“ ሹፌር ትጥቅ የማይለብስ ፤ ከቀበቶ ውጪ የማይታጠቅ፣ የሚያረካ ክፍያ ሳይከፈለው በየዋህነት ለህዝቡ የሚያገለግል ነው ፤ ሊገደል ፣ ሊሰቃይ አገባውም !! ” - የኢትዮጵያ ከባድ መኪና አሽከርካሪዎች ማኀበር

በደቡብ ጎንደር ዞን ጋይንት አካባቢ ሰሞኑን የከባድ መኪና ሹፌሮች በታጣቂዎች ድብደባና እገታ እንደተፈጸመባቸው፣ በቦቴዎች የጫኑት ነዳጅም በመንገድ ሲፈስ የሚያሳይ ቪዲዮ በማኀበራዊ ሚዲያ ሲዘዋወር ተስተውሏል።

ጣና የከባድ መኪና አሽከርካሪዎች ማኀበርም፣ በወቅቱ ነዳጁ እንፈሰሰ ገልጾ፤ “ አንድ ሹፌር በጥይት ተመትቷል፤ ሁለት ሾፌሮች ታግተው ተወስደዋል ” ብሏል።

አሽከርከርካሪዎቹ ከጂቡቲ ነዳጅ ጭነው ሲጓዙ የነበሩ መሆናቸው የተነገረ ሲሆን፤ ስለጉዳዩ የጠየቅነው የኢትዮጵያ ከባድ መኪና አሽከርካሪዎች ማኀበር ምላሽ ያለውን ማብራሪያ ሰጥቷል።

ማኀበሩ ለቲክቫህ ኢትዮጵያ ምን አለ ?

“ በማንኛውም መልኩ በየትኛውም ወገን ቢሆን ለህዝብ የሚጠቅምን ሀብት ማባከን ተገቢ ነው ብሎ አያምንም ማኀበሩ።

ነዳጁ ስለፈሰሰ ማነው ተጠቃሚው ? በከፍተኛ ሁኔታ የሚቸገረው የዛ አካባቢ ህብረተሰብ ነው። የዛ አካባቢ ህብረተሰብ ሲቸገር ደግሞ የነዳጅ ካምፓኒው፤ የመኪና ባለቤት፤ ሸቀጣሸቀጥ ነጋዴዎች ይቸገራሉ።

ይሄ ድርጊት ዘርፈ ብዙ ችግር ያለበት ነው። ማኀበራችን እንደዚህ አይነት ጥፋቶችን ሙሉ ለሙሉ ያወግዛል። 

ነዳጅ፤ ማዳበሪያ ጭኖ ስላጓጓዘ ነው ? አሽከርካሪ ምን ስላደረገ ነው የሚመታው ? በዚህ ተግባር ላይ የተሰማራችሁ አካላት አሽከርካሪዎቻችንን አትግደሉብን።

አሽከርካሪዎች የሚያሳድጓቸው ልጆች፤ ሚጠሯቸው ወላጆች አሏቸው ይሄንን ሁሉ ነው የምታሳጡት። ስለዚህ እበካችሁ አትግደሉን።

በሰሞኑ በጋይንቱ ክስተትም የተመቱና የቆሰሉ ልጆች አሉ የሚል መረጃ ደርሶናል። 

ሾፌር ለሀገር ኢኮኖሚ የጀርባ አጥንት ነው። ለኢትዮጵያ ወደብ ሆኖ የሚያገለግል የውጩን ወደ ሀገር የሚያመጣ፣ የውስጡን ወደ ህብረተሰቡ የሚያስደርስ አሽከርካሪ ሊገገደል ቀርቶ እንክብካቤ ሊደረግለት ነው የሚገባው።

ትጥቅ የማይለብስ፤ ከቀበቶ ውጪ የማይታጠቅ፣ በየዋህነት ለህዝቡ የሚያገለግል፤ የሚያረካ ክፍያ ሳይከፈለው እንደ አገሪቱ ሁኔታ በጣም በችግር ላይ ያለ አሽከርካሪ በማንኛውም አካል ሊገደል አይገባውም ” ብሏል።

የነዳጅና ኢነርጅ ባለስልጣን፣ ስለአሽከርካሪዎቹ ሆነ “በጥይት ተመትቶ ባከነ” ስለተባለው ነዳጅ ማብራሪያ ከተሰጠ በቀጣይ የምናቀርብ ይሆናል።

