Цхинвалы такситӕй арӕхдӕр пайда кӕнын райдыдтой

🔻Кӕд раздӕр бонмӕ 1,5 мин заказы уыд, уӕд ныр 2 минмӕ дӕр схӕццӕ вӕййынц, радзырдта «Сапӕ»-йӕн автопарктӕй иуы хицау Хъӕцмӕзты Мэлс.

Горӕты ис цыппар таксийы фирмӕйы. Сӕ иу фарон фӕзынд. Йӕ хицау Ходы Светланӕйы хъуыдымӕ гӕсгӕ, такси арæхдæр уымæн бацагурынц, ӕмӕ горӕты ӕгӕр бирӕ машинӕтӕ ис ӕмӕ фистӕгæй цӕуджыты хъыгдарынц.

💬 «Кӕд-иу раздӕр сывӕллӕтты ӕдасӕй фистӕгӕй скъоламӕ ӕрвыстой, уӕд ныр фӕндӕгтӕ афтӕ байдзаг сты, ӕмӕ сӕ цотӕн такси баххуырсынц. Афтӕмӕй сӕм сӕ зӕрдӕ къаддӕр ӕхсайы», — зӕгъы сылгоймаг.

Ис, ӕндӕр хъуыдыйыл хӕст чи у, ахӕмтӕ дӕр. Зӕгъӕм, хӕдзары машинӕ кӕмӕ ис, уыдон дӕр арӕх ӕрбадзурынц таксимӕ. Уымӕн ӕмӕ фӕндагыл цӕуыны ӕгъдӕуттӕ хорз чи нӕ зоны, уыдон сбирӕ сты. Семӕ фембӕлын та тӕсаг у.

💬 «Уыимӕ адӕмы фылдӕр хайы дӕр нӕ фӕнды машинӕ ӕлхӕнын, зилын ӕм. Фӕлӕ уӕддӕр сӕ нымӕц рӕзы. Иннӕ та ма уый, ӕмӕ ӕхсӕнадон транспорты уавӕр цӕрджыты зӕрдӕмӕ нӕ цӕуы. Ӕмӕ уӕд такси бацагурынц», — радзырда Хъӕцмӕзты Мэлс.

➡️ Ныртӕккӕ горӕты таксийыл ацӕуыны рӕстӕмбис аргъ у 100 сомы.

⚫️ Дæхи «СапÆ»-йыл бафысс

Михайловскæйы иу мин цæрæгæй фылдæр æртыккаг бон сты æнæ донæй

🔻Плийы-фырты, Яровойы æмæ Амайджыты уынгты цы фондзуæладзыгон хæдзæрттæ ис, уым дон нал цæуы 9 мартæй нырмæ. Уыцы бон аварион куыстытæ кæй кодтой, уый аххосæй сæм электроэнерги нал лæвæрдтой, донцъирæнтæ сæ кусынæй ныллæууыдысты. Изæрмæ куыст фесты, рæстæгмæ дон дæр цæуын райдыдта, фæлæ парахатæй нæ.

Дыккаг райсом фыццаг æмæ дыккаг уæладзгуыты дон æрмæст гæзæмæ тагъди. Уæлдæр чи цæры, уыдон та бынтондæр æнæ донæй баззадысты. Куыд сбæрæг, афтæмæй, зæххы арфы чи ис, уыцы донцъирæн фехæлд.

Абон райсомæй æрæвнæлдтой донцъирæн ивынмæ. Куыст цæуы зæххæй 180 метры дæлдæр.

💬 «36 хæтæлы дзы хъæуы сисын. Сæ алкæйы дæргъ дæр у 180 метры. Ома, хæтæл сисынц, 6 метры дæргъæн хай дзы разилынц, стæй йыл ногæй схæцынц æмæ та иу уыййас хай разилынц. Æрмæст уый фæстæ ис ног донцъирæн сæвæрæн. Хæтæлтæ фæстæмæ дæр ахæм хуызы æрисынц. Куыст цæуы. Фæлæ, хъыгагæн, ахæм авари аиуварс кæнын æнцон нæу. Цалдæр сахаты фæстæ адæммæ уыдзæн дон», — радзырдта «Сапæ»-йæн паддзахадон унитарон куыстуат «РПВВ»-йы разамонæг Хъараты Тимур.

