#Update

የሳፋሪኮም ኢትዮጵያ የዓለም አቀፍ ጉዳዮችና የቁጥጥር ኃላፊ ሆነው ተሹመው ለ7 ወራት ያገለገሉት አምባሳደር ሄኖክ ተፈራ ከኃላፊነታቸው መልቀቃቸው ታውቋል። ኃላፊው ለመልቀቃቸው ምክንያት ትኩረት መስጠት በሚሻ የግል ጉዳያቸው የተነሳ መሆኑ ተጠቁሟል።

Credit : Capital , Addis Fortune

👋  @TikvahethMagazine

#CholeraUpdate: የአውሮፓ ህብረት በኢትዮጵያ የኮሌራ ወረርሽኝን ለመከላከል 1 ሚሊዮን ዩሮ እንደሚሰጥ አስታወቀ።

የአውሮፓ ህብረት በኢትዮጵያ የሰዎችን ህይወት እየቀጠፈ ላለው የኮሌራ ወረርሽኝ ቀጣይነት ያለው ሰብዓዊ ምላሽ ለመስጠት አንድ ሚሊዮን ዩሮ አዲስ የገንዘብ ድጋፍ እንደሚሰጥ አስታውቋል።

የአውሮፓ ህብረት ገንዘቡን የሚሰጠው ከድንገተኛ አደጋ ጊዜ መጠባበቂያ ፈንድ እንደሆነ ሲጠቀስ በህብረቱ የሰብአዊ መርሃ ግብር አካል ተደርጎ በሀገሪቱ በበሽታው በተጎዱ አካባቢዎችና በሀገሪቱ ውስጥ ለሚገኙ ተጋላጭ ማህበረሰቦች የሚውል እንደሆነ ተገልጿል።

የኮሌራ ወረርሽኝ በሀገሪቱ በግጭትና ከአየር ንብረት ጋር በተያያዘ ምክንያት ከፍተኛ የሰብአዊ ፍላጎት ባለባቸው አካባቢዎች እርዳታ መድረስ እንዳልቻለ ህብረቱ ሲጠቁም በ 2023 በኢትዮጵያ በግጭትና በድርቅ የተጎዱ ሰዎችን ለመደገፍ 82.5 ሚሊዮን ዩሮ ለኢትዮጵያ መስጠቱን የአውሮፓ ህብረት አስታውሷል።

በቅርቡ የተባበሩት መንግስታት የሰብአዊ ጉዳዮች ማስተባበሪያ ቢሮ (OCHA) ባወጣው መረጃ ፥ በኢትዮጵያ ከጥቅምት 12 ቀን 2016 ዓ.ም ጀምሮ በአፋር፣ በአማራ፣ በቤኒሻንጉል ጉምዝ፣ በመካከለኛው ኢትዮጵያ ክልል (CER) ፣ በሐረሪ፣ በሲዳማ፣ በሶማሌ፣ በደቡብ ኢትዮጵያ ክልል (SER) በድሬዳዋ ከተማ አስተዳደር እንዲሁም በ85 ወረዳዎች ከ24,700 በላይ ሰዎች የኮሌራ በሽታ እንደተገኘባቸው ተመዝግቧል።

👋  @TikvahethMagazine

በጎንደር፥ ኤች አይ ቪ በደማቸው ያለ ሰዎች በመድኃኒት እጦት ለችግር ተዳርገዋል ተባለ።

በጎንደር ከተማ 1ሺ 687 በላይ አባላት ያሏቸው ከኤች አይ ቪ ኤድስ ቫይረሰ ጋር የሚኖሩ ሰባት ማኅበራት ሲኖሩ፤ የበጎ አድራጎት ተቋማት የሚያደርጉት የገንዘብ፣ የመድሃኒትና የቁሳቁስ ድጋፍ በመቀነሱ ምክንያት ማኅበራቱ ለተለያዩ ችግሮች መጋለጣቸውን ሰምተናል።

በአካባቢው ተከስቶ በነበረው ወቅታዊ የሰላም እጦት ምክንያት በቂ የማራዘሚያ መድኃኒትና የኮንደም አቅርቦት በብቃት እየቀረበ ባለመሆኑ መቸገራቸውን ቲክቫህ ኢትዮጵያ ያነጋገራቸው የማኅበራቱ አባላት ተናግረዋል፡፡

ከማኅበራቱ አባላት መካከል የፍሬ ህይወት በጎ አድራጎት ማህበር ስራ አስኪያጅ አቶ ወርቁ ጎበዜ፥ አባላቱ ከዚህ ቀደም ለ2 ወራት ያገኙት የነበረው የፀረ-ኤች አይቪ ቫይረስ መድኃኒት በአቅርቦት ችግር ምክንያት አሁን በግማሽ ቀንሶ ለ1 ወር ብቻ እንዲያገኙ እየተገደዱ ነው ብለዋል።