#TikvahEthiopiaFamilyAA

@tikvahethiopia

“ 1000 ብር የሚከፈለው ሠራተኛ አለ። የደመወዝ ጭማሪም አልተፈጸመልንም ” - የይርጋጨፌ ሆስፒታል ጤና ባለሙያዎችና ሠራተኞች

➡️ “ ሆስፒታሎች ሊስታቸው በሲቪል ሰርቪስ የሠራተኞች ዝርዝር ዳታ ቤዝ ውስጥ የለም። እንዲገባ የተደረገው ጭማሬው ከተደረገ በኋላ ነው” - ሆስፒታሉ

በጌዴኦ ዞን ይርጋጨፌ የመጀመሪያ ደረጃ ሆስፒታል የሚሰሩ 230 ጤና ባለሙያና ሠራተኞች አዲሱ የደመወዝ ጭማሪና የትርፍ ሰዓት ክፍያ ባለመፈጸሙ በቲክቫህ ኢትዮጵያ በኩል ቅሬታቸውን አሰምተዋል።

ጤና ባለሙያዎችና ሠራተኞቹ ምን አሉ ?

“ የካቲት 12/ 2017 ዓ/ም ‘ይከፈላችኋል ብር ተገኝቷል’ የሚል ተስፋ ሰጥተውን ነበር። ነገር ግን እስካሁን ምንም የለም። ለተቋማዊ ገጽታ እንጂ ለሠራተኞች የተጨነቁ አይመስሉም። 1000 ብር ደመወዝ የሚከፈለው ሠራተኛ አለ። የደመወዝ ጭማሪው አልተከፈለንም ” ብለዋል።

“ 1000 ብር የሚከፈለው መንግስት ሠራተኛ አለ። ቢያንስ ለእነርሱ እንኳ መፍትሄ ሊሰጥ ይገባል ” ሲሉ አሳስበው፣ ለጤና ባለሙያዎች ጭምር የአምስት ወራት የደመወዝ ጭማሪ እንዳልተከፈላቸው ገልጸዋል።

“ ለዞኑ የደመወዝ ጭማሪ በታህሳስ ተከፍሏል። ጭማሪው አገር አቀፍ ሆኖ ሳለ ለዞኑ ታህሳስ ላይ ክፍያ ሲፈጸም፤ እኛ ለምን አልተከፈለንም? ብለን ስንጠይቅ ‘የእናንተ ፋይል ተረስቶ ሊሆን ይችላል’ ተባልን ” ነው ያሉት።

በዚህም ኑሮ ውድነቱ በየቀኑ እየጨመረ፣ የሚከፈላቸው ደመወዝ ዝቅተኛ በመሆኑ ቤተሰብ ለማስተዳደር፣ ልጆች ለማስተማር እንደተቸገሩ ገልጸዋል።

ሆስፒታሉ ለቲክቫህ ኢትዮጵያ ምን ምላሽ ሰጠ ?

በቅሬታው መሠረት፣ የደመወዝ ጭማሬና የዱቲ ክፍያ ለምን እንዳልተፈጸመ ምላሽ የጠየቅው ይርጋጨፌ ሆስፒታል፣ ደመወዝ በሁሉም አለመጨመሩን፣ የዱቲ ክፍያ ግን መፈጸሙን የሚመለከት ምላሽ ነው የሰጠው።

አንድ የሆስፒታሉ አመራር በሰጡን ቃልም፣ “ ደመወዝ ጭማሪ የሆስፒታላችን ብቻ ሳይሆን ክልላዊ ጉዳይ ነው። የዱቲ ክፍያ እንደኛ ሆስፒታል የዱቲ ውዝፍ የተከፈለበት ሆስፒታል ስሌለ የተሳሳተ መረጃ ነው ” ብለዋል።

ስለደመወዝ ጭማሬው ከክልል የተባላችሁ ነገር የለም ? ለሚለው ጥያቄ፣ “ ሆስፒታሎች በቦርድ ነው የሚተዳደሩት። ሊስታቸው መደበኛ በሆነ በሲቪል ሰርቪስ የሠራተኞች ዝርዝር ዳታ ቤዝ ውስጥ የለም። እንዲገባ የተደረገው ጭማሬው ከተደረገ በኋላ ነው” ሲሉ መልሰዋል።

