17. Сергей Матвеев. Нылкышно саюлын: роман-чигвесь. Ижевск: Удмуртия, 2020.

Сергей Матвеев сюлмаське чебер каб утчан сярысь. 2020-тӥ арын потэм берлояз романаз со шедьтэм «чигвесь» форма: котькуд глава нимамын вуюисьлэн кыӵе ке буёл нимыныз. Озьы главаосты-буёл пырыосты сузьйыса, автор кылдытэ роман-чигвесь.

Татьяна Зайцева литературовед роман сярысь гожтэ, главаосысь буёлэн герӟаськем идея ыше шуыса. Мон соглаш, Матвеев, текстын уг пырты тӱсэн (милям диалектамы «буёл» кыллэн синонимез) герӟаськем малпанъёсты. Озьы ке но, романысь автор – со визуал, кылдытэ чебер суредъёсты. Мар тодам кылиз произведениез лыдӟыса, со пейзажъёс но адямиослэн вылтуссы, кыӵе ке героической-абдратӥсь учыръёс сярысь мадён. Таӵе чебер картина кылдытыса, автор сайя вӧсь карись, висьылӥсь яраос сярысь сюжетъёссэ. Ӵошатӥд ке сое Александр Лаптевен, кудӥз гожъя вӧсь карись ужпумъёс сярысь гинэ, Сергей Матвеев ӝож мылкыд кельтӥсь учыр борды будэтэ лулэз шутэтскытӥсь чеберлыкез. Та ӧвӧл мынам идея – мыным озьы валэктӥзы, мон соглаш луи.

Зэмзэ но, мар мынам тодам кылиз но мае син азям пуктӥсько – со шӧдонъёс ӧвӧл, но абдратӥсь суредъёс-историос. Одӥгаз веросын герой шайвылэ мынэ тодмотэм кулэм муртэз ватон понна гу гудӟыны. Со пересь нылкышно вылэм. Сое ватыкузы, герой огпол но кулэм мурт шоры уг но учкы, ватон обрядэ уг пыриськы, пӧрме. Шайвылысь бертэмез бере героен-мадёсчиен мар ке валантэм луэ, марлы ке но кулэм пересь нылкышноез солэн туж адӟемез но адямиен сямен люкиськемез потэ. Соку герой шайвылэ мынэ. Шайгуэз выльысен копаса, коросэз усьтыса, кулэм муртэн йылолъя люкиське но берен коросэн гуэз сюен соге. Герой уйбыртэмез сярысь вера, дыр, шуэм потэ вал ик, но ведь уйбыртон сярысь текстын меӵак пусъемын ик ӧвӧл. Лыдӟисьлы аслыз малпано тае.

Али кутски Михаил Атамановлэн "Санӥ. Пилемъёс доразы берто" романэз борды. Лыдӟисько, пель сьӧрам Атамановлэн куараез кылӥське кадь, солэн интонациосыз. Мыным сое огвакытэ ӵем кылзоно, соин вераськоно луиз. Марлы мон та сярысь гожтӥсько? Романлэсь аудиоверсизэ мед поттысал ни "Удмуртия" издательство, ачиз ик Атаманов мед чырдысал романзэ.

18. Григорий Медведев. Трилогия. 1-тӥ книга: «Лӧзя бесмен».

Григорий Медведевлэн «Лӧзя бесмен» трилогиез борды кутски, нырысетӥ романзэ (кудӥз быдэс трилогилы ним сётӥз) быдэстӥ, Михаил Атамановлэн Санӥ кулак ныл сярысь романзэ лыдӟонме уретыса. Табере азьланьто ни нош Атамановез лыдӟонме. Соосты ведь тунсыко ӵошатыны, котькудӥзлэн пуштросэз мукетызлы ваче пумит луэ кадь.

Со сяна, конечно, «Лӧзя бесмен» романлэн поэтикаезлы синмаськи. Кыӵе быгатэ Медведев композицизэ валтыны, макем со усто возьматэ адями мылкыдлэсь вошъяськемзэ, кыӵе нуэ сюжетсэ. Соос ваньзы лэйкась крезьгур-композиция кылдыто, шуыны луоз. Кӧня татын куараос-мылкыдъёс. Паймисько чеберезлы.

