Молитва пред Казанской иконой Богоматери о помощи и здравии

«О, Пресвятая Владычице Богородице, Царице Небеси и земли, вышшая ангел и архангел и всея твари честнейшая, чистая Дево Марие, миру благая Помощнице, и всем людем утверждение, и во всяких нуждах избавление! Призри и ныне, Госпоже Всемилостивая, на рабы Твоя, Тебе умиленною душею и сокрушенным сердцем молящияся, со слезами к Тебе припадающия и покланяющияся пречистому и цельбоносному образу Твоему, и помощи и заступления Твоего просящия.

О, Всемилостивая и Премилосердая Дево Богородице Чистая! Воззри, Госпоже, на люди Твоя: мы бо грешнии не имамы иныя помощи, разве Тебе и от Тебе рождшагося Христа Бога нашего. Ты еси заступница и предстательница наша. Ты еси обидимых защищение, скорбящим радование, сирым прибежище, вдовам хранительница, девам слава, плачущим веселие, больным посещение, немощным исцеление, грешным спасение. Сего ради, о Богомати, к Тебе прибегаем, и на Твой Пречистый образ с Предвечным на руку Твоею держимым Младенцем, Господем нашим Иисусом Христом взирающе, умиленное пение Тебе приносим и вопием: помилуй нас, Мати Божия, и прошение наше исполни, вся бо суть возможна ходатайству Твоему, яко Тебе слава подобает ныне и присно и во веки веков. Аминь.»

#молитва #икона #КазанскаяИкона #Богородица #Богоматерь #БожияМатерь #православие #молитва #храм #религия #христианство #вераправославная

Другие молитвы иконе Казанской Божьей Матери:
https://pravoslavnye-molitvy.ru/kazanskoy-ikone/

Молитва святой мученице Параскеве Пятнице о замужестве и даровании детей

(о зачатии, о рождении ребенка, от соперницы, при болезнях младенцев)

«О святая и преблаженная мученице Христова Параскево, красото девическая, мучеников похвало, премудрых удивление, веры христианской хранительнице, идольския льсти обличительнице, Евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в чертозе Жениха твоего Христа Бога светло веселящаяся, сугубым венцем девства и мученичества украшенная!
Молим тя, святая мученице: буди о нас (имена) печальница ко Христу Богу, Егоже преблаженнейшим зрением присно веселишися; разжени твоими святыми молитвами мрак, прибывший от грехов наших: испроси у Бога светов свет благодати душевным и телесным очесем нашим: просвети нас, омраченных грехми, светом Божия благодати, да твоих ради святых молитв дастся безочесным сладкое зрение. О великая угоднице Божия! О мужественнейшая дево! О крепкая мученице, святая Параскево! Святыми твоими молитвами буди нам грешным помощница, ходатайствуй и молися об окаянных и зело нерадивых грешницех, ускори на помощь нам, ибо зело немощнии есмы.
Моли Господа, чистая девице, моли Милосерднаго, святая мученице, моли Жениха твоего, непорочная Христова невесто, да твоими молитвами пособствовани, мрака же греховнаго избывше, во свете истинныя веры и деяний божественных внидем в свет вечный дне невечерняго, во град веселия приснаго, в немже ты ныне светло блистаеши славою и веселием безконечным, славословящи и воспевающи со всеми небесными силами трисиятельное единое Божество, Отца и Сына и Святаго Духа, ныне и присно и во веки веков. Аминь.»

#святая #Параскева #ПараскеваПятница #мученица #религия #христианство #православие #молитвы

Другие молитвы святой Параскеве Пятнице:
https://pravoslavnye-molitvy.ru/paraskeve-pyatnice/

Молитва святителю Димитрию, митрополиту Ростовскому об исцелении и заступлении

«О, предивный и преславный чудотворче Димитрие, исцеляяй недуги человеческия! Ты неусыпно молиши Господа Бога нашего о всех грешных: молю убо тя, буди ми ходатай пред Господем и помощник на преоборение страстей ненасытныя плоти моея и на одоление стрел сопротивника моего диавола, имиже уязвляет немощное сердце мое и, аки гладный и лютый зверь, алчет погубити душу мою. Ты, святителю Христов, моя ограда, ты мое заступление и оружие! За твоим содействием сокрушу вся во мне сопротивная воле Царя царствующих. Ты, великий чудотворче, во дни подвигов твоих в мире сем ревнуя о Православной Церкви Божией, яко истинный и добрый пастырь, неблазненно обличал еси грехи и невежествия людския, и уклонившихся от стези правды в ереси и расколы наставлял еси на путь истины.