እኚሁ አካል፣ “ አሰራር ነው እንደዛ የሚያደርጋቸው፤ የብዙ ሺሕ ሠራተኞችን ይሄን ዳታ ፊልተር ማድረግ ጊዜ ይወስዳል። ከዚህ ጋር በተገናኘ እንጂ በሌላ ጉዳይ አይደለም። ፋይናላይዝ እየተደረገ ያለ ስለሆነ እንደ ሀገር ተቋማትም በዚህ እስቴፕ ውስጥ እያለፉ ናቸው ” ነው ያሉት።

የሆስፒታሉ ባለሙያዎች የደመወዝ ጥያቄ በማንሳታቸው “ እስራትና ድብደባ ” እንደተፈጸመባቸው ለቲክቫህ ኢትዮጵያ ከወራት በፊት መግለጻቸው አይዘነጋም።

ስለደመወዝ ቅሬታው በወቅቱ የጠየቅነው የጌዴኦ ዞን ጤና መምሪያ፣ “ እነርሱ ጋ ብቻ አይደለም ያልተከፈለው፤ ከ2,000 በላይ ሠራተኞች እንደ ዞን ያልተከፈላቸው አሉ ” የሚል ምላሽ ሰጥቶ ነበር።

“ ከክልል ፋይናንስ ገንዘብ እንዲለቀቅ በሂደት ላይ እንደሆነ፣ እንደተለቀቀ ክፍያ እንደሚከፈል ተግባቦት ላይ ተደርሷል ” ነበር ያለው።

#TikvahEthiopiaFamilyAA

@tikvahethiopia

" ወደ ቀድሞው ካምፓኒ ሊመልሱን ነው። መንግስት በፍጥነት የማያስወጣን ከሆነ ላለመመለሳችን ምንም ዋስትና የለንም " - ከ730 በላይ ዜጎች በማይናማር

በማይናማር በታገቱበት ወቅት ሲሰሩት የነበረውን አስከፊ ስራ እንዲያቆሙ ተደርገው ወደ ሀገራቸው ለመመለስ ከወር በላይ የመንግስትን ምላሽ ሲጠባበቁ የነበሩ ከ730 በላይ ኢትዮጵያውያን ቀድሞ ወደነበሩበት የእገታ ቦታ ሊወሰዱ በመሆኑን ለቲክቫህ ኢትዮጵያ ተናገሩ። 

ኢትዮጵያውያኑ ዛሬስ ለቲክቫህ ኢትዮጵያ ምን አሉ?

“ወደ ሀገራችን ለመውጣት ዛሬ ነገ እያልን ወደ ካምፓኒ ተመለሱ ተባልን።

ከመጥፎው ስራ አውጥተውን የነበሩት ሚሊታሪዎቹ 'መንግስታችሁ የማይፈልጋችሁ ከሆነ ወደ ቀድሞው ካምፓኒ ተመለሱ፣ እናንተን ቁጭ አድርገን የምንመግበው የለንም' ብለውናል።

የኢትዮጵያ መንግስት እኛን የመመለስ አቅም የለውም ወይ? መልሱ አዎ ከሆነ ተመልሰን እዛ ከምንገባ እዚሁ እራሳችንን እናጠፋለን የመጨረሻ አማራጫችን እሱ ነው። ዛሬ ተስፋ ቆርጠናል፤ ጭንቀታችን በርትቷል ስለዚህ መልስ እንፈልጋለን።

ተገደን የማጭበርበር ስራ የነበርንና በሚሊተሪ ድጋፍ ነጻ የወጣን 735 ኢትዮጵያውያን በማይናማር ሁለት ሚሊተሪ ካምፖች ሆነን የሀገራችን ምላሽና የማጓጓዝ ስራ በመጠበቅ ሁለተኛ ወራችን እያገባደድን  ነው።

ይህም ከካምፓኒ ለመውጣት ስንጠየቅ ከነበረው 5000 ዶላር ነጻ ያደረገንና የኢትዮጵያ መንግስትም ስካም ፓርኮቹ ድረስ ገብቶ ዜጎቹን ለማውጣት ተፈጥሮበት የነበረውን ፈተና ያቀለለ ምቹ አጋጣሚ ነበር።

በቆየንባቸው የሁለት ወራት ጊዜ ውስጥ ውጭ ጉዳይ ሚኒስትር እና የወላጆች ኮሚቴ ሂደቱ እየተሰራበት እንደሆነ በሚደርሱን መረጃዎች እየተጽናናን ቆይተናል።

