#сво #СВОихНеБросаем

🔴 Үөһээ Бүлүү кусчуттара госпитальга көмө ыыттылар

Москва куоракка бааһырыыны ылбыт байыастар эмтэниини ааһар госпиталларыгар анаан Үөһээ Бүлүү кусчуттара кус хомуйан ыыттылар.

Бастаан бу кустар Дьокуускайга Арктикатааҕы агротехнологическай университекка тиксэриллэллэр. Онно барытын үргээн баран Москваҕа ыыталлар.

Саамай элбэх куһу - балтараа куулу Хоро нэһилиэгин кусчут эр дьоно биэрдилэр. Ону тэҥэ Тамалакаан, Ороһу, Үөһээ Бүлүү кусчуттара кыттыстылар.

Маннык үтүө санаалаах көмөнү сүүрэн-көтөн, бэлэмнээн ыытар Ороһу нэһилиэгин олохтооҕо Ольга Захарова Үөһээ Бүлүү балыксыттарыгар улаханнык махтанарын биллэрэр: "Балык көрдөөтүм да аҕала тураллар. Ол балыктар ыраастанан, буһарыллан, сороҕо тоҥнуу Украинаҕа инники кирбиигэ тиийэ бараллар уонна Хабаровскай, Уссурийскай, Москва госпиталларынан тиксэриллэллэр".

Истэ-билэ сылдьаргыт буолуо, балыксыттар түмсүүлэрин аатыттан сотору-сотору балык минньигэһин, күндүтүн хомуйан, Кыайыы туһугар киирсэ сылдьар байыастарбытыгар анаан-минээн ыыталларын.

Ону тэҥэ амарах дууһалаах дьон күүһүнэн хомуллубут көмүскэ тэҥнээх күндү аһы-үөлү босхо Дьокуускай куоракка диэри илдьэн биэрэр элэккэй, үтүө санаалаах таксистарга эмиэ махтал бастыҥын аныыр: "Босхо, гуманитарнай көмө диэтим даҕаны, аккаастаабакка эрэ улгумнук сөбүлэһэн ылар уолаттарга махталым муҥура суох. Хомойуох иһин, аккаастыыр таксистар эмиэ бааллар. Босхо диэн тылы истэн баран аккаастыыр аакка бараллар", - диэн хомойбут санаатын эмиэ этиннэ.

Хас биирдии хамсаныыбыт, тэрээһиннээх үлэбит дойдубут сэриитэ суох олоххо олорорун туһугар буоларын умнумуоҕуҥ.

Байыастар санааларын бөҕөргөтөр, эрэллэрин эрчимирдэр кыра да кэһии оҕото тиийэн-тиксэн үөрдэрин, дьоллуурун туһугар бары биир киһи курдук тэринэн көмөлөһүөҕүҥ, үлэлиэҕиҥ-хамсыаҕыҥ.

Маннык үтүө холобур буолар амарах санаалаах дьон баарын тухары өлөн-охтон биэриэхпит суоҕа. Саханы саха дэтэр киэҥ көҕүстэниҥ, охтон эрэри өйүүр кэтит сарыннаныҥ, аччыктаабыты аһынар, тоҥмуту ириэрэр амарах сүрэхтэниҥ🙌🙌🙌

Дойдубут Кыайыыга кэлиэҕэ! Онуоха эрэл улахан!

"Үөһээ Бүлүү" хаһыат