РЕКОМЫ БÆРÆГБОН

➖Ирон адæммæ цы бирæ дзуæрттæ ис, æрвыл аз галæргæвстытæ кæмæн фæкæнынц, уыдоны æхсæн ис алæмæт аргъауы хуызæн Цъæйы комы, «Цъæйдон»-ы галиуварс уæлæфцæг фæзуатыл цы фыдæлтыккон кувæндон ис, уыцы Реком.

📝 Йæ бæрæгбон ын Цъæйы цæрджытæ ӕмӕ ӕппӕт ирон адӕм дӕр фыдæй фыртмæ бæрæг кодтой æмæ абон дæр бæрæг кæнынц хурхæтæны мæйы (июны) дыккаг сабаты. АЦЫ АЗ БÆРÆГБОН ЦÆУЫ 8 ИЮНМÆ (САБАТ) Фæстаг азты йæ иуæй-иу адæмтæ бæрæг кæнын райдыдтой æртыккаг сабаты. Кæй зæгъын æй хъæуы, уый раст нæу, фæлæ йæ рæдыдыл банымайæн дæр нæй. Уымæн æмæ кæд мах уырны æмæ æппæт дуне Хуыцауы сконд у, уæд æм кувæн дæр ис адæймаджы удæн кæд æнцондæр у, уæд. Уыимæ, фыдæлтæ цы фæтк ныууагътой, уый нæ рох кæнгæйæ.
Уый хыгъд Рекомы номыл кувæндонтæ ис Хохы Санибайы, Цымытийы, Дзуарыхъæуы, Гуылæры, Зæрæмæджы. Хуссар Ирыстоны – Ерманы, Чеселты, Едысы, Хъодзы, Дзомагъы.
Дзырд Реком цы нысан кæны, уый биноныг æвзæртст абоны онг дæр нæма у, кæд æмæ иуæй-иу ахуыргæндтæм сæхи хъуыдытæ ис, уæддæр. Фæлæ уый хыгъд, Рекомы кой фыцаджыдæр чындæ уыд Нарты кадджыты, зæгъгæ, Хуыцау Нарт Батрадзы мæлæты фæстæ цы æртæ цæстсыджы æрыппæрста, уыдон фестадысты кувæндæттæ: Реком – Цъæйы комы, Таранджелоз – Тырсыгомы, Мыкалгабыртæ – Зæрæмæджы.

👆 Ам фæбæрæг кæнын хъæуы уый дæр æмæ рагзаманты Рекомы кувæндонмæ айдагъ Ирыстоны цæрджытæ нæ цыдысты кувынмæ, фæлæ Гуырдзыстонæй дæр. Уый, æвæццæгæн, уыдысты уыдон, æмæ уырдæм ирæттæй хуыздæр цард агур чи афтыд æмæ чи сгуырдзиаг, уыимæ сæ рагфыдæлты æгъдау чи нæ сæфта, ахæмтæ. Фæлæ куыд фæстæдæр, афтæ йæм Гуырдзыстонæй ничиуал цыд.
Уæвгæ айдагъ Гуырдзыстонæй нæ, фæлæ йæм ирыстойнæгтæ дæр бирæ азты дæргъы се ꞌргом куыд æмбæлы, афтæ нал здæхтой. Йæ бынмæ ма цыдысты æмæ йын хъӕугуывд кодтой æрмæстдæр Цъæйы цæрджытæ. Фæлæ 1995 азы Реком æнæбæрæг уаврты куы басыгъд æмæ йæ Иры сагсур лæппутæ фæстæмæ куы сног кодтой, йæ быны йын стыр куывд куы скодтой, уæд та дзыллæтæ се 'ргом аздæхтой сæ фыдæлты карз дзуармæ.

👇🏻👇🏻👇🏻

❗Абон Рекомы бæрæгбоны рæстæг куывддон адæмæй къух бакæнæн дæр нæ вæййы. Адæмтæ се ꞌртæ гуыборы, æртæ фæрсчъы æмæ бæгæныимæ сæхи бафæдзæхсынц, сæ удты тæригъæдтæ схъарынц æмæ ног уæлмонцтимæ аздæхынц фæстæмæ сæ фæрныг хæдзæрттæм.

✅Уыимæ, Рекомы кувæндонмæ сылгоймæгтæн