#букүннэргэ

💢 "Билиибин-көрүүбүн бар дьоммор аныыбын": сахалыы тыыннаах ураты тэрээһинтэн астынныбыт

Муус устар 17 күнүгэр В.В.Никифоров-Күлүмнүүр аатынан "Тойон Мүрү" култуура дыбарыаһыгар өбүгэ үгэстэригэр олоҕуран эдэр ыччакка уонна үүнүөн-сайдыан, ис туруктарын бөҕөргөтүөн баҕалаахтарга "Билиибин-көрүүбүн бар дьоммор аныыбын" диэн сахалыы тыыннаах ураты тэрээһин буолан ааста. "Сырдык эйгэ" диэн саҥа тэриллэ сылдьар түмсүү салайааччыта Матрена Леонтьева ылыннарыылаах ыҥырыытынан, өрүс суола сабыллыбытыттан иҥнибэккэ, Дьокуускай куораттан уонна Мэҥэ Хаҥаластан өбүгэ билиитин-көрүүтүн өрө тутан киэҥ эйгэҕэ тарҕата сылдьар бөлөх кэлэн үлэлээн дьон сэҥээриитин ылыан ылла.

Бу бөлөҕү тэрийээччилэртэн биирдэстэрэ биир дойдулаахпыт Альбина Аммосова эбит. Манна үс көлүөнэ дьоно араас эйгэттэн бааллара кэрэхсэбиллээх. Кинилэр кулун тутар 21 күнүгэр Дьокуускай куораттан саҕалаан Мэҥэ Хаҥалаһынан, Чурапчынан сылдьан биһиэхэ кэлбиттэр.

Ыйыллыбыт болдьох чааска саалаҕа тэрээһин саҕаланар. Сценаҕа "Уолан" гимназия кыра уолаттара уол оҕо үҥкүүтүнэн тэрээһини арыйбыттара таайтарыылаах буолла. Саха сирин суруйааччыларын Сойууһун чилиэнэ Акулина Иванова-Бээрийэ кыыһа Хотойук Айгыына уус-ураннык хоһуйан ыалдьыттары билиһиннэрдэ уонна салгыы сатабыллаахтык салайан ыытта.

Бииртэн биир хатыламмат эйгэлээхтэр сценаҕа тахсан саха сомоҕолоһор, түмсэр кэмэ кэлбитин, бэйэтин суолун тэлэнэригэр, кыаҕын билинэригэр уонна ол туох суолталааҕын сиһилии сэһэргээтилэр, бэйэлэрин дьарыктарын, тутуһар хайысхаларын көрөөччүлэргэ ытыска ууран биэрдилэр.

Саалаҕа олорооччулар барыларын уу-чуумпутук иһийэн олорон иһиттилэр. "Уолан" гимназия уолаттара кыттыбыттара, саалаҕа олорон истибиттэрэ олус хайҕаллаах. Ыалдьыттарбыт даҕаны оҕолор кыттыбыттарыттан үөрдүлэр. Хайа да улууска оҕолор кыттыбатахтарын эттилэр. Онон улууска уол оҕоҕо болҕомто баарын бэлиэтээтилэр.

✍️ Светлана Бурцева, уопсас. кэрэсп.

☑️ Сиһилии: https://мюрюгазета.рф/article/95390

✅ t.me/murusahargata @ulusmedia