Вуи сыӵе арлыдам, куке кылын гожтэм пейзажъёсты син азям пуктыса дыртытэк лыдӟисько. Медведевез лыдӟыса, аслэсьтым вунӥсь диалектме тодам ваисько, дӥне (дорам) бертӥсько кадь. Геройёслэн вераськемазы гуртоосылэн, туган-выжыосылэсь куаразэс-интонацизэс кылӥсько. Тани, шуом, романысь огез герой – Лаврентэй нимо мӧйы воргорон. Со кузь мугоро, котьку жугиськыны дась, кужмо. Атас сямзэ возьматыса мыскылля ни выль сямен ужаны-улыны дась егит муртъёсты: «Егитъёс-а соос? – зӧк куараен вазиз со. – Вакчи ашыкъёс – шуба кисые тыры но ваньзэ нелькы. Вож пакаръёс-а маке пӧрмытозы?!».

Ашык шуон «настолкаен» шудыны яратӥз мынам пересь апае. Нош бабай (песятае) нунычкаезлэсь (мынэсьтым) – вож нунылэсь – кӧтсэ соляркаен пыӵам киыныз вешакуз, «пакар, пакар» шуылоз вал. Пуштросо кыл со: «пакар» -- чуваш кылын «кӧт».

Мар мынам пушкам? Мар ке сэрттӥськиз-пертчиськиз кадь. Тау, тыныд, Григорий Медведев, легитимировать карид книгаяд удмурт шошма диалект кылэз, вунэтэм лексикаме-кылме тодам вайытӥд, огшоры улон суредъёсты но. Кылсярысь, пӧсь чай юон милям, шушмо-кукмор палъёслэн – со бадӟым традиция: чай юон куспын ведь, ӝӧк сьӧрын валтӥсь вераськонъёс-кенешонъёс мыно гуртын, ог-огмылэсь кальёсмес тодӥськом.

Малпасько, Григорий Медведев, быгатысал ваньзэ ик романэз шошма диалект лексикаен-синтаксисэн гожтыны. Кукмор вераськетъёсыз ик кутытэк но (соослэн ведь асьсэлэн шӧмъёссы-менталитетсы). Писатель, дыр, ассэ серметаз, вошъялляз аслэсьтыз кылзэ тупал удмуртъёслэн ( туала Удмурт Элькунысь) лексикаезъя. Шедьты вал Григорий Сергеевичлэсь рукописьёссэ. Кыӵе меда со вал произведение – аслаз гожтэмез, нош кыӵеен собере печатьын потӥз?..

Валей Кельмаковлэсь книгаоссэ лыдӟыны кутски. Ужъя кулэ: фотоосыныз но арбериосыныз Нац. библиотекаямы 22 октябре 16.00 часэ выставка усьтӥськом. Лыктэ! Яке эн лыктэ, асьтэос тодэлэ. Но калык луыны кулэ — обещать каризы. Кельмаковлэн мӧзмыт но валантэм нимен ужъёссэ (озьы малпасько вал студент вакытам) али, конечно, мукет синмен адӟисько. Кылсярысь "Образцы удмуртской речи" книгаезлэн 1-тӥ выпусказ поттэмын варсь но сур пӧзьтон рецепт! Красногорск ёросын гожтэмын вылэм. Собере мукетъёссэ лыдӟисько — чеберзылы паймыса. Тани, шуом, быличка оборотень сярысь. Одӥг адямилэн одӥг гинэ пиез вылэм, ӝытлы быдэ ышылэм, ӵукна пал бертылэм. Мынэм со адями пизэ чакланы. Бусы капкаозь вуэм но матысь писпуэ тубем. Егит пи но вуэм бусы капка доры но берытскем кионлы. Бызьса кошкем кионъёс сьӧры. Кион уллё вите гурт дорын. Соос дортӥ ортчем нылкышно — кионъёс сое лэзиллям. Нош со бере огназ мынӥсь пиосмуртэз кионъёс кесяллям. Пиез бертэм бере, со адями шуэм: "Тон милям пимы ӧвӧл ни вылэмед. Малы кышномуртэ ӧд йӧтэ, нош пиосмуртэз кесяды?" Егит пи верам: кышномурт дыртӥз семьязэ сюдыны, нош пиосмурт куное лыктыса кӧлытэк кошкем, верамын ке но вал, кионъёслэсь кышкано. Мон ачим кион, кион кионэз уз си, пе, шуыса кошкем но соин ми сое кутӥмы, — шуэм егит пи-кион. Собере со дорысьтыз кошкем но, берытскымтэ ни, кион уллёен кошкем пыраклы. Вот сыӵе тӥни космос Кельмаковлэн книгаосаз. Егит дыръяз фотоосын со туж чебер, учкымон. Ӧрӟи! Ми со фотоосыз бадӟыматыса поттӥмы — чебер выставка пӧрмыны кулэ. Лыктэлэ библиотекае учкыны.

