💫Сузор’е МАЦІ

***
Не знаю,
Ці ёсць жыццё
На нейкіх зорках.
Я знаў толькі адну зорку -
Пяцікрылую далонь маці,
На якой выраслі
Мы, наш хлеб, нашы песні,
Святло якой
Вечна струменіць.
Максім Танк

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

***
У запозненым прызнанні
Зноў ты, маці, прада мной:
Бачу я тваё старанне,
Бачу вечны клопат твой.
І на холадзе, і ў спёку
Досыць зроблена ўсяго.
Хоць заўсёды быў я збоку,
Недагледзеў аднаго.
І гадоў пражыў нямала,
А не знаю, як тады:
Дзе ты брала, намывала
Залацінкі дабраты?
Аляксей Пысін

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

***
Мама...
Маці...
Матуля...
Матуля...
Ты адна, як жыццё, як вясна.
Ты самотнага сына прытуліш,
І дачку ты прытуліш адна,
Бо найсветлыя словы ты знаеш,
Ад якіх пасвятлее ў душы.
Ты сабою наш дом асвятляеш
І, як сонца, ідзеш праз дажджы,
Праз мяцеліцы ў нашае Заўтра,
Каб мы Заўтра сваё бераглі
І не зніклі, нібы тыя таўры,
З нашай любай і слаўнай зямлі.
Віктар Шніп

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

Пакланюся...

Я пакланюся
Матулі роднай,
Што мне дарыла
Жыццё вясною.

Я пакланюся
За тыя рукі,
Якімі рэжу
І сталь, і камень.

За тыя вочы,
Якімі бачу
Я свет цудоўны
Маёй Радзімы.

За тое сэрца,
Якім спяваю
Хвалу і славу
Маёй краіне.
Адам Русак

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

МАМЕ

Вось, матуля, я зараз матуля сама.
Для цябе гэта трошачкі дзіўна, напэўна,
Што маленькай разумнай дзяўчынкі няма,
Ёсць жанчына з дзяўчынкай -
другой -
на каленях.
Толькі ты для мяне не змянілася, не -
Хай мінаюць гады і сплятаюцца лёсы,
І партрэты цямнеюць на бляклай сцяне,
І мяняюць свой колер і вочы, і косы -
Ёсць надмерная сувязь, якой не парваць,
Ёсць адбіткі на сэрцы. якіх не загладзіць.
Кожны год на лугах вырастае трава,
Кожны год аднаўляецца квецень у садзе,
І пяшчоты матулінай хочацца усім,
У любым, самым сталым, стамлёным узросце.
Мы, дарослыя, у вочы матулі глядзім
І дзяцінства сваё ў іх заўсёды знаходзім.
Людміла Рублеўская

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

ЛЮСТЭРКІ МАТЧЫНЫХ ВАЧЭЙ

Я ў юнацтве ўглядваўся ў люстэркі:
Бог, прарок - ні больш таго, ні менш...
За душой не маючы капейкі,
Я ў душы вызвоньваў грошны верш.

І глядзеўся ў вочы я каханай:
Прынц, ды толькі, што там ні кажы...
Па сяле блукаў як апантаны
З пачуццём узнёсласці душы.

А нядаўна ў вочы роднай маці -
Слёзныя люстэркі - зазірнуў
І ўбачыў воблік там дзіцяці -
Сам сябе і ўсю сваю віну
Перад ёй, прад грэшным мілым людам,
Прад каханай, што сышла даўно...

Я ў люстэркі больш глядзець не буду.
Знаю: ёсць праўдзівае адно -
Вочы маці - вечнасці акно...
Леанід Галубовіч

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

РУКІ МАЦІ

Як салодка спіцца
У роднай хаце,
Калі пасцель табе
Слала маці.

Як хораша ранкам
Прачынацца,
Калі да сняданка
Будзіць маці.

Як рупна сонца
З паўдня прыпякае,
Нада мной узлятае
Матчынымі рукамі.

Ператомлена ўздрыгваюць
Рукі маці:
Як кара, шчасце
Неба трымаць ім!