በቆይታችን ሚሊተሪው የተያዘውን ምግብ ቢያቀርብም ከሃይማኖታችንና ከሀገራችን የአመጋገብ ባህል ጋር ፈጽሞ የማይሄድ በመሆኑ በውድ ዋጋ በሽያጭ የሚያቀርቧቸውን ምግቦች እየገዛን እንጠቀም ነበር። 

አሁን ግን ሁላችንም እጃችን ላይ የነበረንን ገንዘብ ጨርሰን ምግብና መድኃኒት ምንገዛበት የሌለን በመሆኑ ለረሃብና ለጤና ችግር ተጋልጠናል።

ከቀዶ ጥገና ተደርጎላቸው ማገገም ያልቻሉ፤ በተፈጥሮ አደጋው ተጎድተው ደም አሁንም የሚፈሳቸው፤ በአንጀትና አንገት ህመሞች ራሳቸውን ችለው መንቀሳቀስ ማይችሉ ህሙማን ባሉበት ህክምና በማይገኝበት ጠረፍ ላይ መሆናችን ከዚህ እንድንወጣ ለሚዲያዎችና ለመንግሥት ተቋማት እያሳወቅን የቆየን መሆኑም ይታወቃል።

ይህ ሁሉ ችግር ያልፋል ብለን በኢትዮጵያ መንግስት እና ኢምባሲዎቹ እየተሰሩ ያሉ እኛን የመመለስ ስራ በተስፋ እየጠበቅን ባለንበት ወቅት ሁላችንንም ያስደነገጠ እና ተስፋችን የቀማን ችግር ተከስቷል።

ከአረመኔያዊ አያያዝ አውጥቶ ካምፕ ውስጥ ያስገባን ሚሊተሪ የሀገራችን ምላሽ እየተጠባበቀ ቢቆይም በኢትዮጵያ መንግስትና በኤምባሲዎች የሚሰራው እኛን ወደ ሀገር የመመለስ ስራ እጅጉን ስለተጓተተ፣ ከ29 ሀገራት ዜጎች እኛ ብቻ በመቅረታችን ሚሊተሪው በኢትዮጵያ መንግሥት ተስፋ ቆርጦ ወደ ካምፓኒዎች እንደሰንመለስ እያዋከበን ነው።

ይህም በብዙዎቻችን ላይ ትልቅ ሽብርና መደናገጥ የፈጠረ አደገኛ ክስተት ሆኖ ለጭንቀት ዳርጎናል።

በመሆኑም፣ ሚዲያዎች፣ የውጭ ጉዳይ ሚኒስትር እና ኤምባሲዎች ለዚህ አደገኛ ሂደት ፈጣን ምላሽ በመስጠት ወደ ሀገራችን መመለስ ካልቻሉ መመለስ የማንችለው የ735 ወጣቶች ህይወት አደጋ ውስጥ እየገባ እንደሆነ ለማሳወቅ እንፈልጋለን” ሲሉ ተማጽነዋል።

#TikvahEthiopiaFamilyAA

@tikvahethiopia

" 10ኛ ክፍል ላይ ሀገር አቀፍ ፈተና ሳይወስዱ ወደ 11 የተዘዋወሩ ተማሪዎች ልዩ የማካካሻ ትምህርት ሊሰጣቸው ይገባል፣ ካልሆነ ግን መውደቅ ይቀጥላል  " - ትምህርት ሚኒስቴር

ትምህርት ሚኒስቴር ወደ ዩኒቨርስቲ የሚገቡ ተማሪዎች ቁጥር በየጊዜው በከፍተኛ ሁኔታ እየቀነሰ መሆኑን ተከትሎ አካሄድኩት ባለው እና ለህዝብ ተወካዮች ምክር ቤት ባቀረበው ጥናት ዘርፈ ብዙ ችግሮች መገኘታቸውን ገልጿል።

የትምህርት ዘርፍ ሪፎርም ከተካሄደ በኋላ ትምህርት ቤቶች ማስተማር ከሚችሉት በላይ ተማሪዎችን ያስተምራሉ ያለ ሲሆን ከዚህ በፊት 10ኛ ክፍል ይሰጥ የነበረውን ፈተና በመቅረቱ ሳይፈተኑ 11ኛ ክፍል መግባታቸው ለችግሩ ዋና ተጠቃሽ ምክንያት መሆኑን አመላክቷል።

