НАШЫ ПРАЕКТЫ.
ТРАДЫЦЫЙНАЕ АДЗЕННЕ ВІЦЕБШЧЫНЫ.

28/11/2024, 19:00

Дзяржаўны музей гісторыі беларускай літаратуры.

У беларускага народа багатая спадчына, і кожны рэгіён нашай краіны мае свае асаблівасці ў традыцыйнай культуры. Тут размова і пра спеўныя, танцавальныя, абрадавыя звычаі, і, канечне, пра строй.

Народнае адзенне поўначы Беларусі – вельмі цікавая і досыць загадкавая тэма. Па шэрагу гісторыка-культурных абставін яно дайшло да нас у значна меншай ступені за адзенне іншых рэгіёнаў нашай краіны.

У працяг праекта “Кола года” запрашаем на аўтарскую лекцыю Ганны Сілівончык “Традыцыйнае адзенне Віцебшчыны”. На лекцыі будзе магчымасць убачыць пэўныя матэрыялы, прааналізаваць іх і сфарміраваць цэльнае бачанне адносна найбольш архаічнага адзення гэтага краю.

Запрашаем усіх аматараў традыцыйнай культуры, рэканструктараў традыцыйных беларускіх строяў і ўсіх, хто цікавіцца культурай Віцебшчыны!

Даведкі: +375 17 363 56 21.
Адрас: вул. М.Багдановіча, 13.

#МузейГісторыі
#БеларускайЛітаратуры

НАШЫ ВЫДАННІ.
БЕЛАРУСКІЯ НАВІНКІ.

ПА СЛЯДАХ НАВУКОВАГА ЭТНА-ФОРУМА.

"Казка і міф у еўрапейскай прасторы 3: традыцыі і навацыі."
Матэрыялы ІІІ Міжнароднага форуму даследчыкаў Беларускай казкі (Мінск, 18-20 мая 2023).

#АкадэмКніга

НАШЫ КНІГІ.
БЕЛАРУСКІЯ ВЫДАННІ.

ДЗІЦЯЧАЯ ЛІТАРАТУРА.

«Дай лапу, Месяц!»:прыгодніцкая аповесць-казка
Алесь Марціновіч.

Наўрад ці чуў хто пра горад Селямес. Гэта і нядзіўна, бо знаходзіцца ён не на Зямлі, а на Месяцы. Ды яшчэ на баку, нябачным з яе. А вось героі прыгодніцкай аповесці-казкі Алеся Марціновіча «Дай лапу, Месяц!» — котка Ліза, сабачка Альма і іх сябры — на ім пабывалі, сустрэліся з лунацікамі. Аб падрыхтоўцы да гэтага падарожжа, перашкодах, пераадоленых героямі кнігі, апавядаецца так, быццам усё было ў сапраўднасці. А барацьба іх з нячысцікамі, якія аберагаюць жыхароў ад прышэльцаў, поўная яркіх, драматычных момантаў. Твор для дзетак цікаўных, у прыгоды ўлюбёных.

#АкадэмКніга

НАШЫ КНІГІ.
БЕЛАРУСКІЯ ВЫДАННІ.

ДЗІЦЯЧАЯ ЛІТАРАТУРА.

​​Выдавецтва «Адукацыя і выхаванне» прапануе.

"Я зноў перажыў вайну"
М. Шыманскі.

У кнізе змешчаны ўспаміны вядомага беларускага публіцыста, журналіста і пісьменніка Міхаіла Шыманскага пра дзяцінства, цяжкія выпрабаванні яго сям’і і землякоў у гады Вялікай Айчыннай вайны.

Выданне адрасавана найперш дзецям сярэдняга школьнага ўзросту, моладзі, а таксама ўсім, хто цікавіцца гісторыяй Вялікай Айчыннай вайны.

#АдукацыяВыхаванне

НАШЫ АСОБЫ.
МІХАІЛ СУДНІК.
МОВАЗНАЎСТВА.

21 лістапада 1910 года  нарадзіўся (вёска Пяцюлева, цяпер у Полацкім раёне) Міхаіл Раманавіч Суднік, беларускі мовазнаўца. Член-карэспандэнт Нацыянальнай акадэміі навук Беларусі, кандыдат філалагічных навук. Заслужаны дзеяч навукі БССР.

Асноўныя кірункі даследаванняў — беларуская лексікалогія і лексікаграфія, арфаграфія, тэрміналогія, анамастыка. Адзін з аўтараў «Руска-беларускага слоўніка», «Беларуска-рускага слоўніка», «Арфаграфічнага слоўніка», «Тлумачальнага слоўніка беларускай мовы» (тт. 1–5). Старшыня Беларускага і Міжнароднага камітэтаў славістаў.