#NewsAlert

የአሜሪካ፣ የዩናይትድ ኪንግደም፣ የኒውዚላንድ፣ የጃፓን፣ የኖርዌይ፣ የቤልጂየም፣ የቡልጋሪያ፣ የቼክ ሪፐብሊክ፣ የዴንማርክ፣ ጀርመን፣ አየርላንድ፣ ግሪክ፣ ስፔን፣ ፈረንሳይ፣ ጣሊያን፣ ሉክሰምበርግ፣ ሃንጋሪ፣ ኔዘርላንድስ፣ ኦስትሪያ፣ ፖርቱጋል፣ ሮማኒያ፣ ስሎቬንያ፣ ፊንላንድ፣ ስዊድን ኤምባሲዎች እና የአውሮፓ ህብረት ልኡክ በኢትዮጵያ የጋራ መግለጫ አውጥተዋል።

በዚህም መግለጫቸው ፤ በሰሜን ኢትዮጵያ እየተከሰቱ ያሉ ለውጦችን / ሁኔታዎችን እና እየተባባሰ ያለውን ውጥረት በትኩረት እየተከታተሉ እንደሚገኙ ገልጸዋል።

" እ.ኤ.አ. ህዳር 2022 ለተፈጸመው የግጭት ማቆም ስምምነት ሙሉ ድጋፋችንን እንደምንሰጥ ደግመን አጽንኦት እንሰጣለን " ብለዋል።

ይህ ስምምነት የመሳሪያ ድምጽ ጸጥ እንዳደረገም አመልክተዋል።

በፍጹም ወደ ሁከት ፣ ግጭት ፣ ጦርነት መመለስ እንደማይገባም አስገንዝበዋል።

ሁሉም ወገኖች ተባብሰው አስቸኳይ ውይይት በማድረግ ውጥረቱን በማርገብ ስምምነቱን እንዲጠብቁ አጥብቀው አሳስበዋል።

ማንኛውም አይነት ድጋፍ ለማድረግ ዝግጁ እንደሆኑ ገልጸዋል።

ይህ በእንዲህ እንዳለ ትላንት የትግራይ ጊዜያዊ አስተዳደር ፕሬዝዳንት አቶ ጌታቸው ረዳ ከመቐለ ወደ አዲስ አበባ ከመጡ በኃላ ከአሜሪካ፣ ጀርመን፣ ፈረንሳይ፣ ጣልያን፣ ዩናይትድ ኪንግደም እንዲሁም በአውሮፓ ህብረት አምባሳደሮች ጋር በትግራይ ስላለው ሁኔታ እና አስተዳደራቸው እየገጠመው ስላለው ፈተና ሰፋ ያለ ውይይት አድርገው ነበር።

#TikvahEthiopiaFamilyMekelle

@tikvahethiopia

በትግራይ ያለው ሁኔታ ምን ይመስላል ?

(ከቲክቫህ የመቐለ ቤተሰብ አባል)

የትግራይ ክልል ጊዜያዊ አስተዳደር ፕሬዜዳንት አቶ ጌታቸው ረዳ በሦስት ከፍተኛ የሰራዊት አመራሮችና በክልሉ የሰላምና የፀጥታ ቢሮ ሃላፊ ላይ ያሳለፉትን ጊዚያዊና ዘላቂ እግድ ተከትሎ በትግራይ ብዙ ልክ ያልሆኑ ነገሮች በመታየት ላይ ይገኛሉ።

የቲክቫህ አባል ከመጋቢት 1/2017 ዓ/ም በኃላ በትግራይ ያለውን ፓለቲካዊ ትኩሳትና አጠቃላይ ሁኔታ ሲከታተል ቆይቷል።

ፕሬዜዳንት አቶ ጌታቸው ረዳ ከበፊት ባልተለመደ ሁኔታ የግል ሚድያ ጋዜጠኞች በማሳተፍ ሰኞ መጋቢት 1/2017 ዓ.ም በፅህፈት ቤታቸው ጋዜጣዊ መግለጫ መስጠታቸው ተከትሎ ከምሸቱ 4:00 ሰዓት 3 ከፍተኛ የሰራዊት አመራሮች በጊዚያዊነት ማገዳቸው በደብዳቤ አስታወቁ።

በነጋታው መጋቢት 2/2017 ዓ.ም የክልሉ የሰላምና የፀጥታ ቢሮ የሦስት ከፍተኛ የሰራዊት አመራሮች እግድ " ተቀባይነት የሌለውና የማይተገበር " ሲል የጊዚያዊ አስተዳደሩን ፕሬዝዳንት የሚፃረር መግለጫ ሰጠ።