መድኃኒቱን የሚያቋርጡ ሰዎች ለሞት እየተዳረጉ መሆኑን የገለፁት ሥራ አስኪያጁ፤ የኤች አይ ቪ ኤድስ ተጓዳኝ በሽታዎች መድኃኒት ሆስፒታል ላይ አለመገኘቱና መድኃኒቶች ከሆስፒታል ውጭ ላይ ሲገኙ ደግሞ ዋጋቸው ውድ በመሆኑ ለመጠቀም እየተቸገሩ መሆኑን አስረድተዋል፡፡

ለማኅበራቱ በቂ የኮንዶም ስርጭት የለም ያሉት አቶ ወርቁ፤ "በተለይ የማኅበሩ አባላት ኮንዶም ስለማይደርሳቸውና በቂ የገቢ ምንጭ ስለሌላቸው ከዚህ ጋር ተያይዞ ኑሯቸውን ለመደጎም ሴተኛ አዳሪነትን እንደ አማራጭ የሚመለከቱ መኖራቸው ለቫይረሱ ሥርጭት መስፋፋት ሰፊ በር ከፍቷል" ሲሉ ተናግረዋል፡፡

ከማኅበራት አባላት መካከል የወጋገን የሴቶች ማህበር አባል ወይዘሮ ከበቡሽ ውለታው  ደግሞ የማኅበሩ አባላት የመከላከያ ኮንዶም ባለመጠቀማቸው ከኤች አይቪ ነፃ የሆነ ሕፃን ለመውለድ የተጀመረውን ሥራ ፈታኝ እንዳደረገው ያነሳሉ።

የማኅበራቱ አባላት ያለባቸውን ማኅበራዊ ኃላፊነት ለመወጣት ከገጠር ወረዳዎችና ከተሞች ራሳቸውን እያጋለጡ የፀረ-ኤች አይቪ መድሃኒት እንዲጠቀሙ እየተደረገ ያለው ጥረት በመድኃኒቱ እጥረት ምክንያት አገልግሎቱን ማቋረጣቸውንም ተናግረዋል፡፡
     
በኮቪድና በወቅታዊ የሰላም ችግር ምክንያት ኤች አይ ቪ ኤድስን ለመከላከል የተሰጠው ትኩረት አናሳ መሆኑን የሚያነሱት በጎንደር ከተማ ጤና መምሪያ የኤች አይ ቪ ኤድስ መከታተልና መቆጣጠርና ግምገማ የስራ ሂደት አስተባባሪ ሲስተር ዘነበወርቅ ንጋቱ፥ የፀረ-ኤች አይ ቪ መድኃኒትና የኮንዶም አቅርቦት ችግር በከተማዋ መከሰቱን  ተናግረዋል፡፡

በቂ የኮንዶም ስር ጭትና የፀረ- ኤች አይ ቪ መድሃኒት ባለመኖሩ በርካታ ሰዎች በከተማዋ ለችግርና ለሞት እየተጋለጡ መሆኑንም ነው የጠቀሱት፡፡

ኤች.አይ.ቪ በኢትዮጵያ፣ በአዲስ መልክ እየተስፋፋ መሆኑ ሲነገር ቫይረሱ በፍጥነት እየተሠራጨ ካሉባቸው አካባቢዎች መካከል አንዱ የአማራ ክልል መሆኑን የጤና ሚኒስቴር መረጃ ያሳያል።

በሰሜኑ የሀገራችን ክፍል በነበረው ጦርነት ሳቢያ በክልሉ የኤች.አይ.ቪ/ኤድስ መድኃኒት ሲወስዱ የነበሩ 65ሺሕ ሰዎች መድኃኒታቸውን ማቋረጣቸው መነገሩ ይታወሳል። አሁን ላይ ያለው የሰላም እጦትም ችግሩን ያባብሰዋል ተብሏል።

መረጃው የተዘጋጀው በጎንደር የቲክቫህ ቤተሰብ አባል ነው፡፡

👋  @TikvahethMagazine

ከስደት ተመላሾች የዲጂታል መታወቂያ ባለቤት እንዲሆኑ የሚያስችል ስምምነት ተደረገ።

የኢትዮጵያ ብሄራዊ መታወቂያ ፕሮግራም (NIDP) እና የአለማቀፉ የፍልሰተኞች ድርጅት (IOM) ከስደት የሚመለሱ ዜጎችን በባዮሜትሪክስ ላይ በተመሠረተው ፋይዳ ዲጂታል መታወቂያ ተጠቃሚ ለማድረግ የትብብር ስምምነት ተፈራርመዋል።

ስምምነቱ፥ በሺዎች የሚቆጠሩ ኢትዮጵያውያን ስደተኞች በሰላም ህብረተሰቡን እንዲቀላቀሉ ከማስቻሉም በላይ ቀጣይነት ያለው የመልሶ ማቋቋም ስራን ለመስራት የሚያግዝ ነው ተብሏል።

የሁለቱ ወገኖች ጥምረት ከስደት የሚመለሱ ዜጎችን መመዝገብ፣ ማንነታቸውን የማጣራትና የማረጋገጥ ሲሆን ስምምነቱ በአገር ውስጥ ያሉ ተፈናቃዮችን የመመዝገብ ሂደት ላይ እንዲተባበሩ ጭምር የሚያስችላቸውም እንደሆነ ተገልጿል።

