэзкае “ку-віт”.

👂 Зараз добры час, каб пачаць слухаць соў. Трэба выбіраць ціхі сухі вечар без ападкаў і ветру. Пачынай прыслухоўвацца да наваколля з захадам сонца. А калі не зможаш вызначыць па голасе, што за від крычыць, дасылай нам свае аўдыя/відэазапісы – дапаможам!

Дарэчы, зараз яшчэ не позна павесіць штучныя гняздоўі для соў.

📷 Дзякуем за фота Кацярыне Крупянковай, чат “Птушкі з фотастужкі” @ptushkafota.

#галасыптушак

Вух, драпежніцы! Глядзі, што заўтра чакае цябе на мінскім галоўным паштамце.

11 лютага, у Беларусі выходзяць у абарот паштовыя маркі з драпежнымі раслінамі.

Колькі відаў драпежных раслін ты ведаеш? А на марках іх чатыры, прычым з іх толькі адна расіца.

🌱 Драпежныя расліны звычайна растуць на пясках ці ў вадзе – месцах, бедных мінераламі, таму каб атрымаць неабходныя азот і фосфар, яны ловяць дробных казурак ці рачкоў.

На марках – чатыры з 10 драпежных раслін флоры Беларусі: тлушчанка звычайная (жирянка обыкновенная), расіца круглалістая (росянка круглолистная), плывунец звычайны (пузырчатка обыкновенная), альдраванда пухіраватая (альдрованда пузырчатая).

💌 Заўтра і толькі заўтра на галоўным паштамце краіны ты зможаш пагасіць марку на адмысловым канверце першага дня спецыяльным штэмпелем, які выкарыстоўваецца толькі адзін дзень.

Прыходзь набыць маркі ў сваю калекцыю!

Маркі выпусціла Міністэрства сувязі і інфарматызацыі. Над імі працавалі мастак Аляксандр Міцянін і дызайнерка Марына Крэзо.

👉 Напішы, ці бачыў(ла) ты гэтыя расліны ў прыродзе? Ці, можа, зараз апазнаў(ла) якое?

Запрашаем усіх на афлайн-лекцыю ў Мінску!

У гэты чацвер, 13-га лютага, у 19.00 у НПЦ па біярэсурсах пройдзе лекцыя Аляксандра Вінчэўскага, супрацоўніка кампаніі “Дзікая прырода” пра прыроду аднаго з самых вялікіх астравоў планеты: "От эпиорнисов до ванг: история птиц Мадагаскара".

❓ Якія атрады і сямейства птушак пражываюць толькі на Мадагаскары?
❓ Каго з беларускіх відаў птушак можна там сустрэць?
❓ Які шанец у эндемікаў Мадагаскару выжыць у нашым турбулентным свеце?

На гэтыя і іншыя пытанні Аляксандр адкажа падчас лекцыі. У канцы ты зможаш задаць свае пытанні.

🏆 Падчас лекцыі адбудзецца ўзнагароджанне прызёраў восеньскага чэмпіянату па фотабёрдынгу і па спартыўнай арніталогіі.

Будзем радыя вас бачыць! Уваход вольны, але патрэбна кароткая рэгістрацыя.

📍 Мінск, Акадэмічная 27, аўдыторыя 331.

📷 Дзякуем за фота мадагаскарскай белавочкі Наталлі Косар.

100 гадоў Бярэзінскаму біясфернаму запаведніку! 🎉

Віншуем супрацоўнікаў і аматараў дзікай прыроды Беларусі!

🌿 Бярэзінскі біясферны запаведнік арганізаваны 30 студзеня 1925 года для аховы баброў і іншых жывёл ад паляўнічага прэсу. Тады, яшчэ да меліярацыі, тут цудам захавалася самае вялікае ў СССР пасяленне баброў, знойдзенае заолагам Анатолем Фядзюшыным.

У гонар юбілею ў Мінску адкрылася фотавыстава навуковага супрацоўніка ББЗ Дзяніса Іўковіча. Прыходзь палюбавацца дзікай прыродай! ❤️

Выстава праходзіць у Нацыянальным мастацкім музеі да 17 лютага ўключна па адрасе вул. Леніна, 20.