Мон ведь ачим сярысь литературовед шуыса тодам ваисько конференциос азьын. Туннэ ӵукна ньыль часын султыса "Пермистикалы" дасяськыны кутски. Ма но со люкай сизьым часлы. Собере пленарной заседаниын нимысьтыз пусъемын вал, Дмитриева Л., пе, "новейшая удмуртская литература" валатон шедьтэм, витиллям кыӵе ке оригинальной произведениос-усьтонъёс (мон нош верай Никоновалэн дневникез но Анатолий Байтэреглэн "Италмасо вырйылэз" сярысь) но та понятиелы доказательствоос. А мон шуи, берло вить ар ӵоже потэм книгаослы малпай сыӵе рабочий термин. Уг тодӥськы, мон, дыр, вань симпозиум азьын сереме уси. Кельмаков сарказменыз ӵушкасал ни, дыр. Ну, ярам, чидасал, мон ведь быдэ вуэм адями, анай мурт. Анекдот, огъя вераса. На коленке уг малпа табере докладъёс но соослы нимъёс.

19. Маша Гаврилова. Я обязательно уволюсь: повесть. Popcorn Books, 2024.

Егит гожъясьчи Маша Гаврилова будэмын Ижкарын. Кузьмадёсысь сюжет нош Мускоысь улонэз возьматэ ке но, валтӥсь героиня луэ палэнысь лыктэм мурт. Соин валтӥсь ужпум: улон инты но уж пумысен сюлмаськон. Мыным та история асме тодэ вайытэ: 2000-тӥ аръёсы, университет бере, уж утчамме но арлы быдэ патерме вошъямме. Весь кышкаса улоно вал, уксё уз тырмы шуыса, тодмо ӧй вал, кӧня дыр ӵоже таяз квартирын улыны кылдоз.

Героинялэн-мадёсчилэн нимез пусъемын ӧвӧл, но сямез мыным валамон. Телеграм-каналъёсын книга сярысь туж трос отзывъёс вал (книга усто вузаське!). Книжной блогеръёс пусйизы героинялэсь быдэ вуымтэзэ – та ласянь пыкылэмзы потӥз кадь. Котьма мед шуозы, но егит адямилэн мурт городлы дышемез, ассэ улонысь утчамез татын усто возьматэмын.

Книга лыдӟиське одӥг ӝыт куспын. Гожтэмын капчи, ӟуч вераськон кылын, паймытэ чебер пейзажъёсыныз-кылсуредэныз. Геройёс возьматӥсько выроссы пыр, кыӵе ке яркыт учырен герӟаса. Тани валтӥсь героинямы синмаськемын егит москвичлы, но соиз адӟем но уг кары сое. Муско пи котырысьтыз номыр уг адӟы. Героиня гажан муртсэ ӵошатэ пыдэстэм но вольыт выло тыэн – со лушкем но лачмыт, отын уяны уг луы, выйыны гинэ кыле на. Нылмуртлэн верамез но уг поты пияшлы синмаськемез сярысь: соиз уз вала, уз дунъя. Озьы ик гажан мылкыдыз ортче. Улонын кадь. Кельшиз мыным авторлэн яратон мылкыдлэсь улэмзэ но сылмемзэ возьматэмез но.

