Тропарь Преподобному Антонию Черноезерскому, глас 4:
Яко избранник Божий, Антоние, прославися на езере Черном, не иский славы от человек, и Бог прослави тя в чудесах Своих. Тем же молим тя, не престай молитися о всех, с верою имя твое призывающих.

#церковный_календарь

Тропарь Преподобному Максиму Греку, глас 8
Заре́ю Ду́ха облиста́емь,/ вити́йствующих богому́дренно сподо́бился еси́ разуме́ния,/ неве́дением омраче́нная сердца́ челове́ков све́том благоче́стия просвеща́я,/ пресве́тел яви́лся еси́ правосла́вия свети́льник, Макси́ме преподо́бне,/ отону́дуже ре́вности ра́ди Всеви́дящаго,/ оте́чества чужд и стра́нен, Росси́йския страны́ был еси́ пресе́льник,/ страда́ния темни́ц и заточе́ния от самодержа́внаго претерпе́в,/ десни́цею Вы́шняго венча́ешися и чудоде́йствуеши пресла́вная./ И о нас хода́тай бу́ди непрело́жен,// чту́щих любо́вию святу́ю па́мять твою́.

#церковный_календарь

Тропарь преподобномученикам Гуслицким Серафиму Булашову, Иоасафу Крымзину и Петру Мамонтову, глас 4:
Днесь светло красуется обитель Гуслицкая/ прославляющи преподобных мученик своих,/ Серафима, Иоасафа и Петра,/ тии бо, гонений многоразличных и смерти не убоявшеся,/ веры Православныя твердии исповедницы явишася/ и, крест страдания на месте мучения в Бутове подъемше,/ венцы нетленными от Христа увязошася./ Темже, новомученицы святии,/ молите Всемилостивого Спаса/ долгов разрешения нам даровати/ и душам нашим велию милость.

#церковный_календарь

Тропарь Собору Новомучеников и Исповедников Церкви Русской, глас 4:
Днесь ра́достно лику́ет Це́рковь Ру́сская,/ я́ко ма́ти ча́да, прославля́ющи новому́ченики и испове́дники своя́:/ святи́тели и иере́и,/ ца́рственныя страстоте́рпцы, благове́рныя кня́зи и княги́ни,/ преподо́бныя мужи́ и же́ны и вся правосла́вныя христиа́ны,/ во дни гоне́ния безбо́жнаго/ жизнь свою́ за ве́ру во Христа́ положи́вшия/ и кровьми́ и́стину соблю́дшия./ Тех предста́тельством, Долготерпели́ве Го́споди,// страну́ на́шу в Правосла́вии сохрани́ до сконча́ния ве́ка.

#церковный_календарь

Тропарь Священноисповеднику Леонтию Стасевичу, Михайловскому архимандриту, глас 5
Яко истинный ученик Христов, плоть распял еси со страстьми и похотьми, житием своим Живодавца проповедуя, возшел еси от образа к подобию, преподобне отче Леонтие, и мучительми в нечистоты погружаемый, чистым сердцем и усты вопиял еси: Христос воскресе, братие!

#церковный_календарь

Тропарь Собору вселенских учителей и святителей Васи́лия Великого, Григо́рия Богослова и Иоа́нна Златоустого, глас 4
Я́ко апо́столов единонра́внии/ и вселе́нныя учи́телие,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.

#церковный_календарь

Тропарь Сретению Господа Бога и Спаса нашего Иисуса Христа, глас 1:

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,// да́рующаго нам воскресе́ние.

#церковный_календарь

Тропарь Святителю Феодосию, архиепископу Черниговскому, глас 4:

Преудобре́н во архиере́ех, святи́телю Феодо́сие,/ был еси́ свети́ло своему́ ста́ду,/ та́же преста́вился еси́ в ве́чныя оби́тели,/ умоли́ у Престо́ла Царя́ Сла́вы изба́витися нам от находя́щих на ны зол,// и спасти́ся душа́м на́шим, свя́те, моли́твами твои́ми.

#церковный_календарь

Тропарь Священномученику Василию Надеждину, глас 2
Кро́тким нра́вом Христо́вым измла́да укра́шенный, за́поведи Бо́жия возлюби́в все́ю душе́ю и все́м се́рдцем, яви́лся еси́ па́стве твое́й па́стырь до́брый, я́коже и Бо́г Спа́с на́ш, ду́шу твою́ полага́яй за о́вцы твоя́. Моли́ Человеколю́бца Бо́га, о́тче священному́чениче Васи́лие, спасти́ся душа́м на́шим.

#церковный_календарь

Тропарь Великомученику Феодору Стратилату, глас 4
Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре:/ ору́жиями бо ве́ры ополчи́лся еси́ му́дренно/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою// при́сно ублажа́ем.

#церковный_календарь