"Татар теле технология ягыннан алга китте. Татарстанда "Татсофт" бар. Башкортстанда санлы технология өлкәсендә эш бармый. Без, башкортлар, тәрҗемәче эшләү өчен Татарстанга мөрәҗәгать иттек."

Уфа фәнни үзәгенең Тарих, тел һәм әдәбият институты җитәкчесе урынбасары, "Башкортстанның дәүләт һәм республика халкы телләрен саклау һәм үстерү" програмын күзәтүче координация шурасы рәисе Тимур Мохтаров белән сөйләштек.

Кырым сусызлыктан интегә, күп районнарда су график белән генә бирелә. Өч дистәгә якын шәһәр һәм авыл халкы суны иртән һәм кич ике-өч сәгатькә генә куллана ала һәм мондый районнар саны арта гына. Азатлык Кырымда су тәэминаты белән килеп туган вазгыятьне тикшерде.

#шундый_хәлләр
Казан һава аланында Истанбулдан кайтып төшкән 22 яшьлек студент кызны тоткарлаганнар.

Таможня хезмәткәрләре хәбәр итүенчә, аның әйберләре арасында экстремист дип саналган китап табылган.

Хәбәрдә әйтелгәнчә, кыз үзе әлеге китапны дин өйрәнер өчен сатып алганын, аның Русиядә экстремист әдәбият исемлегенә кертелгәнен белмәгәнен әйткән.

Татарстанда 650 ихтыяри коронавирустан вакцина ясатачак

Роспотребнадзорның Татарстандагы вәкиле Миләүшә Җамалиева сүзләренчә, сүз "Вектор" фәнни үзәге эшләгән "ЭпиВакКорона" вакцинасы турында бара.

Вакцинаны сәламәтлекләренә куркыныч янаган төркемгә ясарга карар ителгән. Бу – мәгариф өлкәсе һәм Роспотребнадзорда эшләүчеләр, ди Җамалиева.

Рамил Шәмсетдинов мәхкәмәсендә бүген гаепләү ягы үз дәлилләрен китерүне тәмамлаган.

Адвокат Равил Тугушев Азатлыкка сөйләвенчә, гаепләнүче аңа басым ясалганын, җәберләү очраклары турында сөйләгән.

Тәнәфес вакытында Рамил Чита имамы белән очрашкан. Аның имам белән күптән очрашасы килә иде, диде Тугушев.

Мәхкәмә татар активисты Фәрит Зәкиевне 60 сәгать мәҗбүри эшкә хөкем итте. Хәтер көне митингында "темадан тайпылган өчен".

Моңа кадәр активистлар күпсанлы акчалата штрафларга тартылды. Аларны түләүдә халык ничек ярдәм итә ала? Татар, башкорт һәм кырымтатар милли хәрәкәтләренең тәҗрибәсен барладык.

Башкортстанның элекке җитәкчесе Рөстәм Хәмитов чорында дәүләт дачаларын тотуга бер елга 18 миллион сум киткән булса, хәзер Радий Хәбиров чорында бу сан 96 миллион сумга җиткән.

Навальный штабы Хәбиров дачалары турында хисап чыгарды. Республиканың социаль-икътисади хәле мөшкел булганда, болай типтереп яшәү килешми ди активистлар.

"Күрәсең, хакимият "Башкорт"ны телгә алуны да бетерүне максат итеп куйган."

"Башкорт" оешмасын экстремист дип танып аның эшчәнлеген тыйганга ярты ел булганда, оешманың элекке әгъзаларына басым тагын да көчәеп киткән.

Җәмәгать эшлеклесе Руслан Габбасов комментарын тәкъдим итәбез.

Кырым прокуратурасы ATR кырымтатар телеканалы җитәкчесе, Кырымның элекке вице-премьеры Ленур Ислямовны 19 ел төрмәгә хөкем итүне сорый.

Ислямов үзе хәзерге вакытта Киевта. Үзенә каршы җинаять эшен ул сәяси сәбәпләр белән аңлата һәм Кырымның аннексиясенә каршы чыккан өчен ачылган дип саный.

"Өч көн йоклатмый тотмаган булсалар, мин бу адымга бармаган булыр идем."

Рамил Шәмсетдинов мәхкәмәнең бүгенге утырышында хезмәттәшләрен атканда нинди хәлдә булуы, нинди хисләр кичергәне турында сөйләгән.