በትምህርት ቤቶች በሚሰጠው የሞዴል ፈተና እና ትምህርት ሚኒስቴር በሚሰጠው የሀገር አቀፍ ፈተና ሰፊ ልዩነት እንዳለውም ገልጿል።

" በማህበራዊ እና በተፈጥሮ ሳይንስ ተማሪዎች መካከል የማለፍ ንፅፅር ሲታይ ልዩነት አለ " ያለው ሚኒስቴሩ " የተፈጥሮ ሳይንስ ተማሪዎች የተሻለ ውጤት በማምጣት ወደ ከፍተኛ ተቋም ይገባሉ፣ ይሁን እንጂ በቂ አይደለም፣ ብዙ ነገሮች መሻሻል እንዳለባቸው ጥናቱ አሳይቶናል " ብሏል።

ጥናቱ ምን አይነት የትምህርት ዘርፍ ችግር ነው ይሄን ያክል ውድቀት ያመጣብን ፣ ከተማሪዎች መውደቅ እና ማለፍ ጋር ተያይዞ የትምህርቱ ባህሪ ምንድን ነው የሚለውን እና በአጠቃላይ በትምህርት ዘርፉ ላይ የሚስተዋሉ ችግሮችን የያዘ ነው።

በሁሉም የትምህርት ዘርፍ ላይ ያሉ ችግሮችን ያሳየው ይሄ ጥናት በመጨረሻም የመፍትሄ ሃሳቦችንም አቅርቧል።

ትምህርት ሚኒስቴር ምን የመፍትሄ ሃሳብ አቀረበ ?

" ከዚህ በፊት 10ኛ ክፍል ላይ ይሰጥ የነበረውን ሀገራዊ ፈተና ሳይወስዱ 11ኛ ክፍል የሚማሩ ተማሪዎች ልዩ የማካካሻ ፕሮግራም ያስፈልጋቸዋል። ይሄ ካልሆነ ግን መውደቅ ይቀጥላል ፣ ምክንያቱ የሚፈለገውን ያህል እውቀት እና ክህሎት ይዘው አይወጡም።

በገጠር በተለይም በአርብቶ አደሮች አካባቢዎች ላይ ያለው የትምህርት ዘርፍ ልማት አነስተኛ ከመሆኑ ጋር ተያይዞ እጅግ ወደ ኋላ እየቀረ ስለሆነ ማካካሻ መሰራት አለበት።

ሌላው ደግሞ ከትምህርት አመራር፣ መምህራን እና ከአቅም ግንባታ ጋር ተያይዞ ያሉ ጉዳዮች ውጤት በሚያመጡ ጉዳዮች  ላይ ብቻ ትኩረት ተደረጎ የትምህርት አመራሩ አቅም እስካልሰጠ ችግሮቹ ይቀጥላሉ።

ለመምህራን የደመወዝ ጭማሪ ብቻ ሳይሆን መምህሮችን የሚያቅፍ የ insensitive package እስካልመጣ ድረስ ችግሮቹ ይባባሳሉ።

በተጨማሪም በሀብት ክፍፍል ላይ ክፍተት በመኖሩ በትምህርት ዘርፉ ልማት ላይ ተግዳሮት መኖሩን ያሳያል፣ ይሄም መፈታት አለበት " ሲል መፍትሄ ያለውን ሃሳብ አቅርቧል።

ትምህርት ሚኒስቴር ጥናቱን ባቀረበበት ወቅት የህዝብ ተወካዮች የተለያዩ አስተያየቶች፣ ጥያቄዎች እና ሃሳቦችን አቅርበዋል።

በጥናቱ ላይ የመፍትሄ ሃሳቦች መቅረባቸው ጥሩ ሁነው ሳለ እንደዚሁ ተወርተው መሬት ላይ ሳይወርዱ ከቀሩ ትርጉም አልባ ናቸው፣ በመሆኑም ሁሉም በአፅንኦት ሊመለከተው እንደሚገባ በተወካዮች ተጠቁሟል።

ከ1 እስከ 8ኛ ክፍል ላሉ ተማሪዎች የሚደረገው ድጋፍ አነስተኛ ነው፣ ይሄም አሁን ላለንበት ውጤት ማጣት ትልቁን ድርሻ ይወስዳል ፤ በጥናቱስ ላይ ለምን ይሄ ሳይካተት ቀረ፣ ምክንያቱም የትምህርት መሰረቱ ከታች ጀምሮ ስለሆነ የሚሉ ጥያቄዎች ተነስቷል።

የተለያዩ ተማሪዎች በህገወጥ መንገድ ወደተለያዩ ሀገሮች እየተሰደዱ ነው፣ ተማሪዎች ይሄ ሲፈጠር ተረጋግተው መማር እየቻሉ አይደለም፣ ትምህርት ሚኒስቴር ትኩረት ሊሰጠው ይገባል ተብሏል።

