#КухняБеларусі

Шматок мяса з журавіным соусам

Склад:
● кавалак мяса (стэйк) з ялавічыны / свініны / курынага філе;

марынад:
● цыбуля (1 шт.),
● гарчыца ў зернях,
● алей сланечнікавы (3 ст. л.),
● сок ½ цытрыны,
● соль,
● спецыі, зеляніна;

ягадны соус:
● ягады (200 г),
● вада (100 мл),
● крухмал (2 ч. л.),
● цукар па смаку,
● молаты цынамон (½ ч. л.).

Гатаванне
Адбіць мяса. Для марынада: змяшаць з дапамогай блэндара ўсе інгрэдыенты. Атрымліваецца вельмі духмяная, кашападобная маса. Дадаць гэту масу да мяса і пакінуць на пару гадзін марынавацца.

Ягады прамыць і паставіць у сатэйнік на агонь. Дадаць вады і накрыць вечкам. Варыць 5–10 хвілін. Дадаць у ягадную масу крухмал, цукар (па смаку) і молаты цынамон.

Мясныя стэйкі змясціць у рашотку-грыль і гатаваць на вуглях. Падаваць з ягадным соусам.

#КухняБеларусі

Вантрабянка

Склад:
● свініна (ногі, вушы, вантробы, сала, мяса),
● свіныя кішкі,
● лаўровы ліст,
● перац,
● соль,
● часнок,
● каляндра.

Гатаванне
Усе інгрэдыенты добра прамыць і пакінуць замочвацца на некалькі гадзін. Скласці ў вялікі чыгун, паставіць у печ на 2–3 гадзіны.

Падчас варэння рэкамендуецца не саліць, з прыправаў можна дадаць толькі лаўровы ліст, каб захаваць смак вантробаў.

Паралельна падрыхтаваць свіныя кішкі: ачысціць, вымыць і адмачыць у растворы з цытрыны, соллю і перцам.

Звараныя вантробы дробна нарэзаць. Рабіць гэта трэба абавязкова ўручную, толькі ў гэтым выпадку страва будзе мець непаўторны смак.
Пасля таго як інгрэдыенты парэзаны, атрыманую сумесь пасаліць, папярчыць, дадаць здробнены часнок і каляндру і пакінуць на некалькі гадзін, каб яна “настаялася”.

На заключным этапе начыняюць кішкі, а пасля кладуць пад прэс, каб яна такім чынам прыняла неабходную форму.

#КухняБеларусі

Мазгі ў яйках

Склад:
● яйкі курыныя,
● мазгі (свіныя або цялячыя),
● цыбуля,
● кроп.

Гатаванне
Яйкі зварыць укрутую. Падчас варкі абавязкова пасаліць ваду, каб бялок добра адставаў ад шкарлупіны.

Цыбулю і кроп пасераваць на сметанковым масле, дадаць на патэльню мазгі і, памешваючы, смажыць да гатовасці. На гэта спатрэбіцца 5–7 хвілін.

Яйка разам са шкарлупінай рэзкім ударам вострага нажа прабіць да траціны шырыні, потым мяккім націскам разразаць да канца (спатрэбіцца пэўны спрыт, не факт, што атрымаецца з першага разу). Пасля акуратна дастаць бялок з жаўтком, “кубачак” са шкарлупіны пакінуць.

Жаўткі з бялкамі расцерці відэльцам. Затым змешаць яйкі з масай, якая ляжала ў патэльні, і акуратна напоўніць ёй шкарлупіны.

#КухняБеларусі

Бульба-гармонік

Склад:
● бульба,
● лустачкі бекону,
● сыр,
● шампіньёны.

Гатаванне
Бульбу ачысціць, пажадана выбраць не вельмі буйную, выцягнутай формы. Зрабіць надрэзы па ўсёй бульбачцы, не даразаючы да канца. У кожны разрэз уставіць лустачку бекону, можна чаргаваць бекон з сырам ці бекон з дзелькамі шампіньёнаў. Зверху паперчыць, загарнуць у фальгу (можна ў фальгу пакласці яшчэ зубчык часнаку) і адправіць у духоўку, хвілін на 40.

