የቅድመ ክፍያ ስማርት ቆጣሪዎች ትግበራ መጀመሩ ተገልጿል።

የኢትዮጵያ ኤሌክትሪክ አገልግሎት ለቅድመ ክፍያ ቆጣሪ ተጠቃሚ ደንበኞች በዩኒፋይድ ፕሪፔይመንት ፕሮጀክት የኤስ ቲ ኤስ ስማርት ነጠላ ፈዝ ቆጣሪዎችን ተግባራዊ እያደረገ እንደሚገኝ ገልጿል።

አሁን ላይ ለፕሮጀክቱ ትግበራ የሚያበቁ ሁሉም አስፈላጊ ዕቅዎች ወደ ሀገር ውስጥ መግባታቸውንና 2 ሺህ 55 አዲስ ስማርት ነጣላ ፌዝ ቆጣሪዎች የመግጠም ስራ መከናወኑን አገልግሎቱ ለቲክቫህ ኢትዮጵያ በላከው መግለጫ ጠቅሷል።

በዚህም ደንበኞች ስልካቸውን ብቻ በመጠቀም ካሉበት ቦታ ሆነው የቶከን ቁጥር በቴሌ ብር እና በሌሎች የክፍያ አማራጮች በመግዛት ኤሌክትሪክ መጠቀም እንዲችሉ ያስችላቸዋል ነው የተባለው።

በአዲስ አበባ ቆጣሪ የተገጠመባቸው አካባቢዎች፦

- ባልደራስ ኮንዶሚኒየም፣ ፈረስ ቤት እና የካ ሳይት 100 ቆጣሪዎች፣

- ባቱ እና መካኒሳ ኮንዶሚኒየም 1 ሺህ 432 ቆጣሪዎች፤

- ሲ ኤም ሲ ልዩ ቤቶች ጀርባ የመከላከያ ቤቶች 523 ቆጣሪዎች ናቸው፡፡

አገልግሎቱ እንዳስታወቀው በአጠቃላይ በዩኒፋይድ ፕሪፔይመንት ፕሮጀክት 500 ሺህ የቅድመ ክፍያ ቆጣሪዎችን በዘመናዊ ቅድመ ክፍያ ቆጣሪዎች ለመቀየር ታቅዷል።

አሁን ላይ ከ500 ሺህ ቆጣሪዎች ውስጥ 125 ሺህ በመላው ሀገሪቱ ለሚገኙ ለሶስት ፌዝ ቆጣሪ ተጠቃሚ ደንበኞች ሙሉ በሙሉ ለመቀየር ዝግጅት እየተደረገ ሲሆን፤ 25 ሺህ ነጠላ ፌዝ ስማርት ቆጣሪዎች ደግሞ አዲስ አበባ ለሚገኙ ደንበኞች እየተቀየረ ይገኛልም ብሏል፡፡

#TikvahEthiopia
#EEU

@tikvahethmagazine

በወንድሟ ጓደኛ ታግታ የነበረችው ታዳጊ ከ14 ቀን በኋላ ማስለቀቁን ፖሊስ አስታወቀ።

በኮሬ ዞን ሳርማሌ ወረዳ የ11ኛ ክፍል ተማሪ የነበረችው መቅደስ ሀይሌ፥ የወንድሟ ጓደኛ በሆነው ግለሰብ ተጠልፏ ከነበረችበት ከ14 ቀን በኋላ ማስለቀቁን የወረዳው የፖሊስ ጽ/ቤት ለቲክቫህ ኢትዮጵያ ገልጿል።

የግል ተበዳይ መቅደስ ኃይሌን ያገታት ግለሰብ የወንድሟ ጓደኛ ስለነበር ፎቶዋን ከወንድሟ ስልክ ካየ በኋላ ለሷ መደወል እንደጀመረና ልጅቱ ግን እንደማትፈልገው እንደገለጸችለት የጽ/ቤቱ አዛዥ ተወካይ ረዳት ኢንስፔክተር ደረሰ ቡና ተናግረዋል።

