Yurtimizda bo‘lib o‘tayotgan Ozarbayjon madaniyati kunlari doirasida bugun O‘zbekiston tasviriy san’at galereyasida tashkil qilingan “Ozarbayjon madaniyati” nomli ko‘rgazmaning ochilishida ishtirok etdik.

Namoyishga qo‘yilgan suratlarda qardosh mamlakatning betakror manzillari, tarixiy obidalari aks ettirilgan bo‘lsa, qo‘li gul ijodkorlarning matoga bitgan naqshlari, milliy osori-atiqalari orqali ozar xalqining boy madaniyati to‘g‘risida yanada kengroq tasavvurga ega bo‘ldik.

Albatta, ekspozitsiyaga qo‘yilgan har bir surat, ashyo qiymatli va katta ahamiyatga ega. Unda buyuk tarix, betakror qadriyatlar yaqqol ufurib turibdi. Shaxsan men ko‘rgazmani tomosha qilib, qiziqarli ma'lumotlarni eshitib, yorqin taassurot oldim. O‘ylaymanki, galereyaga tashrif buyurgan barcha ana shunday tuyg‘uni his qildi.

Shundan so‘ng Ozarbayjon xalqining umummilliy yetakchisi Haydar Aliyev yodgorligi poyiga gul qo‘yib, xotirasiga hurmat bajo keltirdik. Shu yerda hamkasblarimiz bilan samimiy muloqot qildik. Mazkur yodgorlik majmuasi shaxsan Prezidentimiz Shavkat Mirziyoyev tashabbusi bilan barpo etilgani, bu o‘zbek xalqining yaqin do‘sti, atoqli siyosiy va davlat arbobi Haydar Aliyevga, ozar xalqiga yuksak ehtirom ifodasi ekanini alohida ta'kidladik.

Chindan ham, Haydar Aliyev mustaqil Ozarbayjonning asoschisi sifatida tarixga kirgan. Mamlakatining bugungi darajaga erishishida uning xizmatlari beqiyos. Haydar Aliyev O‘zbekiston bilan do‘stona munosabatlarni mustahkamlashga doimo alohida e'tibor qaratgan. Shuning uchun ham uning nomi yurtimizda hamisha hurmat bilan tilga olinadi.

Mehmonlar O‘zbekistonda amalga oshirilayotgan ulkan o‘zgarishlar, xalqimiz o‘tmishi, boy madaniyati haqida ham samimiy fikrlarini izhor etishdi. Bu, albatta, kishiga katta mamnuniyat bag‘ishlaydi.

Umuman, tarixiy rishtalar, mushtarak qadriyatlar o‘zaro munosabatlarimiz rivojida muhim o‘rin tutadi. Bugun mana shu haqiqatni yana bir karra his qildik.

🚀 Telegram / 📷 Instagram