#TikvahEthiopiaFamilyAA

@tikvahethiopia

“ የአሜሪካ ታሪፍ መጨመር፣ በኢትዮጵያ የውጭ ምንዛሪ ግብይት ላይ ተፅዕኖ ይፈጥራል ” - አቶ ክቡር ገና

➡️ “ እርምጃው፣ ኢኮኖሚያዊ ጉዳትም ስለሚያስከትል፣ ሌሎች የገበያ መዳረሻዎችን ማፈላለግ ይገባል ! ”

የአሜሪካው ፕሬዝደንት ሰሞኑን ባደረጉት አዲስ የቀረጥ ጭማሪ እርምጃ፣ ኢትዮጵያን ጨምሮ ከ40 በላይ የአፍሪካ ሀገራትን አካቷል፡፡

እርምጃው ኢትዮጵያ ወደ አሜሪካ በምታስገባቸው ምርቶች ላይ የ10 በመቶ ቀረጥ እንዲጣልባቸው አድርጓል፡፡

ይህ አዲሱ የፕረዝደንት ትራምፕ እርምጃ፣ የኢትዮጵያ ኢኮኖሚ እና ወደ አሜሪካ ገበያ በሚገቡ የኢትዮጵያ ምርቶች ላይ ምን ተፅዕኖ ሊኖረው እንደሚችል ቲክቫህ ኢትዮጵያ ያነጋገራቸው ባለሙያ፣ “ ተፅዕኖ መፍጠሩ አይቀሬ ነው ” ብለዋል፡፡

የቀረጥ ወይም ታሪፍ ጭማሪው፣ ወደ አሜሪካ ገበያ የሚላኩ ሸቀጦች ዋጋቸውን ያንረዋል፣ ይህ ደግሞ በሸማቹ ማኅበረሰብ ላይ አሉታዊ ተፅዕኖ አለው ሲሉ ተናረዋል፣ የኢኮኖሚ ባለሙያው አቶ ክቡር ገና፡፡

በኢኮኖሚ፣ በንግድና ኢንቨስትመንት ጉዳዮች ትንታኔ በመስጠት የሚታወቁት አንጋፋው ባለሙያ አቶ ክቡር ገና በሰጡት ማብራሪያ፣ ኢትዮጵያ ወደ አሜሪካ ከምትልካቸው ምርቶች ቡና እና ጨርቃጨርቅ ትልቁን ድርሻ እንደሚይዙ ገልፀው፣ አሁን እነዚህ ምርቶች አሜሪካ በሚደርሱበት ጊዜ ዋጋቸው ይጨምራል ብለዋል፡፡

የሸቀጦቹ ዋጋ ሲጨምር፣ ገዢዎቹ ይቀንሳሉ፣ ያ ደግሞ ሀገር ውስጥ ያሉ አምራቾች ምርታቸው ሊቀንስ እና በአቅምም ሊያንገዳግዳቸው ይችላል ሲሉም አክለዋል፡፡

አቶ ክቡር ገና በዝርዝር ምን አሉ ?

“ እርምጃው የኤክስፖርት ኢኮኖሚውን ይጎዳዋል፡፡ ቀደም ሲል አባል የነበርንበት የአጎዋ ዕድል (የአፍሪካ ምርቶች ከቀረጥ ነፃ ወደ አሜሪካ ገበያ የሚገቡበት አሰራር) ተጠቃሚዎች ነበርን፡፡ ያ ዕድል ተቋርጦዋል፡፡

የኢትዮጵያ ምርቶች ቀረጥ ተክፍሎባቸው ነበር ወደ አሜሪካ ገበያ ሲገቡ የነበሩት፡፡ አሁን የተጨመረው የ 10 በመቶ ታሪፍ ቀደም ብሎ በነበረው ላይ ነው፡፡ ይህ የኢትዮጵያ ላኪዎችን ያዳክማል፡፡ በውጭ ምንዛሪ ግብይት ላይም ተፅዕኖ ይኖረዋል፡፡

በአብዛኛው አንዲህ ዓይነት ለውጥ በሚመጣበት ጊዜ፣ የውጭ ምንዛሪ ግብይት (የገንዘብ መዘርዘሪያ መጠን) ላይ የሆነ ተፅዕኖ ያስከትላል፡፡ እርምጃው ብርን ሊያጠነክረው ይችላል፣ አለያም የበለጠ ሊያዳክመው ይችላል፣ እሱን ቀጥለን የምናየው ይሆናል፣ ግን ተፅዕኖው አይቀሬ ነው፡፡ ”
 
የትኞቹ ሸቀጦች የበለጠ ይጎዳሉ ?