Закъонмæ гæсгæ бынæттон хиуынаффæйадон оргæн аварийы фæстæ суткæйы дæргъы хъуамæ бынатмæ баласа дон. Фæлæ уый нырма нæ бакодтой.

⚫️ Дæхи «СапÆ»-йыл бафысс

Дыккаг æппæтуæрæсеон фестиваль «Вахтангов. Путь Домой» райдайдзæн 6 июлы

🔻Фестиваль байгом уыдзæн уынгты театрты рацыдæй. Уымæй цалдæр бон раздæр Дзæуджыхъæуы центры скусдзæн æрмадз «Картония». Уым цæрджыты бон уыдзæн сæхицæн дарæс бацæттæ кæнын.

Цæгат Ирыстонмæ цавæр спектакльтæ æрхæсдзысты, уыдоны эксперттæ æвзæрстой ноябрæй нырмæ. Фыццаг ацæудзæн мæскуыйаг театр «Мастерская Петра Фоменко»-йы спектакль «Совершенно невероятное событие (Женитьба в двух действиях)». Программæйы ма сты Санкт-Петербург, Казань, Улан-Уде, Элиста æмæ Рязаны театрты равдыстытæ.

Уынгты театртæ се сфæлдыстад адæмы рæгъмæ рахæсдзысты Хетæгкаты Къостайы номыл парчы. Спектакльтæй иу — Александр Пушкины æмдзæвгæмæ гæсгæ æвæрд «Фауст. Все утопить» — равдисдзысты цадыл.

💬 «Доныхъазты ракæндзысты хæстæг цадмæ, спектаклы спайда кæндзысты бæлæгътæй. Артисттыл сæ дарæсы бын уыдзæн ирвæзынгæнæн жилеттæ. Бынаты уыдзысты æнæнхъæлæджы уавæрты кусæг службæтæ дæр», — радзырдта уынгты театрты программæйы арт-директор Мария Литвинова.

Фестиваль фæуыдзæн 13 июлы. Артæй спайда кæнгæйæ ауадздзысты стыр шоу. Уымæй уæлдай уыцы бон уыдзæн концерт. Цы фæтк сфидар, уымæ гæсгæ лæвæрд æрцæудзысты премитæ Цæгат Ирыстон-Аланийы культурæйы рæзты, сфæлдыстады æмæ социалон къабазы сгуыхтдзинæдты тыххæй. Премийы лауреатты сбæрæг кæндзæн экспертты совет, кандидатты нæмттæ та зæгъдзысты республикæйы разамонæг æмæ хицауад. Æдæппæтæй ратдзысты æртæ премийы фæйнæ 100 мин сомы.

⚫️ Дæхи «СапÆ»-йыл бафысс

Абоны цаутыл афӕлгӕсгӕйӕ, уӕ цӕст цавӕр ныхӕстыл ӕрхӕцыд?

➡️ Ацы изӕр уӕ зонгӕ кӕнӕм ног дзырдимӕ — ӕмдзӕрӕн.

⚫️ Дæхи «СапÆ»-йыл бафысс

Алы райсом пайдаимӕ!

📆 Кӕд цард чиныг у, уӕд йӕ бонтӕ — сыфтӕ. Чиныджы сыфтыл та ӕмбисӕндтӕ дӕр вӕййы.

#ӕлвӕст_хъуыдытӕ

Æхсæз адæймаджы азымджын кæнынц, Дзæуджыхъæуы рекреацион зонæйы 480 милуан сомы аргъ зæххытæ сæхирдыгæй кæй фæкодтой, уымæй

🔻Федералон æмæ муниципалон зæххытæ адавтой тæрхондоны уынаффæтæ аивгæйæ. Мæнг документты руаджы зæххытæ сæхиуыл ныффыстой. Афтæмæй зиан æрхастой 477 милуан сомы, фехъусын кодтой Æдасдзинады федералон службæйы цæгатирыстойнаг управленийы. «Сапæ»-йы бæрæггæнæнтæм гæсгæ, цæстфæлдахæн миты азымджын кæнынц республикæйы дыууæ цæрæджы æмæ Ростовы облæсты цыппар цæрæджы.