ከዚህም በኋላ ወንጀለኛው ከ6 ግብረ አበሮቹ ጋር በመሆን ከትምህርት ቤት ስትወጣ ጠብቆ እንዳገታት፤ ከዛም በሳርማሌ ወረዳ ጉምሬ በሚባል ሥፍራ ሰው በሌለበት ጫካ ውስጥ ወስዶ ለ14 ቀን ማገቱን ያግታታል።

ረዳት ኢንስፔክተር ደረሰ ልጅቱ በታገተችበት ወቅት ለ3 ጊዜ ያክል ለማምለጥ ሙከራ ብታደርግም በተደጋጋሚ እየተያዘች ማምለጥ አለመቻሏን ተናግረዋል።

"ፖሊስ በደረሰው ጥቆማ መሰረት ልጅቱ ታማለች ወደ ጤና ጣቢያ ሊወስዳት ነው ተብለን  ትናንት ሌሊት 10 ሰዓት ክትትል ብናረግም ልጅቱን የጤና ባለሙያ ዘመዱ ጋር ወስዷት ስለነበር ምንም ነገር አላገኘም" ሲሉ ነው የተናገሩት።

አክለውም፥ "ዛሬ ጠዋት 2:30 ሰዓት አካባቢ በሞተር  በሌላ መንገድ ሊያመልጥ ሲል ክትትል አድርገ ጎሞሮ ቀበሌ ወንዝ ላይ ሲደርስ ወደ ሰማይ 4 ጊዜ ጥይት ተኩሰን ልጅቱን ከእገታው ከ14 ቀን በኋላ ማስለቀቅ ችለናል አጋቹ ግን አምልጧል" ነው ያሉት።

ልጅቱ ከአገቷት 6 ልጆች 3 ብቻ እንደመታቅ ለፖሊስ መረጃ በሰጠችው መሰረት ክትትል እያደረገ መሆኑን የገለጸው ፖሊስ ዋናው ተጠርጣሪ በቁጥጥር ስር አለመዋሉን አስታውቋል። ለፖሊስ በጥቆማ ከደረሰው መካከል አንዱን ተጠርጣሪ በቁጥጥር ሥር ማዋሉንም አስረድቷል።

አሁን ላይ ልጅቱ ጤናዋና አካሏ ላይ ጉዳት እንደረሰባት ወይም እንዳልደረሰባት ለማወቅ ምርመራ አድርጋ ውጤት እየጠበቅን ነው ሲሉ ረዳት ኢንስፔክተር ደረሰ ቡና ለቲክቫህ ኢትዮጵያ ገልፀዋል።

#TikvahEthiopia

@tikvahethmagazine

ተማሪዎችን በነፃ አስተምሮ ሥራ እያስቀጠረ ያለው ኮሌጅ

በኤልጂ ኤሌክትሮኒክስ በምስራቅ አፍሪካ አዲስ የተሾሙት ፕረዚዳንት ዶንግሁን ሊ የመጀመሪያ ጉብኝታቸውን በኢትዮጵያ ኤልጂ ኮይካ ሆፕ ቴክኒክና ሙያ ትምህርትና ስልጠና ኮሌጅ በመገኘት ጀምረዋል።

በትላንትናው ዕለት ጉብኝታቸውን በኮሌጁ ያደረጉት ፕረዝዳንቱ የኤልጂ ኤሌክትሮኒክስ ምርት የሆኑ150 እስክሪኖችን በስጦታ መልክ አበርክተዋል።

ኤልጂ ኮይካ ሆፕ ቴክኒክና ሙያ ትምህርትና ስልጠና ኮሌጅ በየአመቱ 100 ብቁ የሆኑ የሙያና ተግባር ተማሪዎች በነፃ ኮሌጁ እያስተማረ ስራ እያስቀጠረ መሆኑን የኮሌጁ ዲን አቶ ታሪኩ ገብረ መድህን ለቲክቫህ ኢትዮጵያ ገልጸዋል።

ባለፉ 10 ዓመታት ከ6 መቶ በላይ ተማሪዎችን ማስመረቅ የቻለው ኮሌጁ ካለፈው ዓመት ተመራቂዎች ውስጥ 90 በመቶ፣ ከ2 ዓመት በፊት ከተመረቁት ደሞ 100 ፐርሰንት የሥራ እድል እንዲያገኙ ማስቻሉን ተናግረዋል።

