​Қорақалпоғистон диёрида, гўзал Нукус шаҳрида II Халқаро бахшичилик санъати фестивалининг тантанали очилиш маросими бўлиб ўтди.

Халқ оғзаки ижодиётининг энг қадимий турларидан бўлган бахшичилик санъати юксак гуманизм ғояларини, тинчлик ва дўстлик, адолат ва ҳақиқат каби эзгу фазилатларни маҳорат билан тараннум этади. Шу боис ҳам, бахши, оқин ва жировлар азалдан халқ қалбининг куйчилари, турли миллат ва элатларни бирлаштирадиган олижаноб инсонлар сифатида ардоқлаб келинади.

Санъат байрамида ЮНЕСКО, АЙСЕСКО, ТУРКСОЙ, МДҲнинг Ижроия қўмитаси, Маданий ёдгорликларни сақлаш ва реставрация қилиш бўйича халқаро тадқиқот маркази каби нуфузли ташкилотлардан ташриф буюрган мартабали меҳмонлар, дунёнинг турли давлатларидан келган 260 нафардан зиёд халқ ижодиёти намояндалари, санъат ва маданият арбоблари, республикамизнинг машҳур бахшилари, хонандалари иштирок этишди.

Очилиш маросимида меҳмонлар муносиб равишда қарши олинди. Шундан сўнг Президент Шавкат Мирзиёевнинг фестивал иштирокчиларига йўллаган табриги Бош вазир ўринбосари Азиз Абдуҳакимов томонидан ўқиб эшиттирилди.

Шундан сўнг фестивалдан ўрин эгаллаган дилтортар тароналар кетма кетлиги бошланди. Мозий ва бугунни ўзида акс эттирган саҳна кўринишлари, бадиий чиқишлар, танланган қўшиқларнинг ҳар бири йиғилганларнинг қалбига шодлик бахш этди. Бир сўз билан айтганда бугун Нукус шаҳри санъат ва маданиятнинг нодир намуналарини ўзида акс эттириш орқали янада чирой очиб, эзгу мақсадларни ўзида мужассам этди.