✊Дүпсүн уонна Суотту нэһилиэгин олохтоохторо анал байыаннай дьайыы кыттыылаахтарыгар көмөбүтүн туттардыбыт

Дьокуускай куорат строительнай ырыынагын быыстапкалыыр саалатыгар "Саха волонтёрдар", Строительнай уокурук тэрийиилэринэн "ВМЕСТЕ/БИИРГЭБИТ" дьаарбаҥка - быыстапка буолла.

Дьаарбаҥка сыала-соруга анал байыаннай дьайыыга сылдьан бааһырбыт байыастар госпитальга эмтэнэллэригэр көмө.
Манна араас оҥоһуктары, таҥаһы, аһы атыылаан, онтон киирбит үбү көмөҕө ыытарга анаатылар.

Биһиги Дүпсүнтэн үһүө буолан баран кыттыыны ыллыбыт. Ол курдук Бээдиттэн Варвара Слепцова, Василий Алексеев (суоппар) уонна Пелагея Соловьева. Уопсайа 9 куул, ол эбэтэр 103 устуука үс араас госпитальга олус наадалаах сыттыгы, таҥаһы, суунар тэрили, сылгы түүтүттэн оҥоһуллубут массаастанар мээчиктэри уонна оскуола оҕолоро байыастарга анаан Саҥа дьыллааҕы эҕэрдэлэрин, бастыҥ баҕа санааларын суруйбут суруктарын туттардыбыт.

Биһигини кытта биир сүбэнэн Суотту бөһүөлэгин олохтоохторо Екатерина Гоголева салалтатынан үлэлээтилэр. Кинилэр госпитальга 85 сыттыгы оҥорон, Орджоникидзе аатынан уулуссаҕа баар волонтёрскай пууҥҥа туттардылар.

Ыччаттарбыт этэҥҥэ сылдьан, эмсэҕэлээбиттэр үчүгэйдик эмтэнэн, дойдуларыгар бары этэҥҥэ кэллиннэр, бу иэдээннээх байыаннай дьайыы түргэнник бүтэрин туһугар бары бииргэ буолуоҕуҥ диэн билиҥҥи кэмҥэ барыбыт баҕа санаатын эттибит.

Этиибин өйөөн бу сыттыктары оҥорсубут Дүпсүн, Бээди, Суотту олохтоохторугар, техниканан хааччыйбыт дьаһалтабыт баһылыктарыгар Н.Н. Сивцевкэ, В.И. Ивановка уонна суоппардарбытыгар улахан махталбын тиэрдэбин.

✍ Пелагея Соловьёва, Дүпсүн нэһилиэгэ

✅ @uamurusahargata @ulusmedia

⏺ Уус Алдан улууһугар аҕыйаҕа суох археологическай хаһыы ыытыллыбыта, олортон аҕыйах түгэни сырдатан ааһыахпын баҕарабын.

Биир бастакынан, биһиги оройуоммутугар 1942 сыллаахха А.П. Окладников салайааччылаах археологическай экспедиция Суотту сиригэр Ымыйахтаах диэн сиргэ былыргы таас үйэтинээҕи дьон олоро сылдьыбыт стоянкаларын булбуттара, датировката хойукку таас үйэни көрдөрөр.

Биир дойдулаахпыт, үйэтин тухары Ярославскай аатынан краеведческай музейга научнай отделын сотруднигынан үлэлээбит Иван Новгородов Быйды диэн сиргэ 1944 сыллаахха археологическай хаһыы оҥорон, киһи өлүгүн аттыгар кириэскэ майгынныыр тимир сэби булан турар. Саамай дьиктитэ диэн, бу кыргыс сэбэ өлүк үрдүгэр сытара буолар.

2004 с. Танда сиригэр Табалаах диэн сиргэ хаһыы түмүгэр тэбиэҕэ хатырыктаах сиэрдийэлэринэн оҥоһуллубут үрүт туостардаах холбо иһигэр көмүү булуллубут, өлүк сүүһүгэр хайа охсуулаах, уҥа хараҕын үрдүнэн муос оноҕос дьөлө түһэн сорҕото көстөр эбит.

2005 с. Дүпсүн нэһилиэгин олохтооҕо Гаврил Иванович Прибылых сайылыгар бүтэй баҕанатын хаһа сылдьан киһи төбөтүн уҥуоҕар иҥнэн, тустаах үлэһиттэргэ биллэрэн, археологическай хаһыы оҥоһуллан, тимир кыырпаҕа көстөн эрдэтээҥҥи тимир үйэ кэмэ диэн археологтар түмүк оҥорбуттара.

2014 с. Арыылаах нэһилиэгин Хатырык үрүйэ диэн от үрэххэ Гуманитарнай чинчийэр институт үлэһиттэринэн 40-45 см дириҥҥэ киһи уҥуохтара булуллубуттара, сорох уҥуохтарга сытыы сэп суоллара көстөр эбит.

2018 с. Арыылаах эргин Ньымаайы диэн сиргэ ХVI-ХVII-с үйэтинээҕи көмүүнү булбутун суруйбут, иин дириҥэ киһи тобугунан (50-55 см), нуучча уонна атын култуура сабыдыала көстүбэт, былыргы сиэрдэр-туомнар көстөллөр эбит, өлүк уҥа хараҕар эчэйиилээх, өлүк аһылыга түөһүгэр ууруллубут.

2018 с. Сыырдаах уонна Арыылаах айан суолун икки ардыгар баар Айыы Тайбыт диэн сиргэ саха-французскай экспедиция үлэтин түмүгэр тумулга уотунан сиэтиилээх көмүү булуллубут, онно холбо иһигэр улаатан эрэр оҕо көхсүнэн сытар эбит.

✍️ Александр Сивцев, улуус түмэлин сотруднига

Сиһилии: мюрюгазета.рф👈

✅ @uamurusahargata @ulusmedia

👍 Чараҥ үөрэнээччилэрэ тхэквондо албастарыгар дьарыктаннылар

В.Н.Мигалкин аатынан Чараҥ орто оскуолатыгар, ахсынньы 15-16 күннэригэр, Хаҥалас улууһун ГБУ РС(Я) РСШОР старшай тренера Иван Александрович Самсонов уонна тренер Александр Дмитриевич Коркин, ону кытта Бэйдиҥэттэн Николай Иннокентьевич кэлэннэр тхэквондо курдук олимпийскай спорт биир көрүҥэр 2 күннээх маастар кылааһы уонна оскуолабыт оҕолоругар дьарыгы ыыттылар.

Араас күрэхтэргэ ситиһиилээх, Саха сирин, Уһук Илин эрэгийиэн чемпион оҕолорун илдьэ кэлэн спарринг көрдөрдүлэр.

Түмүккэ оскуола администрацията уонна Чараҥ оскуолатын физкультураҕа учуутала Захар Иванович тренердарга уонна ыалдьыт оҕолорго бэйэлэрин сэмэй бэлэхтэрин туттардылар.

Оттон ыалдьыттар дьарыкка кэтиллэр толору экипировканы, барыта 33 тыһыынча суумалаах форманы бэлэх уунан бардылар.
Минньигэстик аһаппыт, сылаастык хоннорбут оскуола коллективыгар барҕа махталларын тиэртилэр.

✍️ А.Е. Егоров

✅ @uamurusahargata @ulusmedia