የሥራ ዕድል በዋነኝነት ለተማሪዎቹ በሦስት መንገድ እንዲያገኙ እየተመቻቸ መሆኑን የገለጹት አቶ ታሪኩ፥ እንደ ዱባይ፣ ኬንያ፣ ጂቡቲ፣ ሳውዲ አረቢያና ሞሪሼስ ላይ የስራ እድል በማመቻቸት እንዲሁም በራሳቸው ሥራ ፈጥራው እንዲሰሩ እንዲሁም የሀገር ውስጥ ድርጅቶች ውስጥ እንዲቀጠሩ እያረገ መሆኑን ገልፀውልናል።

ቀደም ሲል በኮሌጁ በተማሪነት አሁን ደግሞ በሾፕ ቴክኒሻን ሥራ መደብ እያገለገለች የምትገኘው በረከት ደርብ ኮሌጁ ተማሪ የመሆን እድል ያገኘችው የኮሪያ ዘማች ቤተሰብ ስለሆነች እንደሆነ ትገልጻለች።

ተማሪ በነበረችበት ጊዜም ትምህርት፣ ምሳና ትራንስፖርት በነፃ እንዳገኘች፣ ክላስ የተማሩትን ባሉት የተለያዩ መሳሪያዎች በተግባር እንደሚማሩ፣ ሲመረቁ ሙሉ ወጭ ተሸፍኖ ፕሮጀክት እንደሚሰሩ እንዲሁም ጥሩ ውጤት ላለው ተማሪ ደሞ ከሀገር ውስጥ እስከ ሀገር ውጭ ስራ ኮሌጁ አመቻችቶልናል ብላለች።

ኮሌጁ በአሁኑ ሰአት በ2 ትምህርት አይነቶች ከ250 በላይ ተማሪዎችን እያስተማረ ሲሆን ከ20 በላይ ስታፍ  ሰራተኞችና ከ25 በላይ አሰልጣኞች አሉት።

#TikvahEthiopia

@tikvahethmagazine

በሰመራና ሎጊያ ከተማ ያሉ አሽከርካሪዎች በቤንዚን እጥረት መቸገራቸውን ገለጹ።

በአፋር ክልል ሰመራና ሎጊያ ከተማ በርካታ አሽከርካሪዎች ቤንዚን በከተማዋ ባሉ ማደያዎች በሕጋዊ መንገድ ማግኘት ባለመቻላቸው፣ በሕገወጥ መንገድ በችርቻሮ ከሚሸጡ የጥቁር ገበያ ነጋዴዎች በሊትር እስከ 300 ብር ለመግዛት ተገደናል ሲሉ ቅሬታ አቅርበዋል።

በነዳጅ ዕጦትና በጥቁር ገበያ ችግር በአመዛኙ ተጎጂ የሆኑትና ለከተማዋ የሕዝብ የትራንስፖርት ዋነኛ አማራጭ ናቸው የሚባሉት ባለሦስት እግር ባጃጆች እና ሞተሮች ናቸው።

በመሆኑም የሰመራ ከተማ የባጃጅ አሽከርካሪ የሆኑት አቶ አብዱል ኖሮ ቤንዚን እስካሁን በብር እስከ 170 ነበር የምንገዛው አሁን ግን ቤንዚን ጠፍቷል በመባሉ  ከጥቁር ገበያ በብር ከ180 እስከ 300 እየገዛን ነው ሲሉ አስተያየታቸውን ለቲክቫህ ሰጥተዋል።

በተጨማሪም "ወደ ከተማችን ማደያዎች ቤንዚን ሲገባ እናያለን ነገር ግን ከገባ ከሁለት ቀን ቡኋላ አልቋል ነው የሚሉን" ሲሉም ተናግረዋል።

በተደጋጋሚ ለክልሉ ንግድ ቢሮ ቅሬታዎችን አቅርበናል ያሉት አቶ አብዱል ሁሌም መፍትሄ እንሰጥሀቹኋለን ከማለት የዘለለ ምንም መፍትሄ እያገኘን አይደለም ብለዋል።

