Сунтаар улууһун дьаһалтатын 2024 сыллааҕы үлэтин-хамнаһын отчуота ➡️ КҮҮКЭЙ.

🌿Күүкэй Сунтаар улууһун биир саамай тупсаҕай оҥоһуулаах нэһилиэгэ буолар. Манна куораттыы моһуоннаах, тупсаҕай көстүүлээх саҥа дьиэ-уот элбэх. Манан сылыктаатахха, күүкэйдэр туппуттара сатабыллаах, айан таһаарбыттара кэрэ.

🌿Ааспыт сылга "Хаарбах туруктаах дьиэттэн олохтоохтору көһөрүү" программанан түөрт квартиралаах таас дьиэ тутуллан үлэҕэ киирдэ. Манна эдэр специалистар олохсуйан олороллор. Ол курдук, эдэр дьон тэһийэн олорор, ситиһиилээхтик үлэлиир үтүө дойдута буолар.

🌿"Олохтоох көҕүлээһини өйүүр" программанан сайыҥҥы уу ситимин бастакы түһүмэҕин тартылар. Быйыл үлэ ситэ ыытыллыаҕа. Онон тыа сирин дьоно оҕуруот аһын дэлэйдик үүннэриэхтэрэ, олох хаачыстыбата тупсуоҕа.

🌿Аҕыйах нэһилиэнньэлээх дьоҕус бөһүөлэк дьоно мунньахха тоҕуоруһа муһуннулар. Барыта 29 киһи кыттыыны ылла. Отчуоту бастакы бөлөх салайааччыта Анатолий Григорьев туруорда.

❓️Олохтоохтор 2006 сыллаахха тутуллан үлэҕэ киирбит таас оскуоланы өрөмүөннүүргэ, гигиенист, медик идэлээхтэр наадалаахтарын эттилэр. Үүтү туттарыы бэрээдэгэр, саппараапкалыыр станцияны тутууга боппуруоһу туруордулар. Мунньах түмүгэр социальнай харалта управлениетын салайааччыта Михаил Тимофеев социальнай төлөбүрдэри уонна бу эйгэҕэ туох уларыйыылар баалларын билиһиннэрдэ. Тыа хаһаайыстыбатын управлениетын салайааччыта Владимир Анисимов, улуус кылаабынай бырааһа Константин Павлов үгүс ыйытыкка хоруйдаатылар.

🌿Элбэх көтөр-сүүрэр элиэтээн, сайылаан ааһар Күүкэй күөлэ Саха сирин биир ураты харыстанар сиринэн буолар. Маннык кэрэ айылҕалаах дойду дьоно улуус үлэтин "Биһириибит" диэн сыаналаатылар.

🚀 @suntaar_ulus

Сунтаар улууһун дьаһалтатын 2024 сыллааҕы үлэтин-хамнаһын отчуота ➡️ СУНТААР.

🔹 Улуус ааспыт сыллааҕы үлэтин нэһилиэнньэ иннигэр отчуоттуур мунньаҕа Сунтаар нэһилиэгэр түмүктүүр. Барыта 4 бөлөх улуус бары нэһилиэктэринэн (26 нэһилиэк) сылдьан киэҥ далааһыннаах үлэни ыыттылар. Маннык тэрээһин улуус сайдыытыгар суолталаах боппуруостары туруоран инники үлэни былаанныырга туһуланан ыытыллар.

🔹 Сунтаар нэһилиэгин олохтоохторо мунньаҕы истэ "Партизан" НАТК саалатын толору кэллилэр. Отчуоту улуус баһылыга Анатолий Григорьев туруорар.

🚀 @suntaar_ulus

Муус скульптуратын маастардара үс бастыҥнар кэккэлэригэр киирдилэр.

❄️🧊Сунтаар нэһилиэгин олохтооҕо, уран ууһа Александр Игнатьев уонна Элгээйиттэн төрүттээх Максим Охлопков улуус дьаһалтатын өйөбүлүнэн, Кытайга ыытыллыбыт бэстибээлгэ ситиһиилээхтик кыттан кэллилэр. Барыта 12 дойдуттан 60 маастар бэйэлэрин оҥоһуктарын, дьоҕурдарын, сатабылларын көрдөрдүлэр. Биһиги дьоммут мууска үһүс миэстэни, хаарга "За лучшую технику" номинацияны ситистилэр.

❄️🧊Бу бэстибээл аан бастакытын 1963 сыллаахха ыытыллыбыта. Онтон култуурнай революция кэмигэр тохтуу сылдьан баран 1985 сылтан хос сөргүтүллэн тиһигин быспакка ыытыллар. 39 сыл ынараа өттүгэр сүүнэ улахан, 250 миэтэрэ уһуннаах, 9 миэтэрэ кэтиттээх хаар оҥоһук туран, бу бэстибээл Гиннес рекордугар киирбитэ.

❄️🧊Маннык үрдүк таһымнаах күрэскэ республика хамаандата Саха сирин устуоруйатын кэпсиир, кэрэһэлиир хаарынан мамонт кыылы оттон мууһунан "Бириэмэни курдары ытыы" диэн ис хоһоонноох атынан көтүтэн иһэр бухатыыры оҥордулар.

Киһи сатабыла, баҕата муҥура суох!

🚀 @suntaar_ulus

Сунтаар улууһун бастакы муниципальнай модельнай библиотеката Бүлүүчээҥҥэ арылынна.

📚Библиотека үлэтин көдьүүһүн үрдэтиигэ уонна тупсарыыга туһуламмыт бырайыак көмөтүнэн Бүлүүчээннээҕи олохтоох библиотека «Сунтаар улууһун модельнай библиотеката» диэн статуһу ылла.

📚Улуус дьаһалтата 300 тыһыынча солкуобайдаах үбүлээһини көрөн, библиотека материальнай- техническэй базатын тупсарыыга уонна информационнай ресурсалары саҥардыыга күргүөмнээх үлэ барда. Саҥардыллыбыт ааҕар дьиэ арыллыыта олус истиҥник тэрилиннэ.

📚Манна саҥа кинигэлэри, сурунааллары атыылаһыы эрэ буолбакка, аныгы компьютернай, мультимедийнай оборудованиелар кэлэн турдулар, үрдүк интернет ситимэ киирдэ. Онон нэһилиэнньэ бары араҥатыгар информационнай наадыйыыларын толорууга хаачыстыбалаах өҥөнү оҥорор кыахтаннылар.

🚀 @suntaar_ulus