МІНА́К (minak)
(назоўнік | мужчынскі род)
⠀
Тое, што і прахожы.
⠀
🔸Мінак паглядзеў на Мірона, як на пустое месца і пашыбаваў сабе далей. (Аўласенка).

❔Дык МІНАК ці ПРАХОЖЫ? Што вам больш па душы?
#словы_М

Пару дзён таму мы ладзілі апытанку наконт вашых улюбёных словаў — гэтае адно з самых частых, што вы дасылалі! 🥰

МАТУ́ЛЯ (matula)
(назоўнік | жаночы род)

Размоўнае слова, ласкальная форма: тое, што і мама. Гэтаксама перакладаецца на рас. як "мамаша", "маманя".

🔸Бацька не матуля: не пацалуе і не прытуле (прыказка).
#словы_М

МАРКО́ЦІЦЦА (markocicca)
(дзеяслоў | незакончанае трываньне)
⠀
Сумаваць, тужыць; журыцца.
⠀
🔸Лабановіч даўно ўжо маркоціўся па Цельшыне і вельмі быў рад, калі скончыліся экзамэны. (Колас).
🔸[Іра:] — Вечарамі буду сядзець і чакаць цябе, маркоціцца і сумаваць адна. (Сабаленка).
#словы_М

МÁПА (mapa)
(назоўнік | жаночы род)

Геаграфічная карта.

🔸Пан Студніцкі кроіць мапу, крэмзае задачы... (Колас).
🔸Акрэсьлены чырвоным алоўкам, шырэйшы зьверху і вузейшы зьнізу, ляжаў на мапе кавалак зямлі... (Караткевіч).
#словы_М

МАЦАВА́ЦЬ (macavać)
(дзеяслоў | незакончанае трываньне)

1. Трывала прымацоўваць.

🔸Чалавек шэсьць грузчыкаў завіхаліся на плятформах, мацавалі станкі сталёвымі тросамі. (Асіпенка).

2. У горнай справе — устанаўліваць крапеж.

🔸Аглядалі [крапеж] ў забоях дбайна, Як мацуюць шахцёры столь. (Аўрамчык).

3. У марской і авіяцыйнай справе — моцна прывязваць.

🔸Мацаваць трос.

4. Пераноснае значэньне: рабіць моцным, узмацняць.

🔸Мацаваць сяброўства.

5. Размоўнае слова: прабаваць моц чаго-н.

🔸[Наўмысьнік] паднімаўся кожны дзень на ўзровень сьцяны і кожны раз перад тым, як стаць мураваць, мацаваў нагой дошку пад нагамі. (Чорны).
#словы_М

А аб чым марыце вы? 🌠

МÁРА (mara)
(назоўнік, жаночы род)

1. Тое, што створана ўяўленьнем, фантазіяй; дзейнасьць ўяўленьня, фантазіі.

🔸З рэальнага грунту разважаньня Лабановіч паволі зьехаў у павабны край прыгожых мар. (Колас).

2. Жаданьне, імкненьне.

🔸Вышэй! Яшчэ вышэй! Няма ў пілота іншай мары. (Крапіва).
🔸Камандзірава мара памалу збывалася: ужо напалову конны атрад мог хадзіць у даволі далёкія рэйды. (Брыль).

3. Аб чым-н. нерэальным, неіснуючым, што не адбылося.

🔸Пустыя мары.

4. У значэньні выказніка, размоўнае слова: аб чым-н. незвычайна прыгожым, жаданым; вышэйшая ацэнка чаго-н.

🔸Ня туфлі, а мара.
#словы_М

МАЛЯЎНÍЧЫ (malaŭničy)
(прыметнік, мужчынскі род)

Прыгожы, эфэктны з пункту гледжаньня мастака.

🔸Высеўка падрабязна расказваў нам пра возера Нарач, якое ляжыць у маляўнічай катлавіне. (Гурскі).
🔸Парог пераступіла даволі фацэтная і маляўнічая постаць .. чалавека. (Колас).
#словы_М

МІТУСÍЦЦА (mitusicca)
(дзеяслоў, незакончанае трываньне)

1. Хутка і бесьперастанку перамяшчацца ў розных напрамках.

🔸На вуліцы мітусіліся людзі, шмыгалі ў розныя бакі аўтамашыны. (Пянкрат).
Дзяўчына ў чоўне так мітусілася, што некалькі разоў ледзь не перакуліла яго. (Маўр).

2. Бязладна праносяцца, зьяўляцца і хутка зьнікаць у памяці.

🔸Думкі мітусіліся, усё ніяк не маглі прыйсьці да ладу. (Лынькоў).
🔸У галаве мітусілася рознагалосіца гукаў, чутая ўдзень на полі. (Мележ).

3. Увіхацца, мітусьліва рабіць што-н.

🔸[Шымет] яшчэ некалькі гадзін мітусіўся каля згружанай цэглы, папраўляў клеткі, нешта пералічваў, перамерваў. (Кулакоўскі).

4. Мільгацець перад вачыма.

🔸Цяпер не чытае стары, вочы ня так добра бачаць, літары мітусяцца і расплываюцца. (Крапіва).
#словы_М

МАХРЫ́ (machry)
(назоўнік, множны лік)

1. Свабодна зьвісаючыя ніткі, шнуркі па краях якой-н. тканіны.

🔸У Івана на шыі новы шалік, шэранькі, а ў Куліны — вялікая кашміровая хустка з махрамі. (Гарэцкі).

2. Шматкі, абвіслыя касмылі па краях чаго-н.

🔸Днём яшчэ цёпла, а ночы — волкія, важкія, і ранкамі на бульбоўніку, на траве белыя махры інею. (Мележ).
#словы_М

МІТРЭ́НГА (mitrenha)
(назоўнік, жаночы роды)

Размоўнае слова: трывога, неспакой, сумятня, разлад.

🔸Там, на суседзкім агародзе, перапалох, мітрэнга. – Анютка, галубка! Пакліч свайго Васіля, няхай бярэ пілу і сякеру і хутчэй бяжыць сюды!.. – на ўсю сядзібу лямантуе баба Алімпа. (Васілевіч).
🔸[Грасыльда:] Заснуць я, сын, тады не магла. Такая мітрэнга ў вёсцы.. [Бацьку] у штаб да Міхала цягалі, на калені ставілі, аўтамат чорны да грудзей прыстаўлялі. (Пташнікаў).
🔸Мітрэнга цэлая ўзьнялася пасьля слоў чарнявага.. Усе паўставалі, хто сядзеў. Ігнась паспрабаваў загаманіць, але яго не слухалі. Гаварылі ўсе. (Мурашка).
#словы_М