Уыдон, барадхъахъхъæнджыты хъуыдымæ гæсгæ, сарæзтой æндæр мæнг гæххæттытæ дæр æмæ Сбербанчы кредитон фæрæзтæй адавтой 10 милуанмæ 'ввахс.

➡️ Хъуыддагмæ æркæсдзæн прокуратурæ, уый фæстæ йæ арвитдзысты тæрхондонмæ.

⚫️ Дæхи «СапÆ»-йыл бафысс

Гуырдзыстоны раздæры президент Михаил Саакашвилийæн рахастой фараст азы ахæстоны фæбадыны тæрхон

🔻Тбилисы горæты тæрхондоны уынаффæмæ гæсгæ паддзахады æхца хардз кæныны тыххæй Михаил Саакашвили хъуамæ 9 азы уа ахст. Уый тыххæй фехъусын кодта телеканал «Мтавари архи».

Ацы хъуыддаджы Гуырдзыстоны раздæры президенты азымджын кæнын райдыдтой 2014 азы. Слестгæнджытæ куыд зæгъынц, афтæмæй бюджеты фæрæзтæй йæхицæн æлхæдта пиджактæ, сахæттæ, бафыста йæ фырты ахуырæн, схардз кодта æхца косметикон процедурæтæн, афтæ ма хаццоны иста зынаргъ машинæтæ æмæ хæдтæхæг. Зиан æрхаста 3,2 милуан долларæй фылдæр.

Йемæ æмдзæхдон уыд паддзахадон хъахъхъæнынады сæрмагонд службæйы раздæры разамонæг Теймураз Джанашия дæр. Тæрхондон ын снысан кодта 300 мин лирæйы (100 мин доллары бæрц) ивар.

📄 Михаил Саакашвилийы æрцахстой 2021 азы октябры, Украинæйæ куы сыздæхт, уый фæстæ. Байгом ыл кодтой фондз уголовон хъуыддаджы. Уыдонæй йын дыууæйы фæдыл фæсаууонмæ стæрхон кодтой 6 азы ахæстоны фæбадын.

⚫️ Дæхи «СапÆ»-йыл бафысс

Цӕгат Ирыстоны цӕрджытӕ транспортон хъалон хӕс дарынц 780 милуан сомы

🔻Республикӕйы 95 мин цӕрӕджы транспортон хъалонӕн хӕс дарынц. Уый тыххӕй фехъусын кодта Сергей Меняйло. Куыд бафиппайдта, афтӕмӕй уый аххосӕй республикӕйы хидтӕ ӕмӕ фӕндӕгты арӕзтадӕн, стӕй лӕууӕн бынӕттӕм базилынӕн фаг фӕрӕзтӕ нӕ разынд.

💬 «Транспортон хъалон у нӕ республикӕйы фӕндагон инфраструктурӕйы рӕзт. Не 'ппӕтӕй дӕр аразгӕ у. Хорз фӕндӕгтӕ алкӕйдӕр хъӕуынц: шофырты, фистӕгæй цӕуджыты, ӕхсӕнадон транспорты бӕлццӕтты», — загъта Меняйло.

Йӕ ныхасмӕ ма бафтыдта, фӕндагон инфраструктурӕ ӕмӕ хъалонты 'хсӕн хуымӕтӕг бастдзинад кӕй ис, уый. Бюджетмӕ цас фылдӕр хъалонтӕ цӕуы, уыйбӕрц фӕндӕгтӕ ӕмӕ сӕ алыварс фӕзуат кӕны хуыздӕр, фӕндагон змӕлд та — ӕдасдӕр. 