Уж дурам мон котьку трос гожъяськисько ӟуч кылын. Мӧзмисько удмуртэн гожъяськонлэсь но кышкасько та люкам быгатонлыкме ышто шуыса. Соин, дыр, удмурт литератураез но лыдӟыны кутски. Соин, дыр, малпай телеграмм-каналэ вакчияк ке но лыдӟеме сярысь гожъяны. Эшшо шумпотӥсько, малпанъёсме лыдӟись вань: озьыен, книгаослы сӥзем блог тема – кулэ но тунсыко.

Шумпотӥсько, бурдъясь, выльзэ сётӥсь муртъёсылы. Ми ог-огмылы тунсыко, милемлы вань, мар сярысь вераськыны, милемыз огъя удмурт литература но лулчеберет. Та кусыпъёслэн емышсы но кылдӥз. Киям кутӥсько чебер вылкыметэн – яркыт, гужем инбам кадь лыз но шунды выллем нап-ӵуж буёло – выль книгаез. «Кенеш» журналэн дасям «Лёгетъёс» удмурт прозаен но кылбуретэн выль бичет печатласькиз. Отчы пыризы литература вожвылъяськонын вормисьёслэн ужзы. Книгае сюриз мынам статьяе но – сое одӥг ар талэсь азьло гожтӥ вал телеграм-каналам, Анатолий Байтэреглэн «Италмасо вырйыл» лирической кузьмадёсэз сярысь.

Литературалы сӥзем вожвылъяськонэз радъян, ортчытон, конкурсын вормисьёслэн ужъёсынызы чебер, кие кутымон книга поттон но со сяна талы сӥзем бадӟым тунсыко ужрад ортчытон – со туж бадӟым но секыт уж. Тау карисько радъясьёслы: кивалтӥсьлы, Зинаида Рябининалы, «Кенеш» журналлэн редакциезлы но Анастасия Шумиловалы – котьма ласянь быгатӥсь адямилы – усто кылбурчилы, тунсыко критиклы но быгатӥсь организаторлы, чеберлыкез валасьлы. Эшшо макем усто со быгатэ нуыны «О чем поёт вотячка» телеграм-каналзэ! Мон шудо, сыӵе адямиосын валче ужасько шуыса.

Мынам туэ арын зэмос книжной блогер сямен лыдӟиськеме но гожъяськеме ӧз луы, туж потэ вал ке но. Толэзяз огзэ но книгазэ лыдӟыса ӧй вуттылы. Но куштӥськеме уг поты, удмурт книгаос туж тунсыкоесь, кутсконо гинэ, дышытоно астэ регуляно лыдӟиськыны — аслым но, ваньмылы тае сӥзисько. Книга лыдӟон — пайда маке.

Туэ ар кутскиз фольклорен, фольклорен ик со йылпумъяськиз. Ӝыны ар мында "Актуальная этнография" книгаез тупатъяй. Кӧня, кӧня аслым отысь выльзэ басьтӥ, валай, макем яратӥсько удмурт кылосбурез. Но жади, жади, сьӧд сюлмозь вуи, со бордын ужаса. Собере ар ӵоже выри Мария Никоновалэн "Улон — питыран, сюлэм — пияла..." книгаезлы рецензия гожъяса. Вуоно арын "Ежегодник финно-угорских исследований" журналын печатласькыны со кулэ.

Дарали Лелилы луыса усьтӥ аслым Ласло Викар но Габор Берецкилэсь Votyak Folksongs книгазэс но Ласло Викарен поттэм Finnugorok és törökök dallamai аудиодискез. Толэзьёсын кылзӥськи но дышетски кырӟанъёсты — тужгес но семык сямез. Дарали Лелилы ик луыса сое кырӟай Кубыз-фестаз Степан Плотников фольклористэн.