#КухняБеларусі

Кішка-налівайка, альбо наліваная

Склад:
● кішка свіная дыяметрам каля 6–7см (1 м),
● бульба (2,5 кг),
● грудзінка (300 г),
● белае сала альбо 3–4 ст. л. свінога тлушчу
● цыбуля сярэдняга памеру (2 шт.),
● соль па смаку
● перац па смаку

Гатаванне
Сцерці сырую бульбу на дробнай тарцы. Адстаяць каля 0,5 гадзіны і зліць жыжку.

Накроіць грудзінку і цыбулю на кубікі, засмажыць.

Добра змяшаць грудзінку з цыбуляй і нацёртай, ужо адцэжанай бульбай.
Пасаліць, папярчыць, яшчэ раз змяшаць.
Напіхаць атрыманую масу ў кішку.
Важна кішку не напіхваць шчыльна, бо можа лопнуць!
Потым завязаць з аднаго канца, перакруціць на “кавалкі” кішку з крокам у 15–20см і завязаць з другога канца гэтай жа кішкай.

У цёплы (не гарачы) тлушч пакласці напіханую кішку.
Важна пасля ўкладкі кішкі папрацінаць іголкай ці вострай палачкай (зубачысткай ці запалкай) з крокам у 6–8 см, каб пад час запякання кішка не лопнула і не разлезлася.
Закласці кішку на гадзіну ў духоўку з тэмпературай 170 °С.
Праз гадзіну можна спажываць!

#КухняБеларусі

Бульба па-вясковаму

Склад:
● бульба (2 кг),
● карп (900 г) (падыходзіць любая азёрная або рачная, але не марская),
● каўбаскі па-вясковаму (8–12, у залежнасці ад колькасці людзей),
● алей (150 г),
● перац,
● соль,
● молатыя спецыі, сухі кроп і кінза.

Гатаванне
На добра змазаную алеем бляху выкласці па цэнтры добра падсоленага і нацёртага спецыямі карпа. Астатняе месца закласці пасоленай, запраўленай спецыямі, нарэзанай на 4–6 частак бульбай.

Пагрузіць у бульбу па краях каўбаскі (каб не высахлі пры выпяканні).

Запякаць у смажыльнай шафе 50–60 хвілін. Гатовую страву пасыпаць кропам.

#КухняБеларусі

Сцулёк (У нас звалі сікун)

Склад:
● свежы свіны мачавы пузыр,
● мясны фарш,
● прыправы,
● соль.

Гатаванне
Свежы свіны пухір надзьмуць праз саломку, высушыць, перад напаўненнем, калі стаў занадта сухі, абліць кіпенем. У фарш пакласці ўсе прыправы, як на каўбасу, і соль.

Парэзаны рукамі фарш робіць сцулёк прадуктам класу люкс.

Ля гарляку пузыра зрабіць невялікі прарэз і напоўніць мясным фаршам як мага поўна, дзірку зашыць, абвязаць ніткай і добра падсушыць.

#УспаміныПраДзяцінства
#КухняБеларусі

Пра тое, як рабілі і калі елі сікун.

*Націскайце на хэштэг #УспаміныПраДзяцінства каб знайсці яшчэ больш цікавостак

#КухняБеларусі

Яешня духавая

Склад(на 6 порцый):
● яйкі (8 шт.),
● мука (6 ст. л.),
● малако (800 мл),
● соль,
● цыбуля (3 шт.),
● вяндліна (300 г),
● алей (50 г),
● масла сметанковае (50 г).

Гатаванне
Цыбулю нарэзаць саломкай, абсмажыць да залацістага колеру, дадаць вяндліну (саломкай), абсмажваць 2–3 хвіліны.

Атрыманую сумесь выкласць у ёмістасць для запякання.
Яйкі ўзбіць, дадаць малако, муку і соль. Усё гэта ўліць у ёмістасць для запякання, змяшаць з цыбуляй і вяндлінай. Запякаць у духоўцы 30 хвілін пры тэмпературы 190 °С.

