Политправ

Слово огласительное на Святую Пасху иже во святых отца нашего святителя Иоанна Златоуста

🔹Аще кто благочестив и боголюбив, да насладится сего добраго и светлаго торжества.

🔹Аще кто раб благоразумный, да внидет радуяся в радость Господа своего.

🔹Аще кто потрудился постяся, да восприимет ныне динарий.

🔹Аще кто от первого часа делал есть, до приимет днесь праведный долг.

🔹Аще кто по третием часе прииде, благодаря да празднует.

🔹Аще кто по шестом часе достиже, ничтоже да сумнится, ибо ничимже отщетевается.

🔹Аще кто лишися и девятаго часа, да приступит, ничтоже сумняся, ничтоже бояся.

🔹Аще кто точию достиже и во единонадесятый час, да не устрашится замедления:

🔹любочестив бо сый Владыка, приемлет последняго яко и перваго: упокоевает в единонадесятый час пришедшаго, якоже делавшаго от перваго часа.

🔹И последняго милует, и первому угождает, и оному дает, и сему дарствует.

🔹И дела приемлет, и предложение хвалит.

🔹Тем же убо внидите вси в радость Господа своего: и первии и втории, мзду приимите.

🔹Богатии и убозии, друг со другом ликуйте.
Воздержници и ленивии, день почтите.

🔹Постившиеся и непостившиеся, возвеселитеся днесь. Трапеза исполнена, насладитеся вси.

🔹Телец упитанный, никтоже да изыдет алчай: вси насладитеся пира веры: вси восприимите богатство благости.

🔹Никтоже да рыдает убожества, явися бо общее царство.

🔹Никтоже да плачет прегрешений, прощение бо от гроба возсия.

🔹Никтоже да убоится смерти, свободи бо нас Спасова смерть. Угаси ю, иже от нея держимый.

🔹Плени ада, сошедый во ад. Огорчи его вкусивша плоти его.

🔹И сие предприемый Исаия возопии: ад, глаголет, огорчися, срет тя доле.

🔹Огорчися, ибо упразднися.

🔹Огорчися, ибо поруган бысть.

🔹Огорчися, ибо умертвися.

🔹Огорчися, ибо низложися.

🔹Огорчися, ибо связася.

🔹Прият тело, и Богу приразися.

🔹Прият землю, и срете небо.

🔹Прият еже видяще, и впаде во еже не видяще.

🔹Где твое, смерте, жало; где твоя, аде, победа;

🔹воскресе Христос, и ты низверглся еси.

🔹Воскресе Христос, и падоша демони.

🔹Воскресе Христос, и радуются ангели.

🔹Воскресе Христос, и жизнь жительствует.

🔹Воскресе Христос, и мертвый ни един во гробе: Христос бо востав от мертвых, начаток усопших бысть.

🔹Тому слава и держава, во веки веков,

🔹Аминь.