Али аслым усьтӥсько удмурт крезьгур фольклорысь кукмор удмуртъёслэсь гуръёссэс — соос туж чебересь, тунсыкоесь, мон понна со выль дуннее сюрон. Ӧвӧл, со ыштэм арбериез шӧдтэк шорысь шедьтон кадь — ведь со мынам вордскем палъёсысь, Татарстанысь удмуртъёслэн сям-йылолъёссы, менталитетсы сярысь мургес тодон-валан басьтон. Эшшо мыным шуд усиз тодматскыны Валей Кельмаков профессорлэн зарни рукописеныз — отчы ог кыксю пала кукмор но мукет интыосысь удмурт кырӟанъёсты со гожтэм. Тросэз со, конечно, кукмор палъёсысь такмакъёс. Вуоно арын та ӧрын тунсыкъяськонме азьланьтэме потэ. Сыӵе тӥни улонэ герӟаськемын книга лыдӟонэн но сое кылдытонэн.

20. «Лёгетъёс»: литература вожвылъяськонын вормисьёслэн ужъёсынызы бичет. – Ижкар: Йӧскалык прессалэн юртэз, 2024. – 160 бам.
 
Умой, каньылэн лыдӟиськe та книга. Кылбуръёс но устоесь, веросъёс но акылесэсь ӧвӧл шуыны луоз. Мыным ӧй вал мӧзмыт. Тужгес но тодматскем потэ вал Лариса Чернышевалэн «Шуныт» кузьмадёсэныз, малы ке шуоно, со сярысь Виктор Шибанов критик шуиз, сое чидатӥськыса лыдӟем. Мыным нош кельшиз.

Оло, В. Шибановлэсь дунъетсэ тодыса, мон веросэз сюлмаськытэк лыдӟи, номыр сыӵе-таӵезэ витьытэк, кызьы, кылсярысь, ньылӥськод яратон сярысь романъёсты — туала массовой литератураысь вӧлмем жанрез. Малпасько, кинлэн удмурт кылын мар ке капчи жанрен гожтэм уж лыдӟемез потэ ке, та повесть туж ярасалыз.
 
Сыӵе ик ӟеч беллетристика, мон шуысал, Владимир Котков калык писательлэн “Дунне берга, пӧлэстӥське улон” кузьмадёсэз: синкылиез поттӥсь сентиметальной произведение. В. Котковлэн сюжетэз ӟеч пӧрмем: кутскид ке, дугдэмед уг луы. Удмурт проза лыдӟымон, мон шуысал, та сборникез дунъяса.

Нош удмурт поэзия сярысь ке верано, Алексей Лекомцевлэсь, Анна Трубачевалэсь, Марина Михайловалэсь кылбуръёссэс лыдӟыса, ас поннам аслым шумпотӥ, соослэсь поэзизылэсь чеберлыксэ дунъяны быгатӥсько шуыса.

21. Атаманов-Эграпи Микаль. Санӥ. Пилемъёс доразы берто. Роман-эпопея. Ижевск: Удмуртия, 2024.
 
Куарусён толэзьысен ӝыныё кыллиз та лыдӟоно книгае. Али выль ар каникулъёсы кык-куинь нунал куспын быдэстӥ.
 
Малпаськисько романлэн чеберлыко кабез (художественной формаез) сярысь. Марлы меда автор романзэ безличной повествование амалэн кутскыса, та амаллэсь куштӥське но азьланьтэ сое 1-тӥ лицо пыр: Санӥ валтӥсь героиня ачиз кузь улон-вылонэз сярысь вера вань повествование ӵоже?
 
«Эпопея» кылэз ке синйылтӥськод, конечно, трос куараё но геройёсын, соослэн кузь улон сюресэныз пачыл «Война и мир» роман тодэ лыктэ. Михаил Атамановлэн романаз одӥг адямилэн гинэ синмыныз возьматэмын удмурт калыклэн даур ӵоже улэмез. Произведение улонысь учыръёс вылын гожтэмын.