➡️ Сӕрмагонд ӕмбырды регионы разамонӕг автоинспекцийӕ, хъалонисӕн ӕмӕ пъырыстыфты службӕтӕй бадомдта хӕстӕгдӕр рӕстӕг хъуыддагыл бакусын, хӕсджынтимӕ карздӕр уӕвын.

⚫️ Дæхи «СапÆ»-йыл бафысс

Телерадиокомпани «Ир» ӕмӕ уӕрӕсейаг радиостанцӕ «Орфей» хъусын кӕндзысты кӕрӕдзийы музыкӕ

🔻Хуссар Ирыстоны телерадиокомпани «Ир» бафыста бадзырд радиостанцӕ «Орфей»-имӕ. Ахӕм хъӕппӕрис бахаста уӕрӕсейаг радиостанцӕ. Бадзырд ӕххӕстгонд цӕудзӕн афӕдз.

Йӕ фӕлгӕты «Орфей» лӕвар дӕтты уацмыстӕ: фольклорон музыкæ, советон композиторты зарджытӕ, сывӕллӕттӕн радиобакастытӕ. Хуссар Ирыстоны радио та ратдзӕн ирон адӕмон зарджытӕ.

💬 «Ныртӕккӕ ӕмгуыст кӕнӕм Бразили, Индонези, африкӕйаг бӕстӕты ӕмӕ Киргизийы радиостанцӕтимӕ. Ныр та кусдзыстӕм Хуссар Ирыстонимӕ. Уый нын ӕхсызгон у», — радзырдта «Сапӕ»-йӕн радиостанцӕ «Орфей»-ы генералон директоры хӕдивӕг Юлия Полякова.

➡️ Хӕстӕгдӕр рӕстӕг радио «Ир»-ы къуыри иу хатт цӕуын райдайдзӕн уӕрӕсейаг муызыкӕйы тыххӕй программӕ. Цӕудзӕн сахат. Ныридӕгӕн хуссарирыстойнаг телерадиокомпанийы архив фӕхъӕздыгдӕр бирӕ уацмыстӕй, се 'хсӕн 1940-1950 азты кинонывты музыкӕ, фортепианойӕн джазы сюитӕтӕ. Нырыккон уӕрӕсейаг зарджытӕ сæм нӕма ӕрбарвыстой.

⚫️ Дæхи «СапÆ»-йыл бафысс

Ӕнӕивгӕ хъуыддӕгтӕ дӕр разыны: бӕлӕстӕ ӕхсӕдыны сезон райдыдта загъдӕй

🔻Дзусы-фырты уынджы 30 хӕдзары цӕрджытӕ хъаст кӕнынц, сӕ кӕрты сын дзӕбӕх ӕмӕ фидар бӕлӕстӕ кӕй калынц, уымæй. Сӕ иуӕн сын фарон йӕ хус къалиутӕ алыг кодтой, афӕдзмӕ йыл чи фӕзынд, уыцы къалиутӕ та кӕй базӕронд ӕмӕ бахус сты, уый сӕм диссаг кӕсы. Цы ӕнгуз бӕлас акалдтой, уый ӕрыгон бӕлас уыд, зӕгъынц цӕрджытӕ.

💬 «Афтӕ нын загътой, ома, цӕрджытӕй кӕйдӕр хъыгдардта. Чи зоны, кӕмӕдӕр ахӕм курдиат уыдис. Фӕлӕ бӕлас акалыныл хъуамӕ цӕрджытӕ иууылдӕр сразы уой. Махӕй ахӕм бар ничи райста. Кӕрт цъӕх фӕлыстæй хъуаг у, ныр та ма нын нӕ бӕлӕстӕ дӕр калынц», — мӕсты кӕнынц уыдон.

Адӕммӕ фарстатӕ уыд бӕлас калынӕн бардӕттӕг гӕххӕтты тыххӕй дӕр. Уӕвгӕ ис, фӕлӕ йӕ 2024 азы рафыстой. Сӕ хъуыдымӕ гӕсгӕ, фароны гӕххӕттӕн йе 'мгъуыд фӕци. Администрацийы кусджытӕ та зӕгъынц, гӕххӕттӕн ӕмгъуыд нӕй, зӕгъгӕ.