Споспешествуй убо и мне исправити кратковременный путь жизни моея, да непреткновенно пойду по стези заповедей Божиих и неленостно поработаю Господеви моему Иисусу Христу, яко единому Владыце моему, Искупителю и праведному Судии моему. К сим же припадая, молюся ти, угодниче Божий, егда изыти души моей из телесе моего, избави ю от темных мытарств: не имам бо добрых дел ко оправданию моему: не даждь сатане возгордиться победою над немощною душею моею. Избави ю от геенны, идеже плач и скрежет зубов, и святыми молитвами твоими сотвори мя причастника Небеснаго Царствия в Троице славимаго Бога, Отца и Сына и Святаго Духа. Аминь.»

#святой #Димитрий #Дмитрий #ДимитрийРостовский #молитва #православие #икона #религия #церковь

Читать другие молитвы святителю Димитрию Ростовскому:
https://pravoslavnye-molitvy.ru/dimitriyu-rostovskomu/

Молитва преподобномученице Анастасии Римляныне

«Девственниц похвало и мучениц славо, Анастасие преподобная! К тебе во умилении сердец наших припадаем и твоего заступления у Господа о нас молим. Аще бо чистоте твоей не поревновахом и безбоязненнаго исповедания твоего не приобщихомся, паче же многими прегрешеньми и лютыми паденьми и отступствы гнев Божий привлекохом, но не хощем во гресех наших умрети и, на твоя мужеския подвиги взирающе, паки на одоление страстей наших ополчаемся. Сие же ведуще, яко кроме благодатныя помощи ничто же благое сотворити возможем, тую нам от Господа подати тебе просим. Ты бо, преподобномученице преславная, велие ко Владыце дерзновение стяжала еси, яко прославившая Его в чистой душе твоея и в телеси твоем страдальчестем, зане вся прельщения и прещения мучителя презревши, искоренение же зубов и ногтей истерзание, и сосцев и рук и ног отсечение сладце претерпевши, дерзновенно вопияла еси: “Христос есть богатство мое и похвала”! Темже от того богатства и нашей нищете духовная подаждь дарования и от безмерных прегрешений живот наш соблюди, мир и безмятежие нам испроси, от нужды и уныния нас предстательством твоим огради, друг ко другу нас в послушании и братолюбии настави и ко Господу очи сердец наших всегда возводи, во еже присно славити нам Отца и Сына и Святаго Духа державу, и твое теплое предстательство во веки веков. Аминь.»

#святая #Анастасия #АнастасияРимляныня #молитва #православие
#вера #религия #икона

Читать акафист преподобномученице Анастасие Римляныне:
https://pravoslavnye-molitvy.ru/akafist-anastasiya-rimlyanynya/

Молитва Владимирской иконе Божией Матери от всякого зла

«О Пресвятая Госпоже Владычице Богородице! Вышши еси всех Ангел и Архангел и всея твари честнейши, помощница еси обидимых, ненадеющихся надеяние, убогих заступница, печальных утешение, алчущих кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй страну нашу, преосвященныя митрополиты, архиепископы и епископы, и весь священнический и иноческий чин, военачальники, градоначальники и христолюбивое воинство, и доброхоты, и вся православныя христианы ризою Твоею честною защити, и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя еже ко спасению, и сподоби ны, грешныя рабы Твоя, Царствия Сына Твоего, Христа Бога нашего, яко Держава Его благословена и препрославлена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.»

#ВладимирскаяИкона #Богородица #БожияМатерь #Богоматерь #молитва

Читать другие молитвы пред Владимирской иконой Богоматери:
https://pravoslavnye-molitvy.ru/vladimirskaya-ikona/