የሰላምና የፀጥታ ቢሮ መግለጫ ፈጣን ማሰተባበያ መግለጫ በመስጠት ያጣጣለው የፕሬዜዳንት ፅህፈት ቤት አስከትሎ የቢሮው ሃላፊ ከማንኛውም የመንግስት ስራ በዘላቂነት ማገዱን አስታወቀ።

በዛው ቀን መጋቢት 2/2017 ዓ.ም አመሻሽ አቶ ጌታቸው ረዳ ወደ አዲስ አበባ ተጓዙ።

መጋቢት 3፣ 4፣ 5 /2017 ዓ/ም ለአገር ውስጥና የውጭ ሚድያዎች ጋዜጣዊ መግለጫ ከአዲስ አበባ ሰጡ።

ከኢፌዴሪ የውጭ ጉዳይ ሚንስትር ጌዲዮን ጢሞቲዮስ (ዶ/ር) ጋር በመሆን በአዲስ አበባ ተቀማጭ ለሆኑ ዲፕሎማቶሽ የትግራይ ወቅታዊ ሁኔታን አብራርተዋል ።

ፕሬዚዳንት አቶ ጌታቸው ረዳ ከጻፏቸው የእግድ ደብዳቤዎችና መግለጫዎችና ውይይቶች በኋላ ያሉ ሁኔታዎች ምን ይመስላሉ ?

ከመጋቢት 2/2017 ዓ.ም ጀምሮ የተፈጠረው ፓለቲካዊ ቀውስ ተከትሎ ባንኮች (በተለይ ደግሞ የኢትዮጵያ ንግድ ባንክ) በሮች በረጃጅም ሰልፎች ተሞልተው ፤ የተለያዩ ባንኮች የATM ማሽኖችም ገንዘባቸው ተሟጦ ታይቷል።

መቐለ ጨምሮ በሌሎች ከተሞች እህል ጨምሮ በበርካታ መሰረታዊ ሸቀጦች ከፍተኛ የሚባል የዋጋ ጭማሪ አለ ፤ በጤፍ ብቻ በኩንታል አስከ 2 ሺህ ብር ጭማሪ ተደርጓል።

በአውቶቡስ እና በአውሮፕላን ከትግራይ ወደ አዲስ አበባ አቅጣጫ የሚጓዝ ህዝብ ቁጥር ብዛት አለው።

እስከ ቀጣዩ ሀሙስ መጋቢት 11/2017 ዓ.ም ድረስ ከትግራይ ወደ አዲስ አበባ የሚደረግ የአየር ጉዞ ትኬት ተቆርጦ አልቋል።

ሰላም ባስ በመሰሉ ትልልቅ የአገር አቋራጭ የአውቶቡስ አገልግሎት የሚሰጡ የትራንስፓርት ድርጅቶችም እስከ ማክሰኞ መጋቢት 9 /2017 ትኬታቸው ሸጠው ጨርሰዋል።

የተፈጠረው ውጥረት በሆቴል ቱሪዝም ኢንዳስትሪው ላይ አሉታዊ ጫናው ማሳደር መጀመሩ የሆቴል ባለቤቶችና ስራ አስኪያጆች ተናግረዋል።

ውጥረቱን ተከትሎ በተፈጠረ የነዳጅ  ዋጋ መወደድ  ከከተማ ወደ ከተማ የሚደረገው ክፍያ በእጥፍ ጨምሯል።

በነዳጅ እጥረት  ረጃጅም የታክሲ ሰልፎች ይታያሉ።

አስርና ማንገላታት ?

የትግራይ ጊዚያዊ አስተዳደር ምክትል ፕሬዜዳንት ሌተናል ጀነራል ታደሰ ወረደ መጋቢት 5/2017 ዓ.ም አመሻሽ ለሚድያዎች በሰጡት ጋዜጣዊ መግለጫ   " በትግራይ ያለው የፓለቲካ ቀውስ ከክልሉ አቅም በላይ ስላይደለ የፌደራል መንግስት ችግሩ ለመፍታት ጣልቃ አይገባም ፤ በተፈጠረው ፓለቲካዊ ልዩነት ምክንያት አሳዳጅ እና ተሳደጅ እንዳይኖር እየተሰራ ነው ፤ የጊዚያዊ አስተዳደሩ  የስራ ኋላፊዎች ተረጋግተው ስራቸው ይስሩ " በማለት ቢያሳስቡም መሬት ላይ ያለው ሁኔታ ግን እሳቸው ያሉትን አያሳይም።