“ በትክክል ምንድነው የሚፈጠረው የሚለው በትግበራው ወቅት ነው የሚታየው፡፡ ለምሳሌ እዛ ያሉት ኢምፖርተሮች (ከእኛ ላኪዎች ሸቀጦችን የሚረከቡ የአሜሪካ ነጋዴዎች)፣ አሁን በዚህ የታሪፍ መጨመር ምክንያት የሸቀጥ ዋጋ ጨምሮባቸዋል፡፡

አሁን እነሱ ምን ይወስናሉ፣ ጭማሪውን ራሳቸው ሸፍነው ትርፋቸውን ቀንሰው እቃውን ለሸማች ያቀርባሉ ወይስ ጭማሪውን በቀጥታ ለተጠቃሚው ያስተላልፋሉ የሚለው ገና የሚታይ ይሆናል፡፡ ከዚህ በተጨማሪ፣ እርምጃው የትኞቹን ሸቀጦች የበለጠ ይጎዳል የሚለውም እንደዚሁ ቀጥሎ የሚታይ ነው፡፡

ለምሳሌ በአሜሪካ ገበያ ብዙም ተወዳዳሪ የሌለው የኢትዮጵያ ሸቀጥ ብዙም ተፅዕኖ ላይደርስበት ይችላል፣ ምክንያቱም ሸማቹ አማራጭ ስለሌለው ዋጋውም ቢጨምርበት እቃውን ይገዛዋል፡፡

የሆነ ሆኖ ግን ታሪፉ የምርት ዋጋ እንዲጨምር ያደርጋል፣ ያ ደግሞ በሸማቾች ዘንድ የመግዛት ፍላጎት ይቀንሳል፣ ከዛም የምርት መጠን ይዳከማል፣ ገዢ ከሌለ የኢትዮጵያ አምራቾች ሊያመርቱ አይችሉም፡፡ ”

መፍትሔው ምንድነው የሚሆነው ?

“ መፍትሔው ያንን የሚተካ ሌላ ገበያ መፈለግ ነው፡፡ ከአሜሪካ ወጥቶ የሌሎችን ሀገራት ገበያ ማፈላለግ አስፈላጊ ይሆናል፡፡ ተፅዕኖው ከመበርታቱ በፊት ሌሎች የንግድ መዳረሻዎችን ማፈላለግ ይገባል፡፡

ታሪፉ የተጣለው በሁሉም ሀገራት ላይ ስለሆነ፣ የትኛው ሀገር የበለጠ ይቋቋመዋል የሚለው ገና በትግበራ ወቅት የሚታይ ይሆናል፡፡ የታሪፍ ለውጥ መምጣት የፖሊሲ ለውጥ ለማድረግም ይረዳል፡፡

ወደ ሌሎች ዘርፎች እንድነገባ ሊያስገድድ ይችላል፡፡ ለምሳሌ የቱሪዝም ዘርፉን ማጠናከርና ማስፋፋት ይገባ ይሆናል፡፡ በተጣለው ታሪፍ ምክንያት የሚታጣውን ገቢ ለማካካስ ማለት ነው፡፡

በቅድሚያ ግን የእርምጃውን ተፅዕኖ በደንብ ማጥናትና የመውጫ መንገዶችን ማሰብ ተገቢ ነው፡፡ ተፅዕኖው ምን ሊሆን እንደሚችል ማየት ይኖርብናል፡፡ ”

ቲክቫህ ኢትዮጵያ
አዲስ አበባ

#TikvahEthiopiaFamilyAA

@tikvahethiopia

#Update

“ እናቶች የሚያለቅሱበት፣ የወላጆች ልጅ አልባ መሆን ሊቆም ይገባል” - ኮሚሽነር መላኩ ወ/ማርያም

➡️ “ ወንድም ወንድሙን ለምን ይገድላል? ለምን ያሳድዳል? ብለን የምንጠይቅበት መድረክ ነው” - ኮሚሽነር አምባዬ ኦጋቶ (ዶ/ር)

የኢትዮጵያ ሀገራዊ ምክክር ኮሚሽን በአማራ ክልል አጀንዳ የማሰባሰብ የምክክር ምዕራፍ በባሕር ዳር ዩኒቨርሲቲ ስታዲዬም ዛሬ በይፋ መጀመሩን አስታውቋል።