Молитва святителю Тихону, патриарху Московскому

«О пастырю наш добрый, святый великий патриарше Тихоне, яко град горний, ты явился еси, добрая дела твоя и доныне светятся пред человеки. Вемы, яко ты, предстоя Престолу Пресвятыя Троицы, велие имаши дерзновение в молитвах пред Господем. Воззри и ныне на нас грешных и недостойных чад твоих, к тебе бо, яко имущему велие дерзновение пред Творцем всяческих, ныне припадаем и усердно молимся: умоли Господа, да подаст нам решимость стяжати благочестие отцев наших, егоже ты стяжал еси от юности твоея. Ты в житии своем ревностный защититель и хранитель истинныя веры был еси, помози и нам незыблему соблюсти веру православную. Тихая бо душа твоя зело преуспела в божественном смиренномудрии, научи и нас разум наш питати не многомятежною мудростию человеческою, но смиренным познанием воли Божией. Ты пред лицем лютых врагов Христовых Истиннаго Бога дерзновенно исповедал еси, молитвою своею укрепи нас, малодушных, да и мы всегда и всюду противостанем духу безбожия и льсти. Ей, угодниче Божий, не презри нас, молящихся тебе, ибо не токмо от бед и скорбей избавление просим, но силы и твердости, великодушия и любве просим, дабы переносити оныя напасти, возстающия на ны. Испроси нам неослабное терпение даже до конца жития нашего, мир с Господом и грехов отпущение. Отче святый! Укроти в стране нашей ветры неверия и смуты, да водворит Господь на земли Российстей тишину и благочестие и любовь нелицемерную, молитвами твоими да сохранит ю от междоусобныя брани, да укрепит святую Церковь нашу Православную, да не оскудеет она истинными пастырями, добрыми делательми, право правящими слово евангельския истины. Упаси и заблуждшия овцы стада Христова. Наипаче же моли Господа сил, да возродится Русская земля святым покаянием и единым сердцем и едиными усты прославит дивнаго во святых Своих Бога, в Троице славимаго Отца и Сына и Святаго Духа во веки веков. Аминь.»

#Тихон #ТихонМосковский

Акафист св. Тихону Московскому:
https://pravoslavnye-molitvy.ru/akafist-tikhonu-patriarkhu-moskovskomu/

Молитва святителю Герману, архиепископу Казанскому и Свияжскому от врагов и бед

«О святи́телю Христо́в Ге́рмане, богому́дрый оби́тели сея́ основа́телю, духо́вный и́ночествующих вождю́, приме́ром Христоподража́тельной жи́зни твоея́ всех ве́рных и в жи́зни и по кончи́не твое́й наставля́ющий! К тебе́ прибега́ем и тебе́ усе́рдно мо́лим: соде́лай святы́ми твои́ми моли́твами, да и мы благода́тию Бо́жиею сози́ждемся во оби́тель Ду́ха Свята́го, после́дованием жи́зни твое́й вообража́емся во о́браз Христо́в, во о́браз преподо́бия и пра́вды, и осеня́емы си́лою благоприя́тных моли́тв твои́х, прино́сим плоды́ благи́х дел, благоугожда́юще Го́споду, да тщи́мся ходи́ти во све́те лица́ Его́, па́че всего́ люби́ти Его́ и исполня́ти святу́ю во́лю Его́, служи́ти во бла́го бли́жних на́ших и всеме́рно соде́ловати спасе́ние свое́, на пути́ многопреме́нчивой жи́зни, терпе́нием вся́кой тесноты́, скорбе́й, лише́ний. А да́бы возмо́щи нам понести́ благо́е и́го Христо́во, моли́, свя́тче Бо́жий, о укрепле́нии не́мощи на́шей по́мощию свы́ше, да изба́вит нас Госпо́дь от враг ви́димых и неви́димых, от о́гненнаго и во́днаго потребле́ния, от неблагорастворе́ния возду́ха и тлетво́рных ветр, а па́че от душепа́губнаго пла́мене, потопле́ния и обурева́ния страсте́й наших, да, под кро́вом бла́гости и милосе́рдия Бо́жия, ти́хое и безмо́лвное житие́ поживе́м, жду́ще блаже́наго явле́ния Го́спода и Спа́са на́шего Иису́са Христа́, Ему́же со Отце́м и Святы́м Его́ Ду́хом честь и сла́ва во ве́ки веко́в. Ами́нь.»

#молитва #святой #Герман #ГерманКазанский #православие #икона

Другие молитвы святителю Герману, архиепископу Казанскому и Свияжскому: https://pravoslavnye-molitvy.ru/germanu-kazanskomu/

Молитва иконе Божией Матери «Скоропослушница» об исцелении болезней

«Преблагословенная Владычице, Приснодево Богородице, Бога Слова паче всякаго слова на спасение наше рождшая, и благодать Его преизобильно паче всех проявившая, море явльшаяся Божественных дарований и чудес приснотекущая река, изливающая благодать всем, с верою к Тебе прибегающим! Чудотворному Твоему образу припадающе, молимся Тебе, всещедрей Матери человеколюбиваго Владыки: удиви на нас пребогатыя милости Твоя, и прошения наша, приносимая Тебе, Скоропослушнице, ускори исполнити все, еже на пользу во утешение и спасение, коемуждо устрояющи. Посети, Преблагая, рабы Твоя благодатию Твоею, подаждь недугующим цельбу и совершенное здравие, обуреваемым тишину, плененным свободу и различными образы страждущих утеши; избави Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий; и душевнаго разслабления, обуревания страстей и грехопадений свободи рабы Твоя, яко да непреткновенно, во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение, со Безначальным Его Отцем и Пресвятым Духом, ныне и присно и во веки веков. Аминь.»

