ፎቶ ፦ የሐዋሳ ሀይቅን የማስዋብ ፕሮጄክትን ተግባራዊ ለማድረግ የሚያስችል አካባቢን ነፃ ማድረግ ስራ መጀመሩን ከተማ አስተዳደሩ ዛሬ አሳውቋል።

የሐዋሳ ሀይቅ የማስዋብ ስራ በከተማዋ በ2014 በጀት አመት በይፋ ከሚጀመሩ ፕሮጄክቶች መካከል አንዱ እንደሆነ ተገልጿል።

ፕሮጄክቱ ሲጠናቀቅ የሐዋሳን ሀይቅ ለዘርፈ ብዙ የቱሪዝም መስህብነት ብቁ የሚያደርገው ይሆናል ተብሎ እንደሚጠበቅ የሐ/ከ/አስ/የመ/ኮ/ጉ/መምሪያ ገልጿል።

@tikvahethiopia

ችሎት !

በአማራ ክልል፤ ምዕራብ ጎጃም ዞን፤ ጎንጂ ቆለላ ወረዳ ከሦስት ዓመት ግድም በደቦ በተመራማሪዎች ላይ ግድያ የፈፀሙ 32 ተከሳሾች ከ1 ዓመት እስከ 20 ዓመት በሚደርስ እስራት እንዲቀጡ የባሕር ዳርና አካባቢው ከፍተኛ ፍርድ ቤት የቅጣት ወሳኔ አስተላለፈ።

በእነ መላኩ አበበ የክስ መዝገብ የቀረቡ 32 ተከሳሾች በጋራ ሰው በመግደል፣ አካል በማጉደል፣ የግድያ ሙከራ በማድረግና ንብረት በማውደም ከጥቅምት 13 ቀን፣ 2011 ዓ.ም ጀምሮ ጉዳያቸውን በፍርድ ቤት ሲከታተሉ ቆይተዋል።

ጥቅምት 13 ቀን፣ 2011 ዓ.ም ተከሳሾቹ "ተመራማሪዎቹ ልጆቻችንን የማይታወቅ መርፌ በመውጋት ለአደጋ አጋልጠዋቸዋል" በሚል ያልተረጋገጠ ወሬ ተነሳስተው፤ ለሦስተኛ ዲግሪ ማሟያ በወረዳው አዲስ ዓለም ከተማ የምርምር ሥራ ይሠራ በነበረ አንድ ተመራማሪ ላይና በሌላ ረዳቱ ላይ የሞት፤ በሌሎች ሦስት የጤና ባለሞያዎች ላይ ከፍተኛ የአካል ጉዳትና በሌላ ግለሰብ ላይ ደግሞ የመግደል ሙከራ እንዲሁም መኪና የማቃጠል ተግባር መፈፀማቸውን የባሕር ዳርና አካባቢው ከፍተኛ ፍ/ቤት ዛሬ በዋለው ችሎት አመልክቷል።

ፍ/ቤቱ ዛሬ ከሰዓት በኋላ በዋለው ችሎት በ32ቱ ተከሳሾች ላይ እንደየ ወንጀል ተሳትፏቸው ከ1 ዓመት እስከ 20 ዓመት የሚደርስ የፅኑእ እስራት ቅጣት አስተላልፎባቸዋል።

ሌሎች አምስት ተከሳሾች በወንጀሉ ስለመሳተፋቸው የቀረበ ማስረጃ ባለመኖሩ ቀደም ሲል በነፃ መሰናበታቸውን ፍ/ቤቱ አስታውሷል።

በዛሬው የፍ/ቤት ውሎ በርካታ የፀጥታ አስከባሪ አካላት በፍርድ ቤቱ ቅጽር ግቢ ታይተዋል። በፍርድ ቤቱ ውስጥ የተወሰኑ ጉዳዩን የሚከታተሉ ታዳሚያንም ነበሩ። የፍርድ ውሳኔው ሲሰጥ የማረሚያ ቤት አልባሳት የለበሱ እስረኞች ውሳኔውን ቆመው ተከታትለዋል።

ምንጭ፦ ጀርመን ድምፅ ሬድዮ

@tikvahethiopia

ችሎት !

የፌደራል ጠቅላይ ፍርድ ቤት 2ኛ የምርጫ ጉዳዮች ችሎት ፥ የኢትዮጵያ ዜጎች ለማህበራዊ ፍትህ (ኢዜማ) አቤቱታ ባቀረበባቸው በደቡብ ክልል በ4 የምርጫ ክልሎች የተካሄደው የክልል ምርጫ ውጤት ተሰርዞ በድጋሚ ምርጫው እንዲካሄድ ውሳኔ ሰጠ፡፡

ኢዜማ በ28 ምርጫ ክልሎች በድምፅ አሰጣጥ ሂደት በድምጽ ቆጠራና በ6 ምርጫ ጣቢያዎች ደግሞ የዕጩዎቼ ፎቶና ዝርዝር ባለመካተቱ አልተወዳደርኩም ለዚህም 156 ገጽ የሰነድና የምስል ማስረጃ አያይዤ ለቦርዱ ባቀርብም ቦርዱ ማስረጃዬን ሳይመለከት ነው ውሳኔ የሰጠው ሲል ምርጫው እንዲደገም በማለት ተከራክሮ ነበር።

ምርጫ ቦርድ በበኩሉ ኢዜማ ስርአቱን የተከተለ አቤቱታ አላቀረበም የቀረበው አቤቱታ እንጂ በማስረጃ የተደገፈ አደለም ስድስቱ ጣቢያ ላይዝርዝር ያቀረበ ቢሆንም ሁለቱ ባዶ ናቸው ሲል መከራከራያ ነጥብ አንስቶ ይግባኙን ተቃውሞ ነበር፡፡