Валамон, марлы со озьы пӧрме: классической формаен роман кылдытон понна со бордын ужано кын корт куртчон вакытэ, вань кужымез но визез отчы поныса. Валтӥсез, дыр, соиз но: гожъясь мурт ассэ чеберлыко произведение кылдытӥсь писателен мед лыдъялоз, профессионал сямен аслаз гожтосэз бордын мед ужалоз. Туала удмурт литература понна сыӵе адямиос – со роскошь, конечно.

М. Атамановлэн романэз матын Мария Никоновалэн «Сюлэм – пияла, улон – колёса» дневник-тодэ ваёнъёсын книгаезлы. Мария Никонова но Санӥ кадь ик зол кышномурт, со кадь ик шуг-секыт пыр ортчемын, Мария Никоновалэн но книгаяз даурлэн куараез кылӥське. Солэн дневниказ адямилэн психологиез усьтэмын. Нош Михаил Атаманов аслэсьтыз героинязэ чеберъя, романтизировать каре. Со героиня шоры кыдёкысен учке, матэ-матэ карыса уг возьматы. Матэ карон, мон сямен, со куке адями кытын ке ассэ уг куты, уг вала, нош Санӥ котьку зӥбыт но сазь, ноку уг чигиськы.

Чигиськон дыр матэктэ ке, героинялы уин вӧтаз лыктэ Мария матушка нимо Соловки шормуӵын ыбем-бырем удмурт нылкышно-монахиня. Со ӟеч психологлэсь но усто эмъя героинялэсь лулпушсэ: оскытэ, нылкышно ассэ йӧно, чылкыт возиз ке, ожын сӧсырмыса бырем кузпалэныз но агайёсыныз одно ик пумиськоз сопал дуннеын. Сыӵе тӥни бытовой мистической реализм туннала удмурт литератураысь.
 
Персонажъёсты сьӧдэн-тӧдьыен возьматон – соцреализмысь потэм литературной традиция – кылемын Михаил Атамановлэн романаз. Азьвыл сьӧдэн возьматӥзы кулакъёсты, нош собере власть воштӥськем бере, дунъетъёс йырин-чукин берытскизы: кылсярысь, Атамановлэн романаз ик кулакъёс самой сюлмо но ужась муртъёс карыса суредамын.
 
Туала удмурт литератураын сыӵе дунъетъёслэсь палэнтӥськон мынэ ни. Кылсярысь, крестьянлэсь улонзэ но дунне валанзэ мур возьматэ Римма Игнатьева «Игнаш сайкемын» романаз — вот тае мон нимасал эпопея. Адямилэсь изьверлы берытскемзэ суреда Лия Малых «Усьты синъёстэ» романаз Офонь героезлэн биографиез пыр. Нош Михаил Атамановлэсь произведенизэ мистико-этнографический роман мон шуысал. Со гожтэмын православной святойёс сярысь житие кылдытон амалъёсты асэстыса. Роман туж чебер пӧрмемын, туж поэтической, синкылияськытэк лыдӟыны уг луы. Усто уж!

Анастасия Шумиловаез лыдӟыса, юзыр-кезьыр луисько! Татын но мед луоз кылбурез.

Здесь писала о лирических героинях удмуртских фольклорных песен, осторожно разбивающих себе сердце. А ещё я в конце прошлого года написала художественный текст, который вдохновлён этими самыми героинями. Потому что я и сама такая, мои милые сёстры из прошлого!

Оригинал на удмуртском выше, вот почти подстрочный перевод:

выходила в поле,
моя милая сестра,
пела, выдыхая свои чувства
в корни растений.
к зелёной траве прижималась,
моя милая сестра,
и из твоей руки выпадал зазубренный серп,
задевая сердце.
мысли, которые думала,
оставаясь одна,
тайком,
осторожно —
как они удержались внутри тебя,
моя милая сестра? —
заставляли
твои пальцы
бегать
по всему телу,
но не вышли наружу,
догорели внутри…
моя милая сестра,
не сердись на меня —
я часто смеялась над тобой,
а сама —
да я, оказывается, такая же.
да, вот, смотри:
я и сама —
то ничком, то навзничь —
прижимаюсь к кровати
из-за обжигающего подарка, что тайно взорвался внутри меня,
я и сама
без слов
рассказываю-плачу
из-за того, что из раны с зазубренными краями
бесшумно течёт боль.