#молитва #Скоропослушница #Богородица #Богоматерь #ДеваМария #исцеление

Другие молитвы иконе Божией Матери «Скоропослушница»:
https://pravoslavnye-molitvy.ru/skoroposlushnica/

Молитва святому блаженному Максиму Московскому о здравии болящих

«О угодниче Божий, блаженне Максиме! Помолися Господу Богу о нас, рабех Божиих (имена), к земли приверженных, да обратит Господь наша мысли и желания к небесным и да укрепит будущих нетленных сокровищ желати, да подаст нам силу к побеждению страстей, мыслей и желаний греховных, да пленит наш ум в послушание веры, да избавит от высокоумия, суемудрия и мудрость духовную нам дарует: таже окамененная сердца наша слезами умиления о гресех сокрушения да растворит и да согреет я к нашему Создателю любовию и братолюбием ко ближним нашим. Блаженне Максиме, принеси ко Господу молитву о нас, яко да не по грехом нашим воздаст нам, ниже по беззаконием нашим накажет нас, но да пробавит милость Свою на нас, от всяких нужд, бед, напастей, скорбей и болезней избавляя, и имиже весть судьбами да наставит нас на путь спасения, и да сподобит нас христианскую кончину неболезнену, непостыдну и мирну прияти и Небеснаго Царствия наследие получити со всеми святыми во веки веков.»

#молитвы #святой #Максим #блаженный #МаксимМосковский

Читать другие молитвы блаженному Максиму Московскому:
https://pravoslavnye-molitvy.ru/maksimu-moskovskomu/

Молитва святителю Иоанну Милостивому о помощи

«Святителю Божий Иоанне, Милостиве защитниче сирых и сущих в напастех! К тебе прибегаем и тебе молимся, яко скорому покровителю всех ищущих от Бога утешения в бедах и скорбех. Не престай моляся ко Господу о всех с верою притекающих к тебе! Ты, преисполнен сый Христовы любви и благости, явился еси яко чудный чертог добродетели милосердия и стяжал еси себе имя «Милостивый». Ты был еси яко река, непрестанно текущая щедрыми милостьми и всех жаждущих обильно напаяющая. Веруем, яко, по преселении от земли на небо, усугубися в тебе дар благодати сея и яко соделался еси неисчерпаемый сосуд всякия благостыни. Сотвори убо твоим ходатайством и заступлением пред Богом «всякия утехи», да вси, прибегающии к тебе, обретают мир и безмятежие: даруй им утешение в печалех временных и пособие в нуждах житейских, вселив в них надежду вечнаго упокоения во Царствии Небеснем. В житии твоем на земли ты был еси пристанище всем сущим во всякой беде и нужде, обидимым и недугующим; ни един от притекавших к тебе и просивших у тебе милости лишен бысть твоея благостыни. Тожде и ныне, царствуя со Христом Богом на небеси, яви всем покланяющимся пред честною твоею иконою и молящимся о помощи и заступлении. Не точию сам ты творил еси милость беспомощным, но и сердца других воздвигал еси ко утешению немощных и к призрению убогих. Подвигни убо и ныне сердца верных к заступлению сирых, утешению скорбящих и успокоению неимущих. Да не оскудевают в них дары милости, паче же да вселится в них мир и радость о Дусе Святе, — во славу Господа и Спаса нашего Иисуса Христа, во веки веков. Аминь.»