Адвокат Равил Тугушев Азатлыкка әйтүенчә, Рамил шулай ук кылган адымы өчен үкенүен әйткән.

Дөньяда коронавирус таралу дәвам итә. Авыру физик яктан гына түгел, психологик проблемнар да тудыра.

Пандемиянең кеше психикасына тәэсире, җәмгыятьтә борчу хисе артуы, аңа каршы көрәш юллары турында психолог белән сөйләштек. https://www.azatliq.org/a/30980765.html

Татар иҗтимагый үзәге вәкилләре 2020 елда "Хәтер көне" митингы өчен 60 сәгать мәҗбүри эш җәзасына хөкем ителгән Фәрит Зәкиевне яклап, матбугат очрашуы уздырды. ТИҮ активисты Галишан Нуриәхмәт Татар иҗтимагый үзәгенә карата даими басым баруын әйтте. Зәкиев Татарстан Дәүләт шурасын яңадан сайларга чакырды.

Җәй көне Галимҗан Зарипов Чаллыда коронавирус таралуга каршы ашыгыч чаралар күрергә сорап Миңнехановка хат язган иде. Хәзер ул үзе дә хатыны белән бу чирне йоктырып авыр хәлдә хастаханәдә ята, дип хәбәр итә Фәүзия Бәйрәмова.

Милли шура рәисе Васил Шәйхразиев Уфа татарларын Мөслимгә җыеп татар стратегиясен аңлатты. Уфа татарлары исә аларны күбрәк борчыган җанисәп мәсьәләсен күтәрде.

🎧 "Татарча подкастның" чираттагы чыгарылышында сәламәт туклану турында сөйләштек. 🥕Файдалы ризыкларны кайдан алырга, аларга акчаны ничек җиткерергә, вегетарианлык сәламәтлеккә зыян саламы, учлап витамин ашауның файдасы бармы? 🥬 Бу хакта Казаннан нутрициолог Гүзәл Сафиуллина һәм Уфадан веган Айгөл Голубкова белән фикер алыштык.

⚡️ Мәскәү өлкәсендәге апелляция мәхкәмәсе башкорт активисты Айрат Дилмөхәммәтовка хөкем карарын үзгәрешсез калдырды.

Элегрәк Самардагы хәрби мәхкәмә активистны дүрт маддә нигезендә гаепле дип табып, 9 ел кырыс тәртипле колониягә хөкем иткән иде.

Бүгенге утырышта Айрат Дилмөхәммәтов мәхкәмә алдында соңгы сүзен әйтте.

Татар Википедиясенә өлеш кертәсегез киләме?

Википедиядә татарча язучылар өчен бәйге игълан ителде. Бүләкләү фонды 200 мең сум тәшкил итә.

Бәйгедә катнашу өчен кимендә дүрт материал тапшыру кирәк. Белешмә энциклопедик стильдә булырга тиеш.

Язмалар 2020 елның 15 декабреннән 2021 елның 31 гыйнварына кадәр кабул ителә. Нәтиҗәләр 15 февраль ясалачак.

Бүген Казанда ачылган KazanMall исемле иң зур сәүдә үзәгендә татар теленә урын табылмаган.

Азатлык һәм татар активистлары бу җитешсезлек турында кисәтеп хатлар язган иде.

Бина хуҗалары нибары өч тактага татарчаны өстәгән — сәламләү, хушлашу һәм бәдрәф сүзләрен.

"Каршы көрәшү дигән сүз миңа ошамый. Без көрәшмәскә тиешбез. Кирәк булса, безгә спорттагы кебек узып китәргә кирәк."

Дөнья татар конгрессының Милли шурасы еллык утырыш үткәрде. Катнашучылар җанисәп мәсьәлән күтәрергә сораса да, Милли шура рәисе Васил Шәйхразиев аны киләсе ел башына кичектерде. Башкортлаштыру сәясәтенә каршы да көрәшмәскә чакырды.

Быел пандемия аркасында яңа ел алдыннан зур релизлар әллә ни күренми. Шулай да Азатлык елның соңгы аенда кинотеатрларда һәм стриминг хезмәтләрендә карарлык фильм-мультфильмнар тәкъдим итә. https://www.azatliq.org/a/30985528.html