የነዳጅ ስርጭቱን እና አቅርቦቱን በተመለከተ የክልሉን ንግድ ቢሮ ክትትል እና ቁጥጥር ዳይሬክተር አቶ አብዱ አሊን ጠይቀናል።

በክልሉ ከፍተኛ የሆነ የነዳጅ አቅርቦት እጥረት  መኖሩን ዳይሬክተሩ የተናገሩ ሲሆን በተለይም ሰመራ፣ ሎጊያ ፣ አዋሽ አርባ እና አዋሽ ሰባት በሚፈለገው ልክ ለአሽከርካሪዎች በቂ የሆነ ቤንዝን እያገኘን አይደለም ሲሉ ገልፀዋል።

ዳይሬክተሩ ችግሮች የተፈጠሩት በአቅርቦት ማነስ እና በከተሞች የ3 እግር ተሽከርካሪዎች ቁጥር በመጨመሩ መሆኑን አስረድተዋል።

ከተሽከርካሪዎች ቁጥር ጋር ወደ ክልላችን የሚገባው የቤንዚን አቅርቦት አይመጣጠንም ይህም ለህገወጥ ንግድ በር ከፋች ነው ብለዋል።

አክለውም ወደ ክልሉ የሚገቡት ነዳጆች  በሶስት በአራት ማደያዎች ይራገፋሉ ሁሉም ማደያ የሚገባውን ያክል ያገኛል ማለት ግን አይቻልምም ። ምክንያቱም ነዳጅ በአራት በአምስት ቀን ነው የሚላክልን ብለዋል።

ቤንዚን ደግሞ በሰመራ ፣ ሎጊያ እና ጋላስ በሚወርድበት ጊዜ ሙቀት ከመሆኑ ጋር ተያይዞ እንደሌሎቹ አካባቢዎች በሚፈለገው ስዓት መቅዳት አይቻልም፤ ይህም ለችግሩ መባባስ ዋነኛ ምክንያት ነው ሲሉ ተናግረዋል።

ቅሬታ አቅራቢ አሽከርካሪዎች ''በክልሉ 1 ሊትር ቤንዚን በብር ከ180 እስከ 300  እየተሸጠ ነው''  ሲሉ ላቀረቡት ቅሬታ የክልሉ የንግድ  ክትትል እና ቁጥጥር ዳይሬክተር  አቶ አብዱ አሊ ምን አስተያየት ሰጡ

'' በህገወጥ መንገድ  በአንዳንድ ቦታዎች ሊሸጥ ይችላል። ነገር ግን በዚህን ያክል  የተጋነነ ዋጋ ይሸጣል የሚለውን እስካሁን በተጨባጭ አላየንም ሲሉ ምላሻቸውን ሰጥተዋል።

አክለውም ህገወጥ ቸርቻሪዎች ከማደያዎች ምንም አይነት ነዳጅም ሆነ ቤንዚን አይወስዱም ብለዋል።

ዳይሬክተሩ በአዋሽ አርባ አካባቢ ህገወጥ የቤንዚን ንግድ ለማካሄድ በተለያዩ ጫካዎች ጀርካዎችን በማዘጋጀት ላይ እያሉ ግለሰቦች በፖሊስ ተይዘዋል ያሉ ሲሆን ሰመራ ከተማም  ተመሳሳይ ሂደቶች ላይ የነበሩ ግለሰቦች በማህበረሰቡ ጥቆማ ተይዘዋል ብለዋል።

የክልሉ ንግድ ቢሮ ችግሩን በዘላቂነት  ለመቅረፍ  ከማደያ ባለቤቶች ጋር በመነጋገር እና ግብረ ሀይል በማቋቋም እየሰራ መሆኑን አብራረተዋል።

ከዚህ በፊት በአዋሽ አርባ መሰል ችግሮች ነበሩ ያሉት ዳይሬክተሩ አሁን ላይ ሙሉ በሙሉ ችግሮች መቀረፋቸውን ገልፀዋል።

አያይዘው የቤንዚን እጥረት ባለባቸው ከተሞች በጥቃቅን እና አነስተኛ የተደራጁ ወጣቶችን በማህበር በማደራጀት ማደያዎችን በመገንባት ችግሩን በዘላቂነት ለመፍታት እየተሰራ መሆኑን ጠቁመዋል።