#КухняБеларусі

У дапамогу вам

#КухняБеларусі

Лазанкі

У беларускай кухні лазанкі  вядомы з ХVІ стагоддзя. Аснова гэтай смачнай стравы – кавалачкі цеста з пшанічнай, жытнёвай або грэцкай мукі, таму беларускія лазанкі і італьянскую лазанню можна лічыць сваякамі.

У Беларусі квадрацікі (трохвугольнікі) з раскатанага крутога цеста варылі і залівалі смажаным салам з цыбуляй, у пост – перамешвалі з цёртым макам або расцёртымі ягадамі.

Акрамя таго, лазанкі запякалі ў гаршчочках з мясам або капустай, тушылі са смятанай.

Для лазанак:
мука
вада
соль і цукар на смак
алей

Для начынкі:
70 г свіной вэнджана-варанай грудзінкі
100 г паляўнічых каўбасак
1 сярэдняя цыбуліна
алей
50-70 г вяршкоў
50 г цёртага цвёрдага сыру

Гатаванне:
Цеста для лазанак падобнае да пельменнага. У прасеянай горкай муцэ зрабіць заглыбленне, дабавіць соль і цукар, крыху алею для эластычнасці і, паступова даліваючы ваду, замясіць цеста, пакуль яно не стане “цвёрдым” і пластычным.

Раскатаць цеста таўшчынёй 1-1,5 мм, нарэзаць ромбамі. Калі ёсць час – даць загатоўкам высахнуць пры пакаёвай тэмпературы, калі часу мала – падсушыць у разагрэтай да 100-120 ºС духоўцы. Лазанкі адварваць у падсоленай вадзе 5-7 мінут.

Тым часам прыгатаваць начынку. Грудзінку нарэзаць кубікамі і абсмажыць, пакуль не пачне вытаплівацца тлушч. Дабавіць дробна нарэзаную цыбулю, прадаўжаючы пасіраваць да залацістага колеру, пакласці кружочкі каўбасак і смажыць яшчэ 3-4 мінуты.

Да гатовай начынкі дабавіць адварныя лазанкі з невялікай колькасцю вады, у якой яны варыліся, вяршкі і сыр, патушыць, пастаянна памешваючы.

Калі сыр стане цягучым – зняць з пліты, выкласці на талерку і ўпрыгожыць зелянінай.

Лазанкі можна падаць і запечанымі. Для гэтага ў керамічны гаршчочак выкласці слаямі адварныя лазанкі і начынку, дабавіць вяршкі, пасыпаць сырам і паставіць у духоўку падрумяніцца да залацістай скарыначкі.

#КухняБеларусі

Папулярны партал пра ежу і падарожжах taste Atlas прадставіў спіс лепшых гастранамічных краін на 2024-2025 гады.

У першую сотню трапіла і Беларусь, на што звярнуў увагу рэспубліканскі саюз турыстычных арганізацый.

Беларусь заняла 75-е месца - паміж Іарданіяй і Эквадорам. Характэрна, што наша краіна апярэдзіла такія гастранамічныя дзяржавы, як Латвія (79-е месца), Ізраіль (87-е) і Арменія (93-е).

Сярод самых папулярных беларускіх страў у рэйтынгу пазначаны калдуны, сырнікі і мачанка.

#КухняБеларусі

🎙 Госць радыё «Культура» – шэф-повар, гісторык беларускай і славянскай кухні АЛЕНА МІКУЛЬЧЫК.

Цудоўная змястоўная размова на беларускай мове!

▫️ Пралетарская і арыстакратычная гісторыі сялёдкі пад шубай
▫️ Кулінарныя рэвалюцыі еўрапейскай кухні
▫️Што такое боршч і чаму ў беларускім баршчы фасоля

На развітанне – рэцэпт «Лампапо».

