Гъэхъагъэу аш1ыгъэхэм, аш1ыхэрэм яш1уагъэк1э Адыгеим, Урысыем, Дунаим зыц1э щызыгъэ1угъэ спортсменхэр непэ къытфеблэгъагъэх. Ягопэ дэдэу ныбжьык1эхэм зэдэгущы1эгъу адаш1ыгъ
Шъхьащэкъо Кимэ, Хьасэнэ Мурат, Джарымэкъо Рустам, Кобл Рамазан, Наш
Расул.
Хьак1эхэм гъэш1эгъоныбэ къа1отагъ: спортым игъогу техьанхэу зэрэхъугъэ ш1ык1эр, ягъэхъагъэхэр аш1ынымк1э адыгэ хабзэм иш1уагъэу гъэк1уагъэр, зыгорэ къыбдэхъу пш1оигъомэ ащ умыпшъыжьэу узэдэлэжьэн фаер, ащ нэмык1хэри. Упч1э пстэуми хьак1эхэм джэуапхэр къаратыжьыгъ. Ык1эм сурэти зытырахыгъ!

Адыгэ къэралыгъо телевидениемрэ радиомрэ я1офыш1эхэр непэ тиэтнолагер къэк1огъагъэх. Къэбар гъэш1эгъонхэмк1э ахэр тиныбжьык1эхэм къадагощагъэх, я1офш1эн бзэм икъэухъумэн зэрэдэлажьэрэ ш1ык1эр къа1отагъ.

Тиныбжьык1эхэм ягопэ дэдэу непэ Еутых Асе имузей къядгъэплъыхьагъ!

Адыгэ лъэпкъым икультурэ, ишэн-хабзэ, ыбзэ къэухъумэгъэнымк1э Цэй Ибрахьимэ ыц1э зезыхьэрэ театрэм зэш1уихырэ 1офыгъохэр гъунэнчъ. Ар джыри зэ къыушыхьатыжьыгъ непэрэ къэгъэлъэгъонэу тиныбжьык1эхэр къызэрагъэблэгъагъэм!