У Мастацкай галерэі Міхаіла Савіцкага працягвае працу выстаўка жывапісу «Фарбы Радзімы» да 80-годдзя з дня нараджэння П.П. Шарыпы (1942 – 2013).

У экспазіцыі прадстаўлены работы члена Беларускага саюза мастакоў Пятра Шарыпы, аднаго з яскравых майстроў беларускага жывапісу другой паловы ХХ стагоддзя. Яго творчасць вылучаецца цэльнасцю і непаўторным каларыстычным дараваннем. Экспануецца больш 70 работ аўтара ў розных жанрах: партрэт, тэматычная карціна, нацюрморт, пейзаж.

З палотнаў Пятра Шарыпы паўстае трапяткі, светлы, рамантычна-ўзнёслы вобраз Айчыны. Сузіраючы выставу, глядач мае ўнікальную магчымасць спасцігнуць таямніцу гэтага вобраза, акунуцца душой у непаўторную прыгажосць роднай зямлі.

#культурасталiцы

У бібліятэцы № 6 прайшла літаратурная сустрэча «Пад беларускай зоркай юбіляра» для вучняў 4 класа сярэдняй школы № 22 з беларускім пісьменнікам Чарняўскім Мікалаем Мікалаевічам.

Дзеці з цікавасцю слухалі пра творчы лёс пісьменніка. Насычаная добрымі словамі, выдатным настроем і вершаванымі словамі сустрэча прайшла вельмі хутка. На памяць аб сустрэчы дзеці набылі кнігі з аўтографам пісьменніка і зрабілі памятныя фотаздымкі.

Мікалай Мікалаевіч Чарняўскі – пісьменнік, заслужаны дзеяч культуры Беларусі, выдатнік народнай асветы Беларусі, выдатнік друку Беларусі, лаўрэат літаратурных прэмій імя Я. Маўра, імя В. Віткі, “Залаты Купідон”, прэміі Федэрацыі прафсаюзаў Беларусі.

#культурасталiцы