Далучайцеся да размовы ТУТ

#МоваНашаРодная
#КухняБеларусі

Не ведаю, як вам, а мне цікава і прыемна знаходзіць нашы аналагі нейкім замежным назвам і словам.

Слухаючы размову з Аленай Мікульчык даведалася, што французскія круттоны і італьянскія брускеткі можна называць па-беларуску цёплым словам КАНАПКІ

Цяпер сваім гасцям на закуску буду падаваць айчынныя КАНАПК! Смачнага ім!

#КухняБеларусі

Мачанка грыбная

З чаго гатаваць:

100 г сушаных грыбоў,
2 цыбуліны,
1 ст. л. мукі,
1-2 ст. л. алею,
перац (па патрэбе),
соль (да смаку).

Як гатаваць.

Замачыць сухія грыбы на некалькі гадзін у халоднай вадзе, прамыць, заліць вадой, у якой яны мачыліся, папярэдне працадзіўшы яе. Адварыць і нашаткаваць саломкай.
На сухой патэльні падсмажыць муку, развесці невялікай колькасцю ахалоджанага грыбнога адвару. Змяшаць з асноўнай часткай грыбнога адвару, дадаць падсмажаную цыбулю, перац, соль. Атрыманым соусам заліць грыбы, давесці да кіпення.

Да грыбной мачанкі падаць звараную бульбу.

Смачна есці!

​​#КухняБеларусі

​​Калядныя лазанкі

Лазанкі з макам і сухафруктамі – адна з абавязковых страў на Куццю.

Рыхтуюцца лазанкі ў нашай краіне, верагодна, з 16 стагоддзя. Іх назва паходзіць ад слова lasagne, што азначае Італьянскія макароны ў выглядзе прамавугольных лістоў. Паводле падання, Італьянка Бона Сфорца прывезла на нашу Радзіму з Італіі мноства страў, сярод якіх былі і лазанкі.

Інгрэдыенты:

1 ўпакоўка ванільнага цукру
100 г насення маку
4 лыжкі разынак
4 лыжкі мёду
4 лыжкі сечанага міндаля
1 лыжка апельсінавай цэдры
1 шклянку мукі
2 яйкі
Трохі солі

Прыгатаванне:

1. Заліце мак кіпенем і варыце 30 хвілін, дайце астыць.
2. Зліце ваду і добра здрабніце ў кавамолцы.
3. Бланшыруйце і зліце ваду з разынак і растапіце мёд.
4. Змяшайце мак з міндалем, апельсінавай цэдрай і разынкамі.
5. Да маку дадайце ванільны цукар і мёд. Яшчэ раз старанна перамяшайце.
6. Цяпер прыйшоў час локшыны. Усыпце муку ў міску, дадайце яйка і соль.
7. Замесіце цеста, раскачайце яго на кандытарскай дошцы і нарэжце невялікімі ромбікамі.
8. Варыць у злёгку падсоленай кіпячай вадзе каля 7-19 хвілін.
9. Добра зліце ваду з лазанак і змяшайце з макавай сумессю.

#КухняБеларусі

Як прыгатаваць бігас?

Бігас у кожным доме рыхтаваўся па-свойму, у адпаведнасці з хатняй традыцыяй.
Гэта і паляўнічы, і літоўскі, і сялянскі бігас, і мноства іншых рэцэптаў.
Гатавалі яго толькі з квашанай, з квашанай і свежай або толькі са свежай капусты.
Мы прапануем найбольш пашыраны варыянт бігасу з каўбасой, мясам і са свежай і квашанай капусты.

Для пачатку зварым хатнюю каўбасу, булён не выліваем, ён нам пазней спатрэбіцца. Пакуль каўбаса варыцца, возьмем вэнджаную грудзінку ці сала, нарэжам кубікамі і кінем у рондаль, каб вытапіўся тлушч.
Пакуль смажыцца мяса, зоймемся сушанымі ляснымі грыбамі. Жменю грыбоў пакласці ў міску і заліць іх кіпнем, пакінуць, пакуль цалкам не стануць мяккімі. Булён ад грыбоў таксама спатрэбіцца пазней.
Вяртаемся да каўбасы, прыгатаваную рэжам кольцамі і дадаем абсмажвацца да мяса.
Для больш насычанага смаку стравы нам спатрэбіцца цыбуля. Яе трэба пачысціць і вельмі тонка парэзаць на паўкольцы. Дадаем цыбулю да мяса і абсмажваем разам з ім. Куды ж без солі і перцу, дадаем прынады ў страву і перамешваем.