በዚህም የኮሚሽኑ ኮሚሽነሮች፣ የሃማይኖት አባቶች፣ የሀገር ሽማግሌዎች፣ ተሳታፊዎች፣ የባህል ማዕከል፣ የክልሉ ማርሽ ባንድ የተገኙ ሲሆን፣ መርሃ ግብሩም የኃማይኖት አባቶች ባደረጉት ጸሎት ተጀምሯል።

በዚህም ከአምስት ባድርሻ አካላት የተወከሉ ከ6000 በላይ ወኪሎች ይሳተፋሉ፣ በተለያዩ ወረዳዎች ማኀበረሰቡን የወከሉ 4500 ወኪሎች በመጀመሪያዎቹ አራት ቀናት በአገራዊ አጀንዳ ውይይት ያደርጋሉ።

የኮሚሽኑ ኮሚሽነሮች ምን አሉ?

የኮሚሽኑ ኮሚሽነር መላኩ ወ/ማርያም፣ “ኢትዮጵያ በመደማማት ያተረፈችው ነገር የለም። የጦርነት አዙሪት፣ እርስ በእርስ ለማስቆም ያስችላል በሚል ምክክሩ ተጀምሯል” ብለዋል።

“እርስ በእርስ መጨራረስን በቃ ልንል ይገባል። እናቶች የሚያለቅሱበት፣ የወላጆች ልጅ አልባ መሆን ሊቆም ይገባል” ያሉት ኮሚሽነሩ፣ “ለምንድን ነው የምንገዳደለው?” ሲሉ ጠይቀዋል።

ኮሚሽነር ዮናስ አዳዬ (ዶ/ር) በበኩላቸው፣ አማርኛን ያስተማረ የአማራ ህዝብ መሆኑን ጠቅሰው፣ “የቤሰብ ፀብ ቢፈጠር ዝም ብለን ማዬት አለብን?” ሲሉ ጠይቀዋል።

ዐድዋን የመጀመሪያ፣ ዓባይ ግድብን ሁለተኛ ድል ጠቅሰው ሀገራዊ ምክክሩን “3ኛው ዓድዋ” ሲሉ የጠሩት ዮናስ (ዶ/ር)፣ ምክክሩ፣ ህዝብን ከህዝብ ለማግባባት፣ በተከፉ ቁጥር ትጥቅ አንግበው ጫካ የሚወጡ አካላት በመወያዬት እንዲያምኑ ለማድረግ ያለመ መሆኑን አስረድተዋል። 

 ምክትል ዋና ኮሚሽነር ወ/ሮ ሂሩት ገ/ስላሴ፣ “ያለፉት ዘመናት አልፈው ተርፈው በትጥቅ ትግል ተይዘዋል” ብለው፣ የትጥቅ ትግል ጊዜያዊ እንደሆን እንጂ ዘላቂ መፍትሄና ሰላም እንደማያመጣ አስገንዝበዋል።

ኮሚሽነር አምባዬ ኦጋቶ (ዶ/ር)፣ “ወንድም ወንድሙን ለምን ይገድላል? ለምን ያሳድዳል? ብለን የምንጠይቅበት መድረክ ነው። ለዝመት፣ እንደፍራለን አሁን ደግሞ ለማዳመጥ የምንደፍርበት ወቅት ነው ብዬ አስባለሁ” ብለዋል።

ዋና ኮሚሽነር መስፍን ዓርዓያ (ፕ/ር)፣ አለመግባባቶች እንደሚስተዋሉ ገልጸው፣ ለዚህም አማራ ክልልም አንዱ መሆኑን ገልጸው፣ በሚሊዮን የሚቅጠሩ ህፃናት ከትምህርት ቤት በር መድረስ እንዳልቻሉ፣ በርካታ ወጣቶች ወደ ጫካ ለመግባት ለመግባት መገደዳቸውን ገልጸዋል።

ለዚህም ምክክር እንደሚያስልግ፣ ታጣቂዎች በምክክሩ እንዲሳተፉ ጥሪ ሲያደርጉ እንደቆዩ ገልጸው፣ ለታጣቂዎች አሁንም በድጋሚ ጥሪ አቅርበዋል።

ቲክቫህ ኢትዮጵያ
ባሕር ዳር

#TikvahEthiopiaFamilyAA

@tikvahethiopia