ክልሉ ከነዳጅ ባለስልጣን ጋር በመነጋገር ችግሩን ለመቅረፍ የነዳጅ አቅርቦት እያስጨመረ ነው። ያም ሆኖ ግን አሁንም በቂ አይደለም ብለዋል።

በህገወጥ መንገድ ከዚህ በፊት ቤንዚን ጭነው ሊያከፋፍሉ የነበሩ  ቦቴዎች ከተደበቁበት በክልሉ ንግድ ቢሮ እና የፀጥታ አካላት  ተይዘው እርምጃዎች ተወስደዋል አሁንም እየወሰድን ነው ሲሉ አክለዋል።

ከአንድ ማደያ ጀርባ ተደብቆ 3200 ሊትር በብር ከ250 ሺህ በላይ የሚገመት  ቤንዚን ሲሸጥ የነበረ  ግለሰብ በክልሉ ፖሊስ ተይዞ በህጉ አግባብ እርምጃዎችን ለመውሰድ በሂደት ላይ ነው ሲሉ ተናግረዋል።

በመጨረሻም በህገወጥ ንግድ ላይ የተሰማሩ አካላትን በህግ ተጠያቂ ለማድረግ ማህበረሰቡ ለፀጥታ አካላት እና ለክልሉ ንግድ ቢሮ ጥቆማ በመስጠት እንድትተባበር መልዕክት አስተላልፈዋል።

#TikvahEthiopia

@tikvahethmagazine

200 ካሬ በሆነ የእርሻ መሬት ላይ የካናቢስ ዕጽ ሲያመርቱ የነበሩ ተጠርጣሪዎች ተያዙ

በደቡብ ኢትዮጵያ ክልል ኮሬ ዞን ጎርካ ወረዳ ላንቴ ተብሎ በሚጠራዉ አከባቢ በእርሻ ማሳ ካናቢስ የተባለውን አደንዛዥ ዕፅ ሲያመርቱ የነበሩ ግለሰቦችን ከነ ኤግዚቢቱ በቁጥጥር ስር ማዋሉን የዞኑ ፖሊሲ መምሪያ አስታዉቋል።

የኮሬ ዞን ፖሊስ መምሪያ የመረጃና ኢንተለጀንስ ዲቪዥን ኃላፊ ዋና ሳጅን ሙሉቀን ጋሞ ለቲክቫህ ኢትዮጵያ እንደገለፁት ተጠርጣሪዎቹ አቶ በላቸው በረሱ እና እልኩ ደፋር የተባሉ ግለሰቦች ሲሆኑ እጹን ሲያመርቱ የተገኙትም በጎርካ ወረዳ ጎልቤ ቀበሌ ላንቴ ተብሎ በሚጠራዉ አከባቢ እንደሆነ ጠቅሰዋል።

ተጠርጣሪዎቹ፥ 10 በ 20 በሆነ የእርሻ መሬት ላይ ዕፁን ሲያመርቱ ከሕብረተሰቡ በደረሰ ጥቆማ አስፈላጊዉን  ክትትል በማድረግ ከነ ኤግዚቢቱ በቁጥጥር ማዋላቸዉንም ተናግረዋል።

ከምርመራና ክስ ሂደቱ ጎን ለጎን ከግሌሰቦቹ ጋር በዕፅ ዝዉዉሩም ሆነ የአቅርቦት ተስስር ግንኘነት ያላቸዉን ሰዎች የመከታተልና በሕብረተሰቡም ዘንድ ግንዛቤ የማስጨበጥ ሥራዉ ተጠናክሮ እንደሚቀጥልም አስታውቀዋል።

የደቡብ ኢትዮጵያ ክልል ፖሊስ ኮሚሽን ህዝብ ግንኙነት ዳይሬክተር ምክትል ኮማንደር አሸናፊ ሀይሌ በበኩላቸው አንድ ኩንታል ካናብስ በቲቢኤስ ሞተር ሳይክል ተጭኖ በቁጥጥር ሥር መዋሉን ጠቅሰዋል።

