#нэһилиэктэргэ

💢 Баатаҕайдар түөлбэлэринэн хайыһарга күрэхтэстибит

Баатаҕай нэһилиэгэр быйыл Спорт уонна уопсастыбаннай хамсааһын сыла биллэриллибитинэн Спорт норуоттар икки ардыларынааҕы (муус устар 6 күнэ) уонна Доруобуйа аан дойдутааҕы (муус устар 7 күнэ) күннэрин көрсө дойду үрдүнэн ыытыллар "Лыжня России 2023" маассабай хамсааһыҥҥа бүгүн нэһилиэкпитигэр түөлбэлэр икки ардыларыгар хайыһар күрэхтэһиитин ыыттыбыт. Ону тэҥэ хаалыктаах хаамыыны көҕүлээччилэргэ, нэһилиэк олохтоохторугар уонна оскуола оҕолоругар эти-хааны чэбдигирдэр хамсаныылары оҥоттордубут.

Күрэхтэһии түмүгэ: "Сарыал" түөлбэ – 1-кы миэстэ, "Аргыс" түөлбэ – 2-с миэстэ, "Дабаан" – 3-с миэстэ.

Кыайыылаахтар мэтээллэринэн, грамотанан наҕараадаланнылар.
Күрэхтэһии кылаабынай судьуйатыгар Николай Николаевка, физкултуура учууталыгар Алексей Ядрихинскайга уонна түөлбэ салайааччыларыгар, бүгүҥҥү күн тэрээһинин кыттыылаахтарыгар тус бэйэбиттэн махталбын тиэрдэбин.

✍️ В. Белолюбская, нэһилиэк спортинструктора

✅ t.me/murusahargata @ulusmedia

#үөрэхэйгэтэ

💢 Илин эҥээр улуустарга бастыҥ эдэр учууталынан Чурапчы Бахсытыттан Туяра Попова ааттанна

Бүгүн илин эҥээр улуустар эдэр учууталларын күрэхтэһиитин түмүктүүр күнүгэр "Маастар кылаас" уонна "Педагогическай сэбиэт" диэн түһүмэхтэр буоллулар. Маастар кылааска учууталлар бэйэлэрин үлэлэрин саамай сүрүн сүмэтин-сүөгэйин билиһиннэрдилэр.

"Педсэбиэт" түһүмэххэ күрэхтэһээччилэр үөрэх хаачыстыбатын хайдах үрдэтэр туһунан кэпсэттилэр, санааларын үллэһиннилэр. Бары билиҥҥи кэмҥэ саамай тоҕоостоох тиэмэлэри таарыйдылар, чахчы оҕо инники кэскилин туһугар ис дууһаларыттан "ыалдьалларын" көрдөрдүлэр. Бүтэһиккэ "төгүрүк остуол" ыытыллан, эдэр учууталлар дьүүллүүр сүбэни кытары күрэхтэһиини ырыттылар, сүбэ-ама ыллылар, саҥа санаалар сонун идеялар этилиннилэр.

Икки күннээх эрийсиилээх тургутуһуу түмүгүнэн хас биирдии циклгэ кыайыылаахтар быһаарылыннылар:

- "Үөрэнээччилэр биһирэбиллэрэ" анал аат кыайыылааҕынан Алексей Попов (Чурапчы улууһун Г.Д. Протодьяконов аат. Алаҕар орто оскуолатын биологияҕа уонна химияҕа учуутала) буолла;

- "Естественнэй-политехническай цикл бастыҥ учуутала" – Анжелика Попова (Мэҥэ Хаҥалас улууһун И.Г. Тимофеев аат. Майатааҕы лицей математикаҕа учуутала);

- "Общественнай цикл бастыҥ учуутала" – Туяра Попова (Чурапчы улууһун Д.Г. Барашков аат. Бахсы орто оскуолатын историяҕа уонна обществознаниеҕа учуутала);

- "Гуманитарнай цикл бастыҥ учуутала" – Людмила Лыткина (Уус Алдан улууһун Г.В.Егоров аат. Мүрү 1 нүөмэрдээх орто оскуолатын нуучча тылын уонна литературатын учуутала);

- "Алын сүһүөх кылаас бастыҥ учуутала" – Саргылана Пешкова (Амма улууһун Амма орто оскуолатын алын сүһүөх учуутала).

Оттон илин эҥээр бастыҥ эдэр учууталларын түмпүт күрэхтэһиигэ муҥутуур кыайыылаах үрдүк аатын Чурапчы улууһун Д.Г. Барашков аатынан Бахсы орто оскуолатын историяҕа уонна обществознаниеҕа учуутала Туяра Попова сүктэ.

✍️ Айгыына Бурнашева, Лөгөй орто оскуолатын 10 кылааһын үөрэнээччитэ

☑️ https://vk.com/wall-219778198_6

✅ t.me/murusahargata @ulusmedia