НАШЫ ТРАДЫЦЫІ.
КНІГА : МАСТАЦТВА ВЫЦІНАНКІ.

Беларуская выцінанка - у сусветным Спісе нематэрыяльнай культурнай спадчыны !

Кніга з беларускай выцінанкай
Любові Сівуравай
"Робіць Янка выцінанку".

"Нездарма людзі кажуць, што чалавек-- каваль свайго шчасця. А ці можна шчасце, напрыклад, выразаць? Сапраўднае беларускае майстэрства выцінанкі дае адназначны адказ на гэтае пытанне. Так, можна! У вершах Любові Сівуравай, шыкоўна аздобленых выцінанкамі народнага майстра Беларусі Наталлі Сухой, чытач- і выразач!- пабачыць, пачуе і зможа прымераць на сабе розныя заняткі, прафесіі да іншыя шляхі выпрацоўкі ўласнага шчасця !"

#ВольгаГлухоўская
#АкадэмКніга

НАШЫ КНІГІ.
БЕЛАРУСКІЯ ВЫДАННІ.

"БЕРАГІНЯ".

Кніга з аўтографам мастака
Ясенія Сцяпанава
"Берагіня. Казкі"
Мастак В.П.Славук

#АкадэмКніга

НАШЫ КНІГІ.
БЕЛАРУСКІЯ ВЫДАННІ.

"КАМЕННЫЯ КАЗКІ".

Кніга з аўтографам.
Аляксей Андрэеў
"Каменныя казкі".

Альбом малых скульптур Аляксея Андрэева з аўтарскімі казкамі пра кожнага з герояў выдання.

Напрыклад пра Кніжніка Містаса.
Герой - вельмі кансэрватыўны. Упэўнены, што кніга павінна быць толькі папяровай. Толькі ў цвёрдай вокладцы. І, вядома, з добрым фіналам.
Сустракаецца ў бібліятэках, у тым ліку хатніх.
Знікаючы від.
Камень знойдзены ў Нарачанскім краі летам 2020 года, выразаны зімой 2021 года.

#АкадэмКніга

НАШЫ КНІГІ.
БЕЛАРУСКІЯ ВЫДАННІ.

"КАЗКІ ПРА ЖЫВЁЛ".

"Казачная энцыклапедыя свойскіх жывёл".
Казкі, вершы, апавяданні
У зборнік увайшлі вершаваныя і празаічныя творы беларускіх пісьменнікаў, а таксама народныя казкі пра: карову, казу, сабаку, ката і інш..

Прымяненне спецыяльных QR-кодаў дазволіць пачуць галаса свойскіх жывёл.

#АкадэмКніга

НАША ТВОРЧАСЦЬ.
ЛІДЧЫНА : КОНКУРС ПАЭЗІІ.

У рамках святкавання 32-га Дня беларускага пісьменства ў г. Лідзе ў 2025 г. Лідскі замак праводзіць паэтычны конкурс "Голас стагоддзя". Конкурс праводзіцца з 1 студзеня па 1 жніўня 2025 г. Пазнаёміцца з Палажэннем аб правядзенні конкурсу вершаў уласнага сачынення пра Лідскі замак "Голас стагоддзя" можна на афіцыйным сайце ДУ "Лідскі гісторыка-мастацкі музей"
www.lixmuseum.by

Па пытаннях арганізацыі і правядзення конкурсу звяртацца па тэлефоне:
+375 154 54 22 60
або на электронную пошту [email protected]

#СтаніслаўСуднік

НАШЫ АСОБЫ.
УЛАДЗІМІР ХАДЫКА.
ПАЭЗІЯ.

3 студзеня - дзень нараджэння беларускага паэта Уладзіміра ХАДЫКІ (1905 - 1940).

Нарадзіўся ў вёсцы Цітва Пухавіцкага раёна. Скончыў на выдатна Дудзіцкую пачатковую школу. З 12 гадоў працаваў парабкам. Скончыў агульнаадукацыйныя курсы ў Мінску. Працаваў настаўнікам, служыў у арміі. З 1924 г. у Мінску. З вершамі выступіў у 1926 г. (часопіс "Чырвоны сейбіт").

Быў сябрам літаб’яднання "Маладняк". На верш У.Хадыкі "Расцём і дужэем" А.Турчынаў напісаў песню. Член СП СССР з 1934 г.
У 1936 г. арыштаваны і асуджаны на 10 год пазбаўлення волі. Пакаранне адбываў у Іванаўскім і Марыінскім лагерах. Загінуў на будоўлі чыгункі каля Улан-Удэ.

НАШЫ ПАЭТЫ.
УЛАДЗІМІР ХАДЫКА.

"Люблю, заўсёды сню і мару..."

"Люблю, заўсёды сню і мару,
Шаную цвет вясны тваей.
Увесь да родных рысаў твару
Штодзень прыростаю мацней.

Штодзень кладу на дальні ўскраек
Зямлі і неба галаву.
Адтуль, сярод блакітных маек
Цябе, нязбыўную, заву.

Тут іх вясёлай панараме
Кладзе паклоны далагляд.
Пляце зара над вечарамі
Вянкі агністыя дзяўчат.

Тут песня свету што ні постаць,
А толькі, як ні выбірай, -
Змяніць цябе не вельмі проста,
І не сустрэць такой, бадай.

І чым дужэй іду па краю,
Жыву прывольней і ярчэй,
Тым больш люблю (чаму – не знаю)
Я ў ім смугу тваіх вачэй.

Пад іх жывым і родным бляскам
Душу і цела кінуў я, -
Каб вечна чуць цябе, як казку,
Залатакудрая мая.

Каб жыць нікім не сцёртым следам
Прыснёных рук тваіх і век,
Ў табе адной, як прыклад, ведаць,
Якім быць можа чалавек."

НАШЫ АСОБЫ.
АЛЕСЬ ШАШКОЎ.
ЛІТАРАТУРА.

3 студзеня -
дзень нараджэння беларускага пісьменніка
ШАШКОВА АЛЕСЯ (1923 - 2016).

Нарадзіўся ў вёсцы Раманоўшчына Чашніцкага раёна. Скончыў Літаратурны інстытут імя М.Горкага. Удзельнік вайны. Друкавацца пачаў з 1947 г. Аўтар зборнікаў апавяданняў "Абуджэнне", "Ранняй вясною", "Сонца тушыць зоркі", аповесці "Навальніца спее ў цішыні", рамана "Спытай сваё сэрца", кніг для дзяцей і інш..

#ViktarKaval