አሁን በተጨባጭ በጊዚያዊ አስተዳደሩ በተሾሙ አመራሮች በመመራት ላይ የሚገኘው ደቡባዊ ዞን ብቻ ነው። ከዛ በመለስ ባሉት ዞንና ወረዳዎች ሙሉ በሙሉ በሚባል መልኩ የጊዚያዊ አስተዳደሩ ሹመኞች የሉም።

ባለፉት ቀናት በተፈጠረው ፓለቲካዊ ቀውስ ምክንያት የክልሉ ፕሬዜዳንት ፅህፈት ቤት ፣ የመንግስት ኮሙኒኬሽን ፅህፈት ቤት ጨምሮ ሌሎች በጊዚያዊ አስተዳደሩ የተሾሙ ሹመኞች ከተሞች ላይ አይታዩም። ከክልሉ ወደ አዲስ አበባ የተጓዙም በርካታ ናቸው።

ባለፈው ሰኞ መጋቢት 1/2017 ዓ.ም ለአጭር ጊዜ ተይዘው የተለቀቁት የምስራቃዊ ዞን የፀጥታና ሰላም ሃላፊ ኪዱ ገ/ፃድቃን ዳግመኛ ከተያዙ ቀናት ተቆጥረዋል ፤ የዓዲጉዲም ከተማ ከንቲባና ጥቂት የካቢኔ አባላት ታስረው መለቀቃቸው ፣ በሳምረ ከተማ የትግራይ ነፃነት ፓርቲ አንድ አባል መታሰራቸው ተረጋግጧል።

አቅጣጫውን ባልለየው ውጥረት ምክንያት የትግራይ ነዋሪዎች ግራ ተጋብተዋል።

በአጠቃላይ በክልሉ ሁኔታዎች ልክ አይደሉም።

የቲክቫህ ኢትዮጵያ የመቐለ ቤተሰብ ዘገባና ትዝብቱ እየተከታተለ ያቀርባል።

#TikvahEthiopiaFamilyMekelle

@tikvahethiopia

" በአደጋው የሦስት ሰዎች ህይወት ሲያልፍ በሚሊዮን ብር የሚገመት ንብረት ወድማል " - ማይጨው ችፑድ ፋብሪካ

ዛሬ ሰኞ መጋቢት 15 ቀን 2017 ዓ/ም ጠዋት በትግራይ ደቡባዊ ዞን ማይጨው ከተማ በሚገኘው ችፑድ ፋብሪካ ባጋጠመ የእሳት አደጋ የሦስት ሰዎች ህይወት ሲያልፍ በሚሊዮን ብር የሚገመት ንብረት ወድሟል።

የፋብሪካው የህዝብ ግንኙነት ክፍል ለቲክቫህ ኢትዮጵያ መቐለ በሰጠው ቃል የእሳት ቃጠሎ አደጋው የተነሳው በፋብሪካው የምርት ክፍል መሆኑን ጠቁሟል።

" የአደጋው መነሻ ምክንያት ገና አልታወቀም " ሲልም ገልጿል።

ይህን መረጃ እስከተጠናቀረበት ሰዓት ድረስ የሦስት ሰዎች ህይወት አልፏል። አንድ ሰው ደግሞ በሞት አፋፍ ላይ ይገኛል ተብሏል።

ሌሎች አካላዊ ጉዳት የደረሰባቸውም ወደ ጤና ማእከላት ተወስደዋል።  

የተነሳው ቃጠሎ በፋብሪካው ማሽነሪዎችና ህንፃ ላይ በሚሊዮን ብሮች የሚገመት ወድመት መድረሱ ነው የተገለፀው።

ዛሬ ረፋድ የተከሰተው የእሳት ቃጠሎው በሰው ሃይልና በማሽነሪ ተደግፎ በቁጥጥር ስር ውሏል።

ማይጨው ችፑድ ፋብሪካ ከትእምት (#ኢፈርት) ካምፓኒዎች አንዱ መሆኑ ይታወቃል ሲል የቲክቫህ ኢትዮጵያ የመቐለ ቤተሰብ መረጃውን ልኳል።

#TikvahEthiopiaFamilyMekelle
Photo : Social Media

@tikvahethiopia