ክርክሩን የተከታተለው ፍርድ ቤቱም መርምሮ ሰኔ 14 ቀን በደቡብ ክልል በላስካ መደበኛ ፣ በቁጫ ልዩ ፣ በጉመር ሁለት እና በብርብር ምርጫ ክልል የተካሄደው የክልል ምርጫ የኢዜማ ዕጩዎች በድምፅ መስጪያ ወረቀት ላይ ፎቶዋቸውና ስም ዝርዝራቸው ያልተካተተ በመሆኑ ዕጩዎቹ ሳይወዳደሩ በመቅረታቸው ምርጫው እንዲደገም ወስኗል።

በሌላ በኩል ኢዜማ በሰኔ14 ቀን 2013 ዓ/ም በ22 ምርጫ ክልሎች በተካሄደው ሀገራዊ ምርጫ በድምጽ አሰጣጥ እና በድምጽ ቆጠራ ሂደት ላይ ታዛቢዎቼ እንዳይሳተፉ ተደርጓል ሲል ያቀረበው አቤቱታን በተመለከተ ፍርድ ቤቱ መርምሮ ጥሰቱ በማን ላይ በየትኛው ጣቢያ መቼ የሚለው ዝርዝር ፍሬ ነገርና ማስረጃ አልቀረበም ሲል የኢዜማን ይግባኝ አቤቱታ ውድቅ አድርጎታል።

ያንብቡ : telegra.ph/Tarik-Adugna-08-27

የመረጃ ባለቤት : ጋዜጠኛ ታሪክ አዱኛ

@tikvahethiopia

#DrAbiyAhmed

የጀርመኗ መራሒተ መንግሥት አንጌላ ሜርክል ዛሬ ከሰዓቱን በጠሩት የጂ-20 ኮምፓክት ዊዝ አፍሪካ የተሰኘ ጉባዔ ላይ ጠቅላይ ሚኒስትር ዐቢይ አሕመድ በበይነ መረብ በመታገዝ ተሳትፈዋል።

“ለንግድ እና ለኢንቨስትመንት ማሕቀፋዊ ሁኔታዎች” በሚል ርዕስ የሚካሄደው ጉባዔ የስምምነቱ ፈራሚ የሆኑ ሀገራት ተጨማሪ የንግድ እና የኢንቨስትመንት ዕድሎችን እንዲያገኙ በሚያስችል ሁኔታ ማሕቀፋዊ ሁኔታዎችን ወደ ቀጣይ ርምጃዎች ለመውሰድ የታለመ ነው።

ጠቅላይ ሚኒስትር ዐቢይ አሕመድ ባደረጉት ንግግር፣ ለሙዐለ ነዋይ ፍሰት ምቹ ነባራዊ ሁኔታ እንዲኖር ለማስቻል በኢትዮጵያ የሀገር በቀል የኢኮኖሚ ማሻሻያ አማካኝነት ማክሮ ኢኮኖሚያ፣ መዋቅር እና የዘርፍ ማሻሻያዎች መደረጋቸውን ገልጸዋል።

#PMofficeEthiopia

@tikvahethiopia

#Update

የአሜሪካ ወታደራዊ ኃይል በካቡል አውሮፕላን ማረፊያ ከደረሰውን ፍንዳታ ጀርባ ባለው ቡድን ውስጥ ዕቅድ የሚያወጣ ነው የተባለ ግለሰብ በሰው አልባ አውሮፕላን (ድሮን) አማካይነት እንደገደለ አስታወቀ።

ISIS-K የተባለው ቡድን የISIS ክንፍ ሲሆን በካቡል አውሮፕላን ማረፊያ ባደሰው ጥቃት ወደ 170 የሚጠጉ ሰዎች ሞተዋል።

ከተገደሉት ሰዎች መካከል 13ቱ አሜሪካውያን ወታደሮች ናቸው።

የማዕከላዊ ዕዝ አባል ካፒቴን ቢል ኧርባን እንዳሉት፤ ፍንዳታ ላደረሰው ቡድን እቅድ የሚነድፈውን ሰው ለመግደል የድሮን ጥቃት የተሰነዘረው #ናንጋሀር በተባለ የአፍጋኒስታን ግዛት ውስጥ ነው።

ኢላማው የISIS አባላት እንደነበሩና ንጹሀን ላይ ጉዳት እንዳልደረሰ ተገልጿል።

ሪፐር የተባለው ድሮን ከመካከለኛው ምሥራቅ ተወንጭፎ የISIS አባሉ መኪና ውስጥ ከሌላ የISIS አባል ጋር ሳለ መትቶታል።

በናንጋሀር ግዛት በርካታ የISIS-K አባላይ እንደመሸጉ ይነገራል።

ምንጭ፦ ቢቢሲ

@tikvahethiopia

የኢትዮጵያ ጠ/ሚ ዶ/ር ዐቢይ አሕመድ ከሳዑዲው ልዑል ፣ ምክትል ጠቅላይ ሚኒስትር እና የመከላከያ ሚኒስትር ሞሃመድ ቢን ሳልማን ቢን አብዱልአዚዝ ጋር በስልክ ተወያዩ።

የሳዑዲው ልዑል በውይይቱ ለኢትዮጵያ ህዝብ እድገትና ብልጽግና ለጠ/ሚ ዐቢይ ደግሞ ስኬትን ተመኝተዋል።

በውይይታቸው ወቅት በሁለትዮሽና የጋራ ጉዳዮች ላይ መክረዋል።

ምንጭ፡ Saudi Gazette

@tikvahethiopia