#молитва #святой #святитель #ИоаннМилостивый #Иван #икона

Читать другие молитвы святителю Иоанну Милостивому:
https://pravoslavnye-molitvy.ru/ioannu-milostivomu/

Молитва святителю Иоанну Златоустому о помощи и вразумлении

(Молитва о укреплении веры, о вразумлении от бесов, о помощи и материальном благополучии)

«О святителю великий Иоанне Златоусте! Многая и различная дарования от Господа приял еси и, яко раб благий и верный, вся данныя тебе таланты добре умножил еси: сего ради воистину вселенский учитель был еси, яко всяк возраст и всяко звание от тебе поучается. Ты еси отроком — послушания образ, юным — целомудрия светило, мужем — трудолюбия наставник, старым — незлобия учитель, иноком — воздержания правило, молящимся — вождь от Бога вдохновенный, мудрости ищущим — ума просветитель, витиям доброглаголивым — слова живаго источник неисчерпаемый, благотворящим — милосердия звезда, начальствующим — правления мудраго образ, правды ревнителем — дерзновения вдохновитель, правды ради гонимым — терпения наставник: всем вся был еси, да всяко некия спасеши. Над всеми же сими стяжал еси любовь, яже есть соуз совершенства, и тою, яко силою Божественною, вся дарования во единем лице твоем во едино совокупил еси и туюжде любовь, разделенная примиряющую, в толковании словес апостольских всем верным проповедал еси. Мы же грешнии, по единому кийждо свое дарование имуще, единения духа в союзе мира не имамы, бываем тщеславни, друг друга раздражающе, друг другу завидяще; сего ради дарования наша разделенная не в мир и спасение, но во вражду и осуждение нам являются. Темже к тебе, святителю Божий, припадаем, раздором обуреваеми, и в сокрушении сердца просим: молитвами твоими отжени от сердец наших всяку гордость и зависть, нас разделяющия, да во мнозех удех едино тело церковное будем, да по словеси твоему молитвенному возлюбим друг друга и единомыслием исповемы Отца и Сына и Святаго Духа, Троицу Единосущную и Нераздельную, ныне и присно и во веки веков. Аминь.»

#молитва #святой #святитель #ИоаннЗлатоус #Иван

Читать другие молитвы святителю Иоанну Златоустому:
https://pravoslavnye-molitvy.ru/ioannu-zlatoustu/

Молитва апостолу Филиппу

«О, святый и всехвальный провозвестниче Евангелия Христова, славный учениче Христов апостоле Филиппе. Ты проповедуя слово Божие, многия труды, многия петешествия, многия страдания претерпел еси, последи же веру твою крестною смертию запечатлел еси. Ныне же предстоя престолу Учителя твоего и Господа Иисуса Христа, вознеси о нас моление к Нему, да не тща будет в нас искупительная жертва Его, да обратит нас от тьмы греховныя к свету заповедей и на путь правый наставит нас. Умоли Его, святый апостоле, веру Православную в нас до конца дней наших непоколебиму сохранити, Церковь Свою святую непреобориму от ересей и расколов до скончания века утвердити, болящия исцелити, от бесных бесы отгнати и всем нам на всяку потребу полезную милость Свою ниспослати. Да тако мы, в верности Евангельскому учению пребудем и сотворив вся повеленная нам, сподобимся непостыдной, мирной, Святых Таин причастной христианской кончины, и во Царствии Небеснем с тобою и всеми святыми прославим Христа Бога, Ему подобает честь и поклонение вкупе со безначальным Его Отцем и Пресвятым и Благим и Животворящим Его Духом ныне и присно и во веки веков. Аминь.»

#молитва #святой #апостол #Филипп #апостолФилипп #икона #религия

Читать другие молитвы апостолу Филиппу:
https://pravoslavnye-molitvy.ru/apostolu-filippu/

Молитва мученикам Гурию, Самону и Авиву о сохранении семьи

«О, преславнии мученицы Гурие, Самоне и Авиве! К вам, яко скорым помощником и теплым молитвенником, мы немощнии и недостойнии прибегаем, усердно моляще: не презрите ны, во многая беззакония впадшия и по вся дни и часы согрешающия; наставите на путь правый заблуждшия, исцелите страждущия и скорбящия; соблюдите ны в непорочнем и целомудреннем житии; и якоже древле, тако и ныне покровителие супружеств пребудите, в любве и единомыслии сия утверждающе и от всех злых и бедственных обстояний избавляюще. Защитите, о многомощнии исповедницы, вся православныя христианы от напастей, злых человек и козней демонских; оградите я от нечаянныя смерти, умоляюще Всеблагаго Господа, да великия и богатыя милости нам, смиренным рабом Своим, пробавит. Несмы бо достойни нечистыми устнами призывати великолепое имя Создателя нашего, аще не вы, святии мученицы, за ны ходатаи будете; сего ради к вам прибегаем и предстательства вашего пред Господем о нас просим. Такожде избавите нас от глада, потопа, огня, меча, нашествия иноплеменных, междоусобныя брани, смертоносныя язвы и всякаго душепагубнаго обстояния. Ей, страстотерпцы Христовы, устройте нам молитвами вашими вся благая и полезная, да благочестно житие временное прешедше и кончину непостыдну стяжавше, удостоимся теплым заступлением вашим со всеми святыми одесную Правосуднаго Бога Судии стати и Того непрестанно славити со Отцем и Святым Духом во веки веков. Аминь.»

