Бүгүҥҥү отчуоппут Хорулаттан саҕаланна. Тус боппуруостарынан приемҥа 7 киһи сырытта. Отчуоттуур мунньахха 63 киһи кытынна. МФЦ үлэһиттэрэ ыйга 1-дэ нэһилиэктэргэ сылдьалларыгар баҕа санааларын эттилэр. МФЦ-лар социальнай көмүскэл управлениетын, ыччат управлениетын десанын, автопробегы кытта нэһилиэктэргэ сырыттылар. Үүт туттарыыта хайдах буолуоҕун, харчы ынах төбөтүгэр эбэтэр үүккэ бэриллэрин ыйыттылар. Сүөһү иитиитин сири оҥорууну, нүөлсүтүүнү кытта тэҥҥэ дьүөрэлээн сайыннарарга этии киирдэ. Саҥа хочуолунай тутуллуо дуо диэн ыйыттылар, өрөспүүбүлүкэҕэ үп кырыымчык, онон билиҥҥитэ тутуллубат диэн ЖКХ филиалын салайааччыта А.С.Тихонов хоруйдаата. Водокачка носуоһа мөлтөөбүтүн ЖКХ-лар көрөн уларытыахтара. Хорула суолун тэҥнээһини, хаары астарыыны астымматтарын эттилэр, манна ИСУ салайааччыта Константин Иванов, бэдэрээтчит Алексей Протопопов хоруйдаатылар. Хапсаҕайга тренер штатын туруорустулар. Мунньах кэнниттэн федеральнай бырагырааманан өрөмүөннэммит Хорула оскуолатын көрдүбүт.
Күнүс Хатыҥ Сыһыыга үлэлээтибит. Тус боппуруостарынан приемҥа 13 киһи сырытта. Отчуоттуур мунньахха 78 киһи кытынна. Доруобуйа харыстабылыгар, тыа хаһаайыстыбатыгар, музейга, уопсай дьиэ өрөмүөнүгэр, кулууп тутуутугар сыһыаннаах ыйытыктар киирэн хоруйданнылар. Эдэр исписэлиистэр уопсай дьиэлэрин бэдэрээтчит бэйэтигэр ылыммыт гарантиятын быһыытынан өрөмүөннүөҕэ. Ааспыт күһүн Таркаайы нэһилиэгэр лесничество үлэһиттэрэ кыттыылаах өртөөһүн барара былааннаммыта эрээри, ыкса күһүн тохтообокко ардаан, онтон хаардаан, кыайан өртөммөтөҕө. Быйыл нэһилиэк дьаһалтата манна ылсан үлэлиэҕэ. Уот мөлтөҕүн эттилэр, подстанция уларыйара уонна СИП-кабельга уларытыллыан наадатын ыйыттылар. Ньурбатааҕы РЭС бэрэстэбиитэлэ сөптөөх уот кыамтатын биэрэ олоробут, реестринэн көрөн подстанцияларга уонна СИП-кабельга көһөрүүгэ үлэлии сылдьабыт диэн хоруйдаата.
Киэһэ Дьаархаҥҥа отчуоттаатыбыт. Приемҥа 9 киһи сырытта, отчуоттуур мунньахха 63 киһи кытынна. Бааһынай хаһаайыстыба салайааччыта Г.Д.Прокопьев СВО-ҕа кыттыбыт уоллааҕынан сибээстээн, үүт туттарарга медосмотрга уонна Роспотребнадзор көҥүлүгэр чэпчэтии баар буолуоҕун туһунан ыйытта. Бэйэбит быраастарбыт тоҕо үлэлии кэлбэттэрин, Дьаархан оскуолатын дириэктэрэ хаһан быһаарылларын, үүт туттарыытын туоһуластылар. Үүт собуота кыра, "Дьулуур" дириэктэрэ С.Б.Андреева олохтоох дьаһалта көмөтүнэн 1 мөл. солк. үлэни ыыппыттарын, улуустан эбии көмө наадатын эттэ. Улуус дьаһалтатын экономикаҕа управлениетын уонна т/х департаменын кытта үлэлэһэллэригэр эттим. Федеральнай суолга дьиэ кыыла диэн суол бэлиэлэрин туруорарга, сааскы халааны утары үлэни ыытарга эттилэр. Подстанция үрдүк сиргэ көһүөхтээҕэ көһөрүллэ илик. 5 уонна итинтэн элбэх оҕолоох ыаллары, тулаайах оҕолору дьиэнэн хааччыйыы туһунан уо.д.а. ыйытыктар киирэн хоруйданнылар. Бүгүҥҥү үс нэһилиэккэ отчуокка олохтоохтор улуус үлэтин биһирииллэрин биллэрдилэр.
Бүгүн улуус оробуочай бөлөҕүн салайан Хаҥаласка үлэлии сылдьабыт. Хаҥаластан видеоконференц-сибээс нөҥүө СӨ Бырабыыталыстыбатын Бэрэссэдээтэлин солбуйааччыта Георгий Михайлович Степанов салайан ыыппыт сүбэ мунньаҕар кытынным. Олунньу 17-22 күннэригэр улууспутугар өрөспүүбүлүкэ ситэриилээх былааһын отчуота ыытыллыахтаах. Улуус олохтоохторуттан былырыыҥҥы өрөспүүбүлүкэ отчуотун кэмигэр киирбит боппуруостары уонна сорудахтары толоруу хаамыытын дьүүллэстибит.