እስከ እርሻ ማሣ በተደረገው ኦፕሬሽንም '' አራት ክምር በአጠቃላይ እስከ 120 ኪ.ግ  የሚመዘን ካናብስ አደገኛ ዕፅ በመያዝ የምርመራ ሂደት እየተጣራ '' መሆኑን አብራርተዋል።

የፌደራል ፖሊስ መረጃና ደህንነት፣ የብሔራዊ መረጃና ደህንነት እንድሁም የኮሬ ዞን ፖሊስ መምሪያ መረጃና ኢንቴለጄንስ ዲቪዥን በጋራ በመቀናጀት አደንዛዥ ዕፁን ከነተጠርጣሪዎቹ በቁጥጥር ስር ማዋል እንደተቻለ ኮማንደር አሸናፊ ለቲክቫህ ኢትዮጵያ ገልፀዋል።

ይህ ህገ ወጥ ተግባር በሀገር ኢኮኖሚ ላይ ክሳራ የሚያስከትልና ወጣቶችን ወደ አላስፈላግ ወንጀል የሚመራ በመሆኑ ህብረተሰቡ ጥንቃቄ እንድያደርግ አሳስበዋል።

#TikvahEthiopia

@tikvahethmagazine

በጂንካ ከተማ አንዲት እናት 4 ልጆችን በአንድ ጊዜ ተገላገለች።

° ''ልጆቹን እማሳድግበት የገቢ ምንጭ ባይኖረኝም ፤እግዚአብሔር ግን 4 ልጆች ስለሰጠኝ በጣም ደስተኛ ነኝ'' ወላጅ አባት

በጂንካ ከተማ  በትላንትናው ዕለት የካቲት 18 አንዲት እናት በአንድ ጊዜ አራት ልጆችን በሰላም መገላገሏን የጂንካ አጠቃላይ ሆስፒታል አስታውቆ ነበር።

እናት ሁለት ወንድና ሁለት ሴት ልጆችን በሆስፒታሉ መውለዷን የሆስፒታሉ ዋና ስራ አስኪያጅ ዶክተር ሚስጥሩ ሀምዴክ ለቲክቫህ ኢትዮጵያ አረጋግጠዋል።

ህጻናቱ አሁን በምን ጤንነት ላይ ይገኛሉ ስንል ላቀረብንላቸው ጥያቄም ከአራቱ አንዷ ጨቅላ ትንሽ ኪሎዋ አነስ ስላል በአይ.ሲ ክፍል ውስጥ ክትትል እየተደረገላት ከመሆኑ ወጭ ሌሎች ህፃናት በጥሩ ጤንነት ላይ ናቸው ሲሉ ነግረውናል።

ዶ/ር ሚሥጢሩ አክለውም፥ እናትም በጥሩ ጤንነት ላይ ናት እንደምትገኝ እና ልጆቿን በኦፕራሲዮን በመወልዷ በትንሹ እስከ 3 ቀን በሆስፒታሉ ክትትል እየተደረገላት እንደምትቆይ አስረድተዋል።

ሆስፒታሉ አገልግሎት መስጠት ከጀመረ ጊዜ ጀምሮ እንዲህ አይነት ነገር ሲያጋጥም የመጀመሪያ መሆኑንም የሆስፒታሉ ዋና ስራ አስኪያጅ ለቲክቫህ ኢትዮጵያ አስረድተዋል።

የልጆቹ ወላጅ አባት ምን አሉ?

