Ганцавіцкі раён даўно не палеская глуш, як пісаў Канстанцін Міцкевіч, папрацаваўшы настаўнікам у Люсіне і ўжо стаўшы Якубам Коласам... А казкі там па-ранейшаму жывуць! І фальклорную спадчыну выкарыстоўваюць мясцовыя педагогі пераважна ў пазаўрочнай рабоце

📍 Чарговая камандзіроўка ў рэгіён карэспандэнта "НГ" прысвячалася казачна-фальклорнай тэме. Бо рыхтуецца IV Міжнародны форум даследчыкаў беларускіх народных казак, аб’яўлены і конкурс юных казачнікаў. А ў 2023-м якраз Аляксандра Захарчэня з вёскі Чудзін Ганцавіцкага раёна была ў ліку пераможцаў конкурсу: баяла мясцовую казку-прыпавесць "Сірочая доля".

Спачатку — знаёмства з удзельнікамі студыі "Класныя дзеці": яна створана ў раённым Цэнтры дзіцячай і юнацкай творчасці. Пад кіраўніцтвам Ірыны Гурскай там зрабілі пастаноўку паводле народных казак, якія запісаў фалькларыст Аляксандр Сержпутоўскі ў вёсцы Чудзін.

Народныя традыцыі станоўча ўплываюць і на стылістыку дэкаратыўна-прыкладных, мастацкіх работ, з якімі выхаванцы педагогаў цэнтра Ірыны Мінько і Марыны Скурат знаходзяць прызнанне на розных конкурсах. Доўгі час душэўна і ўмела кіруе цэнтрам Алена Ленкавец.

✔️ А потым — Чудзін! Урачыстай дэкламацыяй віталі гасцей на ганку школы вучні. А старэйшыя з іх у школьным музейным пакоі, пры стылізаваным Дрэве казак расказалі, як адкрыў свету "заказнік казак" сусветнага значэння Аляксандр Сержпутоўскі. Ён, дарэчы, педагог па першай адукацыі: у 1884-м скончыў Нясвіжскую настаўніцкую семінарыю. Доўгі час (1906—1930) працаваў у этнаграфічным аддзеле Рускага музея: з аддзела ўтварыўся музей этнаграфіі (Санкт-Пецярбург).

Пра тое, як сёння казкі спрыяюць выхаванню дзяцей і падлеткаў, пра паважлівае стаўленне ў школе да народных традыцый, пра творчыя работы па гэтай тэматыцы расказвалі дырэктар Валянціна Сергіеня, настаўніцы Іна Валодзька і Галіна Мароз. І яшчэ быў нечаканы — казачны — сюрпрыз!

🔜 Які? Пра ўсё гэта і пра сюрпрыз больш падрабязна чытайце на старонках "Настаўніцкай газеты"!