#святые #ГурийСамонАвив #мученики #исповедники #молитва

Читать другие молитвы святым мученикам Гурию, Самону и Авиву:
https://pravoslavnye-molitvy.ru/guriyu-samonu-i-avivu/

Молитва святому апостолу и евангелисту Матфею

«О, преславный апостоле Матфее, душу за Христа предавший и кровию твоею пажить Его удобривший! Услыши чад твоих молитвы и воздыхания, сердцем сокрушенным ныне приносимыя. Се бо беззаконьми омрачихомся, и того ради бедами, якоже тучами, обложихомся, елеа же добраго жития обнищахом зело, и не возможем противитися волком хищным, иже расхищати наследие Божие дерзостно тщатся.

О, сильний! Понеси немощи наша, не отлучайся духом от нас, да не разлучимся й конец от любве Божия, но крепким заступлением твоим нас защити, да помилует Господь всех нас молитв твоих ради, да истребит же рукописание безмерных грехов наших, и да сподобит со всеми Святыми блаженнаго Царствия и брака Агнца Своего, Емуже честь и слава, и благодарение и поклонение, во веки веков. Аминь»

#молитва #апостол #Матфей #православие #икона #евангелист

Молитва святителю Григорию Чудотворцу, епископу Неокесарийскому

«О, пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Григорие! Предстоя у Престола всех Царя и наслаждаяся света Единосущныя Троицы и херувимски со ангелы возглашая песнь трисвятую великое и неизследованное дерзновение имея ко Всемилостивому Владыце, молися паствы Христовы спасти людей, благостояние святых церквей утверди, архиереи благолепием святительства украси, монашествующих к подвигам добраго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немоществующия исцели, и везде тепле призывающих тя и с верою притекающих к тебе и усердно припадающих и молящихся от всяких напастей и бед ходатайством твоим свободи. Моли о нас Всещедраго и Человеколюбиваго Христа Бога нашего, да и в день страшнаго пришествия Его шуияго стояния избавит нас, и радости святых причастники сотворит со всеми святыми во веки. Аминь.»

#молитва #святые #святитель #чудотворец #ГригорийЧудотворец #Григорий #религия #христианство #православие #вера

Читать акафист святителю Григорию Чудотворцу:
https://pravoslavnye-molitvy.ru/akafist-grigoriyu-chudotvortsu/

Молитва преподобному Никону, игумену Радонежскому о защите

«О священная главо, Церкве Православныя похвало, святый угодниче Божий и досточудный служитель Животворящия Троицы, преподобне и Богоносне отче Никоне, присный угодниче и блаженный наследниче аввы Сергия! Ты положил еси велия труды, благоустрояя насажденный им Божий вертоград, дом Животворящия Троицы, лучами света своего озаряющ всю страну нашу и сущих в мори далече. Кто исчислит твоя подвиги, нощныя бдения, слезы умиления, сердечныя молитвы и душевныя воздыхания; кто виде твою неустанную брань с духами злобы поднебесными; кто слыша глаголы благодарения, исходящия из уст твоих, егда Владыка Господь избавляше тя в лютых обстояниих и вражеских напастех; воистину от юности ты благоугодил еси Подвигоположнику Христу всем своим житием и умножил еси данныя тебе Богом таланты во спасение души своея и врученнаго тебе стада словесных овец. Приими, отче святый, нашу хвалу и благодарение за вся твоя молитвы о чтущих святую память твою, да внемлет Всеблагий Господь твоему предстательству пред Ним о нас, немощных и убогих рабех Его. Помози чадом твоим, в иночестве подвизающимся и с верою притекающим ко гробу твоему, да никто от них впадет в сети вражия и да не погибнет для жизни вечныя. Умоли Начальника жизни Христа, да изведет из темницы души наша и направит стопы наша к Царству вечных благ, идеже непрестанно славится Пречестное и Великолепое имя Отца и Сына и Святаго Духа. Аминь.»

#святой #Никон #НиконРадонежский #преподобный #игумен #молитва

Читать другие молитвы преподобному Никону Радонежскому:
https://pravoslavnye-molitvy.ru/nikonu-radonezhskomu/