የእነዚህ አራት ልጆች አባት አቶ አንጁሎ አዲስ ይባላል። ባለቤቱ 4 ልጆች ስለተገላገለችበት፤ እሱም የአራት ልጆች አባት ስለሆነበት አጋጣሚ ለቲክቫህ ኢትዮጵያ ገልጿል።

ባለቤቱ አራት ልጆች እንዳረገዘች እስክትወልድ ድረስ የሚያውቁት ነገር እንዳልነበረና አራት ልጅ መሆኑን ሆስፒታል ከደረሱ በኋላ መስማታቸውን ነው የነገረን። ይህንን ሲያቅም ደስታ እና ድንጋጤ የተቀላቀለበት ስሜት ተሰማኝ ብሏል።

ከጂንካ ራቅ ብሎ በሚገኝ በቦታ እንደሚኖሩ የገለጸው አቶ አንጁሎ፤ ወደ ጂንካ የመጡትም ለህክምና ክትትል እንደሆነ ነው የገለጸው።

በትዳራቸው እነዚህ አራት ልጆች የመጀመሪያ እንዳልዎኑ የሚናገረው አባት ከዚህ በፊት አንድ ልጅ መውለዳቸውንና እድሜውም አሁን ላይ የ4 ዓመት እንደሆነው ጠቅሷል።

"ልጆቹ ትንሽ ሰውነታቸው ቀጫጫ ከመሆኑ ውጭ ደህና ናቸው። እናታቸው ማርታ ታከለም ጡቷ ወተት እንደፈለገ አሁን ላይ አይወጣትም እንጂ እሷም ጥሩ ሁኔታ ላይ ትገኛለች" ሲል አሁን ስላሉበት ሁኔታ አስረድቶናል።

"እኔ አሁን ልጆቹን እማሳድግበት የገቢ ምንጭ ባይኖረኝም፤ እግዚአብሔር ግን 4 ልጆች ስለሰጠኝ በጣም ደስተኛ ነኝ እግዚአብሔር ይመስገን" ሲል ለቲክቫህ ኢትዮጵያ ተናግሯል።

በተፈጥሮ በአንድ ጊዜ አራት ህጻናትን መጸነስ የሚከሰተው ከ700ሺ እርግዝናዎች በአንዱ ላይ እንደሆነ መረጃዎች ይጠቁማሉ።

#TikvahEthiopia

@tikvahethmagazine

🔉 #የነዋሪዎችድምጽ

➤ " የ50 ብር መንገድ ከ150 እስከ 200 እየከፈልን ነው፣ የኑሮ ውድነቱን አልቻልነውም፣ አሽከርካሪዎችን የሚቆጣጠራቸው የለም " በመተከል ዞን ወንበራ ወረዳ ደብረዘይት ከተማ  ነዋሪዎች

➤ " እኛ ምን እናድርግ ነጋዴዎች የሥራ ቦታቸውን ዘግተዋል፣ ከጥቁር ገበያ ደግሞ 1ሊትር እስከ 400 ብር ነው የምንገዛው "አሽከርካሪዎቹ

➤ " ችግሩ አለ፣ ማህበረሰቡ እየተባበረን ስላልሆነ ቁጥጥሩን ትተነዋል " የወንበራ ወረዳ ትራንስፖርት ሃላፊ

የመተከል ዞን ወንበራ ወረዳ ደብረዘይት ከተማ እና የሰንኮራ ቀበሌ ነዋሪዎች የ9 ኪሎሜትር መንገድ ለባጃጅ ከ150 እስከ 200 ብር ለባለ ሁለት እግር ተሽከርካሪዎች ደግሞ ከ300 እስከ 400 እየከፈልን ስለሆነ ችግር ውስጥ ወድቀናል ሲሉ ለቲክቫህ ቅሬታቸውን አሰምተዋል።

ነዋሪዎቹ የከተማዋ መንገድና ትራንስፖርት ቢሮ እና የትራፊክ ፖሊሶች ችግሩን ሊቀርፉልን ባለመቻላቸው ትልቅ አደጋ ውስጥ ወድቀናል ሲሉ ተናግረዋል።

ነዋሪዎቹ ያሉበትን ችግር ለቲክቫህ እንደሚከተለው ገልፀዋል፦

ስማቸውን መግለፅ ያልፈለጉት የሰንኮራ ቀበሌ አንደኛ ደረጃ ትምህርት ቤት መምህር  "አሁን ላይ ችግሮቹ ከአቅማችን በላይ ሆነዋል፣ የባጃጅ እና የባለ ሁለት እግር አሽከርካሪዎች የመንግስት ሰራተኛ አይከፍልም " ቢከፍልም መረጃ አሳልፎ ይሰጣል " በማለት የትራንስፖርት አገልግሎት እየከለከሉን ነው " ብለዋል።