На крокі твае,
Як на песню,
Галаву ўзнімаю.
Пакуль іх чую,
Мне жыць не страшна,
Мама.
Ніна Мацяш

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

МАЦІ

Ты прыйдзеш нечакана, як святло
Блакітнай зоркі ў мроіве вясеннім.
Тваіх вачэй адчую я цяпло,
Перад табою стану на калені.
Я абдыму, пяшчотную, цябе,
У твой падол уб'юся галавою.
Рукой пагладзіш ціха па ілбе,
І стану раптам зноўку сам сабою,
Маленькім, неслухмяным, гаваркім.
Ад шчасця скалануся і заплачу...
Табе я абавязан сёння ўсім,
Калі хоць нешта на зямлі я значу.
Алег Салтук

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

***
Знайшоў старое пакрывала -
І светлы сум працяў мяне.
Яго мая матуля ткала...
Я кросны ўспомніў, як у сне:

Малюнак дзіўны нараджаўся,
Чаўнок снаваў туды-сюды...
Той каларыт не захаваўся -
Забралі доўгія гады...

У неба звонкае гляджу я,
Дзе сінь бясконцая цячэ.
Там, у раі, мая матуля
Анёлам пакрывалы тчэ.
Міхась Пазнякоў

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

***
Што такое чаканне?
Гэта ведае толькі мама.
Што такое сустрэча?
Гэта ведае мама таксама.
І ведае толькі мама,
Што такое і гора і страта.
Гэта тыя ж чатыры вуглы,
З якіх і складаецца
маміна хата.
Што ж такое шчасце людское?
Весялосць што такое?
А пра гэта сыноў запытайце.
Казімір Камейша

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

СЛОВА ПРА МАЦІ
Раней за ўсіх яна ўстае,
Пазней за ўсіх кладзецца,
Яна жыве, яна пяе, -
І дзецям лепш пяецца.

Ты рос, як цёплы каласок,
Пры месяцы і зорах.
Пачуеш мілае "сынок",
Хоць будзе і за сорак...

За словам маці ў свет пайшлі
Маленства, мара, мова,
І мір, і мужнасць на зямлі -
Жыцця твайго асновы.

Каб не тужыла па начах, -
Ёй падрастай на ўцеху!
Хай будзе ў матчыных вачах
Пабольш іскрынак смеху!

Ты не шкадуй ласкавых слоў
Для роднай, для адзінай.
Адказвай маці на любоў -
Будзь верным, добрым сынам!
Эдзі Агняцвет

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

***
Дарога -
Шэрая бясконцая нітка
з вузламі памяці.
З гэтай ніткі маці
На прызбе старой хаты
Вяжа і вяжа сустрэчы
І радуецца,
Калі скрыпнуць весніцы,
Калі пачуе знаёмыя крокі,
Калі зможа хоць на хвіліну
Адкласці пруткі
І прынесці на стол пачастунак:
Збан жывой вады - квасу -
І толькі што выцягнуты з печы
Хлеб -
акраец жнівеньскага сонца.
Максім Танк

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

ТВОЙ ВОБРАЗ

Твой вобраз прасветлы
Стаіць прад вачыма.
І, можа, таму мне
Далёка відно.
Радзімая Маці
І Маці-Радзіма,
Цяпер вы навечна
Зліліся ў адно.
Алесь Пісьмянкоў

#мама_маці_матуля #паэтычнае_шматгалоссе
#прысвячэнне
#аўтарскіпраект

💫Сузор’е МАЦІ

***

Рыпіць старэнькі калаўрот -
Вецер укруціўся ў спіцы.
Ля матулі дрэмле кот.
Час цячэ па белай нітцы.
Сонца села за акном
У стажок на загуменні.
І ў матулі на ўвесь дом
Свецяць з-пад рукі праменні.
Цемра ўхутала сяло.
Светла ў нас.
Мы не заснулі.
Пэўна, дзённае святло
Спрадзена ў клубок матуляй.
Віктар Шніп

#мама_маці_матуля #паэтычнае_шматгалоссе
#прысвячэнне
#аўтарскіпраект