Бүгүн сарсыарда Ньурбачааҥҥа үлэлээтибит. Тус боппуруоһунан приемҥа 7 киһи киирэ сырытта. Сүрүннээн чааһынай дьиэни өрөмүөнүгэр матырыйаалынай көмө, Ньурбачааҥҥа оскуола саҥа дьиэтин тутуу туһунан ыйыталлар. Отчуоттуур мунньахха 47 киһи кытынна. Күрүө тутуутугар үп туһунан ыйыттылар, улуустан күрүөлээһиҥҥэ үп көрүллүбэт, нэһилиэк күүһүнэн субуотунньуктаан тутуохтарын сөп. Саха сүөһүтүн атыылаһан ыччакка түҥэтэн көрдөрөр туһунан баҕа санааларын эттилэр. Ол эрээри өрөспүүбүлүкэ саха сүөһүтэ ахсаан өттүнэн эбиллэ илигинэ атыылыыры, түҥэтэри көҥүллээбэт. Саҥа ФАП тутуутун боппуруоһун интэриэһиргээтилэр. Федеральнай бырагыраамаҕа киллэрэргэ РФ Доруобуйа харыстабылын министиэристибэтигэр сайаапка баран турар, онон эппиэти кэтэһэбит. Ньурбачаан оскуолатын тутуутун туһунан эттэххэ, бу боппуруос СӨ Ил Дарханын сорудаҕар киирэн сылдьар, быйыл бырайыактааһына саҕаланар. Итини таһынан сылгыны чиптээһин, улууска саҥа быраастар кэлиилэрин, эдэр учууталларга подъемнай баарын-суоҕун туһунан ыйытыктар киирэн хоруйданнылар.

Бүгүн күнүс Дьиикимдэҕэ үлэлээтибит. Тус боппуруостарынан приемҥа туһааннаах салайааччыларга олохтоохтортон 2 киһи киирэн туруорсуулаах боппуруостарын ыйыталастылар. Улуус ааспыт сыллааҕы үлэтин отчуоттуур мунньахха 52 киһи кытынна. Тыа хаһаайыстыбатыгар киирэр уларыйыылар, чуолаан ынах төбөтүгэр төлөнөр субсидия, хотон тутуутун, бэкээринэни үлэлэтии, Сүлэҕэ эбиэс атыытын графигар хонтуруол, Ньурбаҕа үлэлиир овощехранилище туһунан ыйыттылар, ууну таһар массыынаны туруорустулар. Улуустааҕы урбаан, эргиэн уонна олохтоох производство департаменын салайааччыта Михаил Маркович Паҥҥа уонна нэһилиэк дьаһалтатыгар олохтоох оскуола биисинэс-инкубаторын базатыгар бэкээринэни аһан үлэлэтии боппуруоһугар үлэлэһэллэригэр сорудахтаатым. Саҥа ууну таһар массыына атыылаһыы билигин кыаллыбат, улуус үбэ кырыымчык, онон боппуруоһу салгыы үөрэтиэхпит.

Киэһэ Сүлэҕэ отчуоттаатыбыт. Тус боппуруостарынан приемҥа 9 киһи сырытта, ол иһигэр миэхэ - 3 киһи. Эмтэнэргэ матырыйаалынай көмө, аварийнай дьиэттэн атын дьиэҕэ көһүү, дьиэ туттарга учаастагы кэҥэтии боппуруостарын таарыйдылар. Итиннэ төһө кыалларынан көмөлөһүөхпүт. Отчуоттуур мунньахха 52 киһи кытынна. Бастаан наҕараадалары, СВО-ҕа кытта сылдьар Артур Николаевка анаммыт "Биир ньыгыл Арассыыйа" партийнай билиэтин аҕатыгар туттардым. Элбэх араас ыйытык киирэн хоруйданна. Ньурбаҕа бу күннэргэ Алтайтан невролог үлэлии кэллэ. МРТ- аппараат Бүлүүгэ баар буолар, онон поликлиника направлениетынан Бүлүүгэ тиийэн МРТ-га түһүөхтэрин сөп буолар. Сүлэҕэ ФАП өрөмүөнэ эһиил былааннанар. Маны сэргэ льготниктары эминэн хааччыйыы, демографическай балаһыанньа, Дьокуускай перинатальнай отделениеҕа тиийэн төрөөбүт ийэлэр дойдуларыгар кэлэллэригэр бырайыастарын төлөбүрүн, үүт соҕотуопкатын, арыы сыанатын туһунан ыйыттылар. Бүгүн 3 нэһилиэк олохтоохторо улуус үлэтин отчуотун биһирииллэрин биллэрдилэр.