📷 Фота Дзяніса Іўковіча.

Як крычыць вялікі дзяцел? Уключай гук!

🐦 Вялікі дзяцел – добра вядомая ўсім птушка, якую можна сустрэць па ўсёй Беларусі, нават у населеных пунктах, парках і садах.

Ужо з канца лютага можна пачуць гучныя крыкі вялікіх дзятлаў “кек.. кіікк..” і “гігігі”. У гэты час дзятлы разбіваюцца на пары і самцы спаборнічаюць паміж сабой за самак і гнездавыя ўчасткі.

У лесе часта можна пачуць “барабанны дробат” вялікага дзятла: седзячы на вяршыні сухога дрэва, самец у хуткім тэмпе б’е дзюбай па драўніне. Так ён абазначае межы сваёй тэрыторыі і прыцягвае ўвагу самкі. У ціхае надвор’е гэты гук можна пачуць за некалькі сотняў метраў.

Такая гукавая камунікацыя ў дзятлаў працягваецца прыкладна да канца красавіка.

📷 Дзякуем за фота Вользе Шугалеўскай, чат “Птушкі з фотастужкі” @ptushkafota

#галасыптушак

Сёння пагаворым пра гілёў!

🐦 Кожны год мастакі малююць мілыя паштоўкі з парачкамі чырвоненькіх гілёў, а людзі любуюцца: "Які прыгожы дуэт!" Але вось сюрпрыз: у прыродзе толькі ў самцоў гілёў чырвоныя брушкі, а ў самак яны шэра-бэжавыя. 😜

Так што, дарагія мастакі, глядзіце шырэй! Замест таго, каб маляваць двух аднолькавых гілёў, дадайце крыху разнастайнасці: няхай на вашых паштоўках будуць і самцы, і самкі! 🤗

З Днём усіх закаханых! ❤️

#птушкажарт

У чым праблема спажывання мяса для захавання дзікай прыроды?

🐄 Жывёлагадоўля займае на планеце 77% сельскагаспадарчых плошчаў, але вырабляе толькі 18% калорый і 37% бялку ў ежы чалавека.

Мясная прамысловасць робіць значны ўнёсак у выкіды вуглякіслага газу і знішчэнне лясоў пад пашы. Адмова ад мяса і малочных прадуктаў у глабальным маштабе магла б скараціць выкарыстанне сельскагаспадарчых зямель як мінімум на 75%!

Але можна не адмаўляцца ад мяса зусім, нават змяншэнне яго спажывання зніжае нагрузку на дзікую прыроду.

❓ Што, напрыклад, можна зрабіць? Вось практычныя саветы ад сяброў Дзікага клуба:

🔹 Пазбягаць стрэс, каб не пераядаць.
🔹 Распаўсюджваць інфармацыю пра жорсткае стаўленне да жывёл, якіх забіваюць на мяса.
🔹 Рабіць разгрузачныя дні без мяса.
🔹 Есці мяса толькі па выходных.
🔹 Пісаць вытворцам харчовай індустрыі, каб прасоўвалі вегетарыянства.
🔹 Дадаваць у стравы арэхі замест мяса – гэта вельмі смачна.
🔹 Дзяліцца смачнымі вегетарыянскімі рэцэптамі з іншымі.

Да 2050 года плануецца павялічыць спажыванне мяса на 76%!

Раскажы пра свае любімыя рэцэпты без мяса! 🤗

Любіш дзікую прыроду Беларусі і марыш працаваць дзеля яе захавання? 💚

Калі ты выдатна валодаеш офіснымі праграмамі, можаш весці справаводства і працаваць з заказамі, будзем радыя твайму рэзюмэ!

📝 Дасылай рэзюмэ на вакансію памочніка кіраўніка ТАА “Дзікая прырода” да 2 сакавіка ўключна.

Падрабязнасці пра вакансію тут

📷 Дзякуем за фота Кацярыне Вараб’ёвай.

❄️🐦 Дапамажы птушкам у марозныя дні! Падкармі іх несалёнымі нясмажанымі семкамі.

Малюнак з інтэрнэту.

#птушкажарт