22. Шкляев А. Г. Арысь аре. Удмурт литература даурлэн кожъёсаз: статьяос, тодэ ваёнъёс. Ижевск: Удмуртия, 2014.

Александр Григорьевич Шкляев — писатель но тодосчи-критик, удмурт литературалэсь но литераторъёслэсь улон-вылонзэ радъясь. Аслаз гожъямъёсаз, журналист сямен, со тырше писательёс сярысь кыӵе ке выльзэ гожтыны-поттыны, тунсыко учыръёс мадьыны.

Кылсярысь, тодаз вае, кызьы сое ӧтизы университетэ ужаны. Ветлэм Шкляев доры квартираяз вераськыны та пумысен ачиз Даниил Яшин дышетӥсь но кылбурчи. Яшинэз кылзӥськыкуз, Шкляевлэн синмыз усем тодосчилэн пась носкиез шоры. Яшин шӧдэм солэсь учкемзэ но возьдаськем, Шкляевез ас палаз берыктыны быгатымтэ ни. Соиз пумит кариськем, Яшин, пе, небыт адями вал, зӥбыны быгатӥсьтэм. Но Шкляевез мукетъёсыз зол ӧтиллям но, со лыктэм ик университетэ ужаны. Туж улэп история.

Книгалэн ӝыныез — со «Нимъёс, аръёс но книгаос» биобиблиографической указатель выллем гожтэм люкет. Отчы пыртэмын удмурт писательёслэн но литературоведъёслэн биографиоссы, печатлам но печатламтэ ужъёссы, удмурт лулчеберетэз эскерись ӟуч но кунгожсьӧр авторъёс но. Пӧлазы А. С. Пушкин сярысь но словарной статья вань: со аслаз журналаз поръёс но удмуртъёс сярысь статья печатлам вылэм.

Эшшо, монэ, кукмор диалектэн вераськись муртэ, кӧня ке вӧсь кариз Шкляевлэн Максим Прокопьевлэн творчествоез сярысь малпанэз: Прокопьев, пе, гожъяське вал вашкала удмурт кылын, соин Петр Поздеев литературатодосчи но кылбурчи, «вашкала удмурт кылэн» гожтэм текстъёссэ туала литературной кылэ берыктэм. Мон Прокопьевлэсь котькуд кылзэ валасько, со гожъяськиз кукмор диалектэн, кудӥныз али Татарстанысь кукмор удмуртъёс нуналлы быдэ верасько. Со «вашкала удмурт кыл», кудӥз периферийной удмуртъёслэн вераськоназы возиське, оло, туала литературной кыллэсь но кемагес улоз ай, кин тодэ…

Огъя вераса, А. Г. Шкляев дуно луэ литературной улон, писательёслэн кусыпъёссы, литературной быт темалы саклык висъямез понна. Книга удмурт кылын гожтэмын научно-публицистической стилен. Гожты вал куке но та писательской кухня сярысь роман, эх…

Туннэ Ижкарын ортчизы Кузебай Гердлы сӥзем лыдӟонъёс. Крезьгуръя колледжысь студентъёс туж мусо кырӟазы Гердэн люкам «Песни революции и гражданской войны» кырӟанъёсын сборникысь Василий Максимов-Чоньпиен берыктэм "Марсельезаез". Мон доклад верай Кузебай Герд но Кедра Митрейлэн кусыпъёссы сярысь. Кедраез Кузебай лыдъя вал секыт мылкыдъем, кезьыт, чурыт адямиен. Нош Кедра «Гудыри» газетлэн редакторез, «Гудыри» редакциын ужасьёсты (озьыен, ассэ но) трос ужаменызы висё, гожтэм, неврастениен - жадем но выгоревший адямиос соос вал. Сыӵе тӥни литературно-бытовой улон 1926-тӥ — 1928-тӥ аръёсы.

