Пачынаем новы дзень са «Звяздой» — з цікавостак! 📺

9 красавіка ў гісторыі... 🌍

✍🏻 1853 год — нарадзілася (в. Малыя Бакшты, цяпер у Маладзечанскім раёне) Софія Кавалеўская, фалькларыстка, этнограф, пісьменніца. Сабрала калекцыю прадметаў народных рамёстваў, твораў мастацтва, а таксама матэрыялы пра паўстанне 1863–1864 гадоў на Міншчыне. Аўтар працы «Вясельная ўрачыстасць у Вілейскім павеце ў ваколіцах Маладзечна і Радашковічаў». У 1912 годзе на свае сродкі выдала кнігу ўспамінаў выкладчыка мінскай гімназіі Ф. Шаблоўскага «Мінскія абразкі 1850–1863 гг.» пра гісторыю гімназіі і яе выкладчыкаў, тэатр, сям’ю В. Дуніна-Марцінкевіча, памятныя мясціны горада.

🛩 1920 год — нарадзіўся (вёска Нашкавічы, цяпер у межах вёскі Шамаўшчына Мсціслаўскага раёна) Уладзімір Раманавіч Жыгуноў, савецкі лётчык, Герой Савецкага Саюза, ваенны дзеяч. Да студзеня 1945 года здзейсніў 109 баявых вылетаў на знішчэнне чыгуначных эшалонаў, аэрадромаў, вялікую колькасць войскаў праціўніка. Пасля вайны працягваў службу ў Савецкай Арміі. У 1955 годзе скончыў Ваенна-паветраную акадэмію.

👨🏻‍🎨 1932 год — нарадзіўся Уладзімір Бойка, мастацтвазнавец, мастак, літаратурны крытык, паэт, публіцыст, журналіст.

🎭 1947 год — нарадзіўся (в. Грабава Ваўкавыскага раёна) Іван Мацкевіч, савецкі і беларускі акцёр тэатра і кіно, заслужаны артыст Беларусі. З 1968 па 1981 год — акцёр Брэсцкага акадэмічнага тэатра драмы імя Ленінскага камсамола Беларусі. З 1981 па 1996 год — акцёр тэатра-студыі кінаакцёра ў Мінску. Затым — вядучы майстар сцэны Нацыянальнага акадэмічнага драматычнага тэатра імя М. Горкага ў Мінску. Іван Мацкевіч сыграў больш чым у сямідзесяці кінафільмах, сярод якіх такія стужкі, як «Вазьму твой боль» Міхаіла Пташука, «Людзі на балоце» Віктара Турава, «Казка пра зорнага хлопчыка» Леаніда Нячаева, «Сын за бацьку» Мікалая Яроменкі-малодшага, «Хрусталёў, машыну!» Аляксея Германа і іншых. Таксама акцёр паспяхова здымаўся ў шматлікіх серыялах.

🖼 1667 год — у Парыжы прайшла першая ў свеце публічная выстаўка мастацтваў.

🎙 1860 год — французскі вынаходнік Эдуар дэ Мартэнвіль на першым у свеце гуказапісвальным устройстве, створаным у 1857 годзе Эдуарам-Леонам Скотам дэ Мартэнвілем, зрабіў першы ў свеце гукапіс французскай народнай песні «Месяцовае святло», які захоўваецца цяпер у парыжскім архіве.

🎥 1926 год — дата нараджэння Усевалада Сафонава, савецкага і расійскага акцёра тэатра і кіно, народнага артыста РСФСР. Здымаўся ў фільмах «Салдаты», «Цішыня», «Шчыт і меч», «Беларускі вакзал» і многіх іншых.

🪖 1945 год — савецкімі войскамі ўзяты штурмам горад-крэпасць Кёнігсберг. Камендант Ота Ляш падпісаў акт аб капітуляцыі горада. Пасля заканчэння Другой сусветнай вайны Кёнігсберг быў перададзены пад юрысдыкцыю Савецкага Саюза, а ў 1946 годзе перайменаваны ў Калінінград.