Пачынаем новы дзень са «Звяздой» — з цікавостак! 🤔

Што адбылося 27 чэрвеня? 🔎


✍🏻1909 год — нарадзіўся (в. Звонь Лепельскага павета) Сяргей Знаёмы (Сяргей Дзмітрыевіч Клопаў), беларускі журналіст, празаік, паэт. Дэбютаваў у друку вершам «Мая вясна» ў 1929 годзе ў газеце «Рабочий». У пачатку 1930-х вельмі актыўна выступаў у друку з нарысамі, карэспандэнцыямі. Запісваў і даследаваў беларускі фальклор. Займаўся мастацкім перакладам з рускай, украінскай і іншых моў.

🗣️1925 год — нарадзілася (в. Нізок Уздзенскага раёна) Лідзія Арабей, беларускі празаік, крытык, літаратуразнаўца. У 1956 годзе выдала даследаванне «Цётка (Алаіза Пашкевіч)», а ў 1959-м — крытыка-біяграфічны нарыс «Хвядос Шынклер». Аўтар зборнікаў аповесцяў і апавяданняў «Мера часу», «Экзамен», «Ларыса», «На другой зіме вайны, «Ваўчкі», «Сярод ночы» і многіх іншых.

⛴️1898 год — канадзец Джошуа Слокам завяршыў першае ў гісторыі адзіночнае плаванне вакол свету: прайшоў на яхце «Спрэй» у адзіночку 46 000 марскіх міль, абагнуўшы зямны шар. А пасля кругасветнага плавання Слокам на аснове свайго дзённіка напісаў кнігу «Адзін пад ветразем».

⚔️1905 год — пачалося паўстанне на браняносцы «Князь Пацёмкін-Таўрычаскі», адна з прыкметных падзей рэвалюцыі 1905–1907 гадоў у Расіі і першы выпадак узброенага мяцяжу цэлай вайсковай часці падчас гэтай рэвалюцыі. Праходзіла з 14 (27) чэрвеня да 25 чэрвеня (8 ліпеня) 1905 года.

📜1910 год — ІІІ Дзяржаўная дума прыняла Сталыпінскае аграрнае заканадаўства. Асноўная сутнасць сталыпінскай аграрнай рэформы заключалася ў тым, каб, адмяніўшы пакінутыя выкупныя плацяжы, даць магчымасць усім сялянам права свабодна выходзіць з абшчыны і замацоўваць за сабой надзельную зямлю ў спадчынную прыватную ўласнасць.

✈️1931 год — авіяканструктар Ігар Сікорскі атрымаў у ЗША патэнт на вынаходства першага гелікоптара — правобраза верталёта.