አክለውም ባጃጆች ከ200 ኪሎ ግራም በላይ የሚመዝን እቃ ከጫኑ በኋላ 7 ሰው ደግሞ ያሳፍራሉ፣ ይህ ደግሞ ለአደጋ ያጋልጣል። ትራፊክ ፖሊሶችም እየተቆጣጠሩልን አይደለም።

ሀብታም ያልሆነ ሰው በከተማዋ መኖር ከብዶታል፣ እኔ ቤተሰብ አስተዳዳሪ ነኝ ፣ የሚከፈለኝ ወርሃዊ ደመወዝ ነው፣ የትራንስፖርት ብር ሳወጣ ቤተሰቦቸን ችግር ላይ ጥያቼዋለሁ ፣ የሚሰማን አካል ካለ " ኡኡ " እያልን ነው። እባካችሁ ስሙን ሲሉ ያሉበትን ጭንቀት እና ችግር አስረድተዋል።

የባጃጅ አሽከርካሪዎች ምን አሉ?

" በየጊዜው የቤንዚን ዋጋ ይጨምራል፣ የምንገዛው ከጥቁር ገበያ 2ቱን ሊትር በ800 ብር ነው፣ መንገዱ አይመችም፣ የምናወጣው ወጪ ከምንሰራው በላይ ሆኖብናል " ሲሉ ገልፀዋል።

አያይዘውም  "በከተማችን ማደያ የለም፣ ፍቃድ አላቸው የሚባሉ ነጋዴዎችም ቤንዚን የለም ነው የሚሉን፣ ከዛም አልፎ ሥራ ቦታቸውን ዘግተዋል፣ ቤንዚን ሲመጣላቸውም 2 ሊትር በ450 ብር ነው የሚሸጡልን " ብለዋል።

በተጨማሪም " ቤንዚን በጥቁር ገበያ ሲቸበቸብ እንመለከታለን፣ አብዛኛው አሽከርካሪ ቤንዚን ሲመጣ በበርሜል ገዝቶ ያስቀምጣል፣ ብዙ መግዛት ያልቻለ ከጥቁር ገበያ ነው የሚገዛው፣ ትክክለኛ ታሪፉ 50 ብር ነው፣ ነገርግን ስለማያዋጣ ሞተረኞች አሁን ላይ ከ300 እስከ 400 ብር ሲያስከፍሉ እየተመለከትን ነው፣ እኛም እንደየሰው አቅም ከ100 እስከ 200 ብር እናስከፍላለን "  ሲሉ አስረድተዋል።

በጉዳዩ ላይ የወንበራ ወረዳ ትራንስፖርት ሃላፊ አቶ ደሳለኝ ጉርሜሳ ምን አሉ?

ኃላፊው ችግሩ እንዳለ እናውቃለን ሲሉ የገለጹ ሲሆን ማኅበረሰቡን ባወያዩበት ወቅትም "ተውን እየከፈልን ትራንስፖርት እናግኝ" የሚል ምላሽ ከተሰብሳቢው ማግኘታቸውን በመጥቀስ ችግሩ ለእነሱም አስቸጋሪ እንደሆነባቸው ይገልጻሉ።

"ቁጥጥር በምናደርግበት ሰዓትም 150 እና ከዚያ በላይ ከፍለው ስንጠይቃቸው 50 ብር ነው የከፈልነው እያሉ ህገወጦችን እየደበቁብን ነው፣ እኛም ስራችንን ለመስራት እየተባበሩን ስላልሆነ ቁጥጥሩን #ትተነዋል" ሲሉ ነው የተናገሩት።

ኃላፊው ቤንዚን በከተማው አለመኖሩንና ነጋዴዎች ከአማራ ክልል ከጥቁር ገበያ ነው በማምጣት እንደሚሸጡ ተናግረዋል። አክለውም በከተማችን ለሚስተዋለው የትራንስፖርት አገልግሎት ችግር መባባስ አማራጭ ተሽከርካሪዎች ባለመኖራቸው ነው ብለዋል።

#TikvahEthiopia

@tikvahethmagazine