በኢትዮጵያ የIOM ዋና ኃላፊ አቢባቱ ዋኒ ስደተኞች ማንነታቸውን የሚገልፅ ሰነድና ማስረጃ ባለመኖሩ ምክንያት መሰረታዊ የማኅበራዊና ኢኮኖሚያዊ መብቶችን እንዲሁም አስፈላጊ ጥቅሞችን ለማግኘት መቸገራቸውን አንስተው ይህ አጋርነት ለስደተኞች፣ በሀገር ውስጥ ለተፈናቀሉ ሰዎችና ለተጎዱ ማህበረሰቦች ብሔራዊ ዲጂታል መታወቂያ እንዲያገኙ የሚያስችላቸው ነው ብለዋል።

IOM ባለፉት ጥቂት ሳምንታት ከጅቡቲ፣ ሊባኖስ፣ ከሳዑዲ አረቢያ ና የመን የተመለሱ ከ1,000 በላይ ስደተኞችን ለዲጂታል መታወቂያ እንዲመዘገቡ ማመቻቸቱ ሲገለፅ መታወቂያው ወደ ማህበረሰባቸው ሲቀላቀሉ አስፈላጊ አገልግሎቶችን እንዲያገኙ ይረዳቸዋል ተብሏል።

ኢትዮጵያ በ2026 ስደተኞችና የሀገር ውስጥ ለተፈፈናቃዮችን ጨምሮ ለ90 ሚሊዮን ዜጎች እና ነዋሪዎች ዲጂታል መታወቂያዎችን ለመስጠት መታቀዱን የኢትዮጵያ ብሄራዊ መታወቂያ ፕሮግራም (NIDP) ፕሮግራም ዋና ዳይሬክተር ዮዳሄ ዘሚካኤል ተናግረዋል።

👋  @TikvahethMagazine

#Update : የኢትዮጵያ ንግድ ባንክ የአገልግሎት ክፍያው ላይ በድጋሜ ማስተካከያ ማድረጉን ገለጸ።

የኢትዮጵያ ንግድ ባንክ የአገልግሎት ክፍያዎቹ ላይ በድጋሜ ማሻሻያ ማድረጉን አስታውቋል። ማሻሻያው ባንኩ ከደንበኞቹ አገኘውት ባለው ግብረ መልስ መሰረት የተደረገ መሆኑን ነው የገለጸው።

በዚህም፦

- #በወዲአህ በተከፈቱ ሂሳቦች በቅርንጫፍም ሆነ በሞባይል ባንኪንግ የሚደረግ ከሂሳብ ወደ ሂሳብ ገንዘብ የማስተላለፍ አግልግሎት ከክፍያ ነፃ ሆነዋል፤

- #በሙዳራባህ ውል የተከፈቱና እና ለረጅም ጊዜ ያልተንቀሳቀሱ ሂሳቦች (Inactive Accounts) ከክፍያ ሆነዋል።

- በቅርንጫፍ የሚከናወን ከሂሳብ ወደ ሂሳብ ገንዘብ የማስተላለፍ አገልግሎት ክፍያ እንደሚከተለው ተሻሽሏል

• ከብር 1 እስከ 10,000 =  5 ብር

• ከብር 10,000 እስከ ብር 100,000 = 10 ብር

• ከብር 100,001 በላይ = 10 ብር ሲደመር በእያንዳንዱ 100 ሺ 5 ብር (ከ100 ብር ያልበለጠ) ሆኗል።

- በሞባይል ባንኪንግ አገልግሎት ወደ ሌላ ባንክ ወደሚገኝ ሂሳብ ገንዘብ ለማስተላለፍ ( #RTGS ) 50 ብር የአገልግሎት ክፍያ ያስከፍላል፤

- ከ P2P የገንዘብ ዝውውር በ ኢትስዊች (ETSWITCH) 5 ብር እና የኢትስዊች ክፍያን በመደመር የአገልግሎት ክፍያ ይከፈልበታል፤

- ወደ ሲቢኢ ብር ሂሳብ ከ50 ብር በታች ለማስገባት የሚከፈል የአገልግሎት ክፍያ የለም፤

- በሲቢኢ ብር በቀን ከ3 ጊዜ በላይ የገንዘብ ልውውጥ ሲኖር ገንዘብ የማስገባት አገልግሎት እንደሚከተለው የአገልግሎት ክፍያ ይታሰብበታል፡

• ከብር 50 በታች = ነፃ
• ከብር 51 እስከ ብር 500 = 6.45 ብር
• ከብር 501 እስከ ብር 2,000 = 7.60 ብር
• ከብር 2,001 እስከ ብር 3,000 = 8.18 ብር
• ከብር 3,001 እስከ ብር 4,000 = 9.33 ብር
• ከብር 4,001 እስከ ብር 5,000 = 10.48 ብር
• ከብር 5,001 እስከ ብር 6,000 = 11.63 ብር
• ከብር 6,001 በላይ ከሆነ ከሚገባው ገንዘብ 0.2 በመቶ እንዲሆን መወሰኑን ባንኩ አስታውቋል።

👋  @TikvahethMagazine