Не менш важным за мяса складнікам бігасу з’яўляецца капуста. Свежую капусту варта тонка нашынкаваць, а потым яшчэ і пасячы ўпоперак, каб кавалкі капусты сталі яшчэ меншымі. Капусту трэба заліць кіпнем на пару хвілін, затым сцадзіць і дадаць у рондаль са стравай.
Уздагонку за свежай капустай дадаем і кіслую, а для больш яскравага смаку яшчэ і пару лісткоў лаўрушкі. Страву трэба добра перамяшаць.

Настаў час грыбоў! Іх трэба дробна пасячы і дадаць у бігас, а за імі грыбны і каўбасны булён. Яшчэ раз добра памяшаць і тушыць 30 хвілін. Мяшайце час ад часу страву, бо яна мае ўласцівасць падгараць.

Пакуль страва тушыцца, падрыхтуем форму для падачы. Зрэжам з чорнага хлеба макаўку, выдалім мякіш з сярэдзіны і паставім хлебную форму ў духоўку ці печ, каб хлеб трошкі падсушыўся, хлеб тады не так хутка размокне ад налітай у яго стравы. Але страва не стане менш смачнай, калі вы падасцё яе ў звычайнай талерцы.

За 10 хвілін да гатоўнасці дадаць у бігас паўкеліха чырвонага сухога віна, ад высокай тэмпературы алкаголь хутка выпарыцца, затое страва займее апетытны колер, стане смачней, а водар будзе больш насычаны.

Падаем бігас у хлебнай форме, не зашкодзіць дадаць лыжку смятаны як упрыгожанне. Такой падачай вы здзівіце сваіх родных і сяброў нават падчас святочнай вячэры, а водар і смак стравы нікога не пакінуць абыякавымі. Смачна есці!

Нам спатрэбяцца:
Капуста свежая — 700 грамаў
Каўбаскі хатнія — 450 грамаў
Капуста кіслая — 300 грамаў
Цыбуля — 300 грамаў
Бачок вэнджаны — 300 грамаў
Каўбасны і грыбны булён — па 200 мл
Віно сухое чырвонае — 100 мл
Сухія грыбы — 100 грамаў
Перац — чайная лыжка
Соль — сталовая лыжка
Лаўрушка — 5 лісткоў
Хлеб чорны — бохан
Смятана — сталовая лыжка

#КухняБеларусі
#ХвілінкаГумару

Пра сакрэтны інгрыдыент дранікаў

Крыніца відэа тут
https://www.tiktok.com/@zinger.by?_t=ZS-8totIZHxHGB&_r=1

#КухняБеларусі

Жур — адзін з найбольш старажытных тыпаў супу ў беларускай, польскай, украінскай і літоўскай кухнях.

Спачатку гэта быў злёгку кіслявы суп, больш падобны да поліўкі, які варылі з аўсянай, грэчневай, жытняй мукі.
Закваску для журу раней рыхтавалі загадзя і называлі «белым баршчом». Рабілі закваску ў два этапы. Спачатку муку залівалі гарачай вадой, дадавалі хлеб, затулялі і ставілі ў цёплае месца на 3-5 дзён, калі ўзнікала цвіль — яе выдалялі, а атрыманую закваску працэджвалі і на ёй варылі жур.

У розны час і ў розных рэгіёнах пераважалі тыя ці іншыя тыпы журу, адзінага рэцэпту не было, яны пастаянна трансфармаваліся. З цягам часу ў жур пачалі дадаваць гародніну, варыць яго на грыбах ці мясе.