Чоньпи. Аслэм удмортлы марсельеза // Удмурт кылбуръёс : сборник вотских стихотворений на Глазовском наречии / [вступительная статья Т. Борисова]. - Вятка : Изд. Вят. губерн. отд. нар. образования, 1919 (Совет. Типо-литография). - 36 с. ; 21 см. - На удмурт. яз.

23. Ольга Семенова (Бородина). Пислэг сьӧры: повесть-фэнтези. Ижевск: Шелест, 2019. 72 б.

Ольга Бородиналэсь ненег буёло наив шӧмо суредъёсын тырмытэм 72 бамъем книгазэ лыдӟыкум малпаськи, кыӵе арлыдлы меда со тупасал. Асэным ӵошатоно ке, мон лыдӟыса будӥ совето вакытысь нылпи литератураез, нош отын анай-атайлэн образъёссы котьку возьматэмын вал умой паласен, ӟечен. Сыӵе тӥни цензор пушкам кылдӥз шӧдтэк шорысь.

Зэмзэ вераса, малы бен пичиысен уд вала, анай-атай сокем ик кылчинъёс ӧвӧл шуыса, соос огшоры адямиос, куспазы тэрисьтэм шудтэм карто-кышноос. Соин вӧсь луэмзэ чидатэк повестьысь анай кесяське нылыз шоры, нош нылаш ассэ весь со азьын янгыш каре. Анаезлэн лек луэмезлы чидатэк Натӥ пегӟе дорысьтыз но шӧдтэк шорысь урамын пумита вераськись тылобурдоез – пислэгез. Соиз валэктэ Натӥлы, семьяязы утиськись но берло ыштэм дуно арберизэс – дэмдорез шедьтӥзы ке, анай-атаез керетэмысь дугдозы. Дэмдорез утчаса пислэген Натӥ выжыкыл дуннее – вашкала ӵыжы-выжыоссы доры вуо, удмурт мифологиысь геройёсын нюръясько – Палэсмуртэн, Алангасарен, нош Пислэг воршудлэн пусэз соосты уте.

Дэмдорез шедьтыса пислэген Натӥен берытско Натӥлэн юртаз. Атаез но, анаез но ныллы лякытэн вазисько, ведь вашкала дэмдор табере соосыз ченгешонъёслэсь уте. Озьы пичи пинал быгатэмезъя семьяысь югдурез тупатӥз – deux ex machine сямен. Потэ вал кадь, конфликт таӵе капчи медаз, мукет сямен мед сэрттӥськоз вылэм. Но соку со луысал Евгения Некрасовалэн «Калечина-Малечина» (2018) магической реализмен, фольклорен пачыл, психологиез мур копась, олокыӵе но эмоциосты лыдӟись мурт пушкысь поттӥсь романэзлэн удмурт вариантэз. Ольга Бородиналэн пӧрмиз мусо выжыкыл – сыӵеез но, капчи, но со вакытэ ик лыдӟисез чабыштӥсь лыдӟетэз мед луоз удмурт литератураын. Час куспын лыдӟиське! Чаляк но капчи, чебер удмурт кылын гожтэм уж.

Мон но отын вал. Наив удмурт кылбурет сярысь выль статьялы зумыт материал шедиз шуыса кылзыса пуки. Мукет радын мыным пумит пукиз Виктор Леонидович Шибанов кылбурчи, кунэрес мылкыдыз ымныраз умой адскиз. Мар меда со малпаз?

Я сегодня была на презентации книги стихов «Шыпыртӥсь чуръёс» («Шепчущие строки») самодеятельных поэтов из уже легендарного ВК-объединения «Дунневыл меӵкытонъёс» (название сами переводите). Интересно, что сами авторы подчеркнуто не называют себя «кылбурчи» («поэт/поэтесса»), а используют слово «кылбурась» («пишущий стихи»). Дисклеймер в целом работает.

Вообще самодеятельная поэзия у нас процветает. У «Куара» есть видеолекция литературоведа Ларисы Дмитриевой о современной самодеятельной (наивной?) удмуртской поэзии, посмотрите, она с русскими субтитрами.

https://vk.com/video-174421444_456239226