#Доруобуйакүнэ

💢 Саҥа балыыһаҕа ситиһиилээх, таһаарыылаах үлэ салҕанар

Быйыл Курбуhах нэhилиэгэр эмп тэрилтэтэ үлэтин саҕалаабыта 77 сыла буолла. Бу сылы көрсө саҥа балыыhа тутуутутугар нэhилиэк, улуус дьаhалталара, доруобуйа харыстабылын министиэристибэтэ сүбэлэрин холбоон, судаарыстыбаннай бырагыраама чэрчитинэн дуогабар уурсан, өр сылларга нэhилиэкпит дьоно-сэргэтэ эрэнэ күүппүт, доруобуйаларын тупсарыналларыгар төһүү күүһүнэн буолар саҥа, сырдык, аныгылыы типтээх амбулаториябыт 2022 сыл балаҕан ыйын 7 күнүгэр арыллан үлэҕэ киирбитэ. Курбуһахха нэһилиэнньэ ахсаана 771 киһиэхэ тэҥнэһэр. Мантан улахан киһитэ – 596, оҕо ахсаана – 175. Онон Окоемовка, Балаҕаннаах уонна Уус Күөлүн олохтоохторо саҥа амбулаториябытыгар кэлэн толору эмтэнэр кыахтаахтар.

Саҥа дьиэбит миэбэлинэн, компьютердарынан, анал оборудованиенан хааччыллан үөрүүбүт үгүс. Бары өттүнэн хааччыллан, сырдык-ыраас кэбиниэттэр дьону көрөргө-истэргэ, эмтииргэ олус табыгастаахтар. Саҥа амбулаториябыт кыһын устата олус сылаастык турда. Суукканы эргиччи үс, биир күнүскү стационар куойкалаахпыт. Ону таһынан 2022 сыл саас «Тыа сирин кэлим сайыннарыы» судаарыстыбаннай бырагырааманан «Суhал көмө» массыынатынан хааччыллыбыппыт эмиэ улахан үөрүү.

Кэлэктиипкэ 12 үлэһит: быраас, биэлсэр, 5 орто медперсонал, 2 санитар, асчыт, оробуочай, суоппар дойдубут дьонун туhугар туох баар билиибитин, дьоҕурбутун, кыhамньыбытын ууран туран, саҥа амбулаториябытыгар үлэлии-хамсыы сылдьабыт.

Сыллата диспансеризация үлэтэ күүскэ ыытыллар. Ол курдук, бастакы уочарат үрдүк хаан баттааһыннаах 188 киһини учуокка ыллыбыт. Иккис – ис-үөс ыарыытынан 92, үһүс – сүрэх ыарыытынан 60 киһи турда. Ону таһынан сахарнай диабетынан 29, вируснай гепатитынан 65 киһи учуокка тураллар. 2022 сылга уопсайа 51 киһини араас балыыһаларга көрдөрүнэллэригэр анаан ыыттыбыт.

✍️ Александра Окоемова, Курбуһахтааҕы врачебнай амбулатория бырааһа

☑️ https://мюрюгазета.рф/article/94465

✅ t.me/murusahargata @ulusmedia

#бэлиэтүгэн

💢 Сыырдаах ыччата үүнэр-сайдар кэскилэ – саҥа оскуола үлэҕэ киирдэ

И.С. Портнягин аатынан Сыырдаах орто оскуолатын 120 оҕо үөрэнэр миэстэлээх таас дьиэтин "СТК" ХЭТ (директор Анатолий Заболоцкай) тэрилтэ тутан киллэрдэ.

"Тыа сирин кэлимник сайыннарыы" федеральнай программа чэрчитинэн тутуллубут оскуолаҕа билигин 119 оҕо үөрэнэр. Дириэктэринэн Диана Неустроева таһаарыылаахтык үлэлиир.

Туруу үлэһиттэр, чулуу спортсменнар, уран уустар уутуйан үөскээбит түөлбэлэригэр кэнчээри ыччат салгыы үүнэр-сайдар кэскилэ түстэнэн, саҥа саҕахтар арыллан, үрдүк үктэллэр дабайыллан иһэллэрэ саарбахтаммат.

✍️ Ольга Шепелева

✅ t.me/murusahargata @ulusmedia