➡️ Дзӕуджыхъӕуы администрацийы «Сапӕ»-йӕн куыд бамбарын кодтой, афтӕмӕй кӕрты куыстой «Владзеленстрой»-ы специалисттӕ. «Владлес-Экологи»-йы эксперттӕ та скодтой хатдзӕг: калд бӕлас уыд аварион ӕмӕ адӕмӕн тӕссаг. Уыцы бон ма специалисттӕ хъуамӕ бахсæстаиккой ноджы 17 бӕласы, фӕлӕ адӕм сӕ машинӕтӕ газоны цур кӕй ӕвӕрынц, уый бӕлӕсты «аирвӕзын» кодта.

⚫️ Дæхи «СапÆ»-йыл бафысс

Абоны цаутыл афӕлгӕсгӕйӕ, уӕ цӕст цавӕр ныхӕстыл ӕрхӕцыд?

➡️ Ацы изӕр уӕ зонгӕ кӕнӕм ног дзырдимӕ — пъырыстыф.

⚫️ Дæхи «СапÆ»-йыл бафысс

Алы райсом пайдаимӕ!

📆 Кӕд цард чиныг у, уӕд йӕ бонтӕ — сыфтӕ. Чиныджы сыфтыл та ӕмбисӕндтӕ дӕр вӕййы.

#ӕлвӕст_хъуыдытӕ

«Мамысон»-ы курорт байгом кӕныны бон автобусты лӕвар аласдзысты 500 адӕймаджы

🔻14 мартъийы автобустӕ 9 сахатыл лӕудзысты ирон театры цур, Къостайы проспекты 'рдыгӕй. Куыд дзаг кӕной, афтӕ цӕудзысты Мамысонмӕ.

💬 «Ацӕуӕн ис лӕвар. 500 адӕймагӕн самал кодтам транспорт. Кӕй фӕнды, уыдон кӕд фылдӕр уой, уӕд ракӕндзыстӕм уӕлӕмхасӕн автобустӕ», — радзырдтой «Сапӕ»-йӕн транспорты комитеты.

Курорт байгом кӕныны бӕрӕгбоны мадзӕлттæ куы фæуой, уæд адӕмы раласдзысты фӕстӕмӕ.

➡️ «Сапӕ» ма куыд фыста, афтӕмӕй Дзӕуджыхъӕуӕй Масысонмӕ фӕткмӕ гӕсгӕ цӕудзӕн автобус: алы бон дӕр Пушкинскийы автовокзалӕй 9 ӕмӕ 16 сахатыл.

⚫️ Дæхи «СапÆ»-йыл бафысс

Черменыхъӕуы электрон тыхӕй хъыгдардбаййафӕг лӕппуйӕн Сочийы кӕнынц реабилитацион мадзӕлттӕ

🔻11-аздзыд Букуылты Муратӕн фӕткмӕ гӕсгӕ реабилитаци кӕнынц бальнеологон курорт «Мацеста»-йы. Физиотерапевт ын снысан кодта бӕлвырд медицинон мадзӕлттӕ. Зӕгъӕм, сыгъд буары хӕйттӕн сондонгуыры хи найын, дзӕбӕхгӕнӕн ӕлыгӕй аппликацитӕ кӕнын ӕмӕ ӕндӕртӕ. Уый тыххӕй «Сапӕ»-йӕн фехъусын кодта лӕппуйы мад Букуылты Нонӕ. 

💬 «Мӕйы кӕромӕ ам уыдзыстӕм. Уый фӕстӕ хатдзӕгты тыххӕй фехъусын кӕндзынӕн, чи нӕ дзӕбӕх кӕны, уыцы дохтырӕн Дӕллаг Новгородӕй. Уӕд нын зӕгъдзӕн, Дӕллаг Новгороды клиникӕмӕ нӕ тӕхын хъӕуы ӕви нӕ, уый. Ахӕм операцитӕ кæмæн скӕнынц, уыдоны арӕх ногӕй ссӕуын кӕнынц афӕдзы фӕстӕ. Фӕлӕ Мураты сыгъдтытӕ тынг арф сты, ностӕй баззадысты. Ӕмӕ нын цы дзуапп ратдзӕн, уымӕ ӕнхъӕлмӕ кӕсдзыстӕм», — зӕгъы Нонӕ.

➡️ «Сапӕ» куыд фыста, афтӕмӕй Мураты электрон тых бахъыгдардта 2024 азы 22 сентябры Черменыхъӕуы скъолайы кӕрты. Цалдӕр боны фӕстӕ лӕппуйы арвыстой Дӕллаг Новгороды клиникӕмӕ. Уым ын иртасӕн центры специалисттӕ сыгъд буары хӕйттæ баивынӕн скодтой цыппар операцийы.

⚫️ Дæхи «СапÆ»-йыл бафысс

Кокайты Артуры фӕнд кӕнынц Цӕгат Ирыстоны адӕймаджы бартӕ хъахъхъӕнӕг ӕххӕстбарджын минӕварӕй снысан кӕнын

🔻Регионы разамонӕг Сергей Меняйло парламентмӕ бахаста Кокайты Артуры Цӕгат Ирыстоны адӕймаджы бартӕ хъахъхъӕнӕг ӕххӕстбарджын минӕварӕй снысан кӕныны хъӕппӕрис. Ныртӕккӕ у сывӕллӕтты омбудсмен.

➡️ 2020 азӕй фӕстӕмӕ республикӕйы адӕймаджы бартӕ хъахъхъӕнӕг ӕххӕстбарджын минӕвар у Цгъойты Тамерлан. 2025 азы йӕ куысты ӕмгъуыд фӕвӕййы.

⚫️ Дæхи «СапÆ»-йыл бафысс

Ӕгкацаты Станиславмӕ фӕдзырдтой Уӕрӕсейы иугонд командӕмӕ футболӕй

🔻Ацы мæй футболон ӕмбырдтӕм фӕдзырдтой 31 спортсменмӕ. 19 мартъийы иугонд командӕ ахъаздзӕн Гренадӕйы, 25 мартъийы та — Замбийы командӕтимӕ. Дыууӕ матчы дӕр уыдзысты Мӕскуыйы стадион «Динамо»-йы.

Ноябры дӕр Сталислав уыд хуынд иугонд командӕмӕ. Уӕд хъазыдысты Брунейы командӕимӕ ӕмӕ йӕ хызы иунӕг порти дӕр нӕ батахт.

⚫️ Дæхи «СапÆ»-йыл бафысс

Мӕздӕджы районы цӕрӕгыл байгом кодтой уголовон хъуыддаг, Сырх чиныгмӕ хаст кӕсаг электрон ӕнгуырӕй кӕй ахста, уый тыххӕй

🔻Хъызлары 39-аздыд цӕрӕджы фӕндыд кӕсаджы фыдӕй йӕхи фенын ӕмӕ январы тар ӕхсӕвтӕй иуы араст Терчы былмӕ. Цӕмӕй йӕхицӕн зын ма скӕна, уый тыххӕй ма йемӕ электрон ӕнгуыр рахаста. Фӕлӕ йӕ фӕндтӕй ницы рауад, пъӕлицӕ ӕмӕ йын Росрыболовствойы специалисттӕ йӕ фӕндаг аивтой.

«Сапӕ» куыд базыдта, афтӕмӕй экспертизӕйы хатдзӕгтӕм гӕсгӕ, нӕлгоймаг ахста каспиаг кумжу (каспиаг ӕргъай кӕсаг). Хаст у Уӕрӕсейы Сырх чиныгмӕ.

➡️ Нӕлгоймагыл байгом кодтой уголовон хъуыддаг.

⚫️ Дæхи «СапÆ»-йыл бафысс