#үлэҕэитии

🥔🥔🥔Хортуоппуй хомуура көхтөөхтүк уонна туһалаахтык барда

Мүрүтээҕи уолаттар гимназияларын ахсыс уонна онус кылааһын үөрэнээччилэрэ уопсайа 15 уол, технология учуутала Иннокентий Тарабукин салайааччылаах Петр Алексеев "Хардыы" диэн бааһынай хаһаайыстыбатын Дараха бааһынатыгар хортуоппуй хостоон, хомуйан, үлэни оройуттан тутан, үлэ практикатын ааһан кэллилэр.

Сарсыарда 9:00 чаастан хомунан, 10:00 чааска бааһынабытыгар автобуһунан айаннаан тиийдибит, күннээҕи үлэ сыалын-соругун Петр Степанович аҕатыттан Уус-Алдан улууһун бочуоттаах олохтооҕуттан Степан Степанович Алексеевтан  истэммит үлэ үгэнигэр түстүбүт. Эбиэккэ диэри быһа холоон 30-ча куулу хомуйдубут. Эбиэккэ күөс өрүнэн, тото-хана аһаан, салҕыы хомуурбутугар туруннубут.

✍Иннокентий Тарабукин, Мүрүтээҕи уолаттар гимназияларын технологияҕа учуутала

✅ t.me/murusahargata @ulusmedia

⏺ Кэллиэксийэһиттэр Мэҥэ Хаҥалас Тумулугар ыалдьыттаатыбыт

Хотун Төҥүлү алааһы өҥөйө сытар Тумул бөһүөлэгэ Доллу нэһилиэгин киинэ, нэһилиэнньэтин ахсаана 850-чэ киһи. Доллу нэһилиэгэ улуус биир кырдьаҕас уонна баай историялаах нэһилиэгэ буолар. Эллэй сиэнэ, уолун Орулаа Талгый уола Мэҥэбил диэн киһи бу сиргэ кэлэн олохсуйбут, элбэх оҕону төрөппүт. Төҥүлгэ Ойуун диэн ааттаах киһи 12 оҕону төрөтөн Мэҥэ улууһун төрүттээбиттэр. Ол туһунан 2010 с. бэчээттэнэн тахсыбыт Доллу нэһилиэгин туһунан кинигэ аан тылыгар суруллубут.

Доллулар Бойобуой Кыһыл Знамя, Кыһыл Сулус уордьаннар кавалера, аатырбыт күүстээх киһи, чекист Г.Р. Десяткин, Социалистическай Үлэ Геройа Т.Г. Десяткин, ССРС норуодунай артыыһа Д.Ф. Ходулов, СӨ үтүөлээх артыыһа С.Н. Сивцев-Доллу, СӨ култууратын үтүөлээх үлэһитэ, СӨ норуодунай артыыһа Г.Н. Шахурдина, биллэр сүүрүк Татьяна Жиркова, харбааһыҥҥа Пекиннээҕи паралимпийскэй олимпиада үрүҥ көмүс призера Анастасия Диодорова ааттарынан киэн тутталлар. «Тумул» СХПК (бэрэссэдээтэл Таисия Десяткина) өрөспүүбүлүкэҕэ биллэр биир бөдөҥ хаһаайыстыба, сүөһү иитиитигэр, бурдукка базовай хаһаайыстыба буолар.

Маннык үлэһит дьонноох Доллу нэһилиэгэр күлүмүрдүү оонньуур балаҕан ыйын бүтэһик күнүгэр кэллиэксийэһиттэр «Алыптаах» түмсүүлэрэ тэриллибитэ биэс сылын бэлиэтээһин тэрээһиннээхтик буолан ааста. Дьокуускай куораттан, ыраах Ньурба, Кэбээйи, ону тэҥэ илин эҥээрдэртэн Амма, Таатта, Мэҥэ Хаҥалас нэһилиэктэриттэн, Уус Алдан Бороҕонуттан, Сыырдааҕыттан, Тумулуттан барыта 55 кэллиэксийэһиттэр мустаннар, күн бастакы аҥаарыгар успуорт саалатыгар кэллиэксийэлэрин дьон көрүүтүгэр туруордулар, атыы-тутуу, атастаһыы манна буолла.

✍️ Елена Сыроватская, уопсас. кэрэсп.

🏃 Сиһилии: https://мюрюгазета.рф/kellieksijehitter-mene-hanalas-tumulugar-yaldyttaatybyt/

✅ t.me/murusahargata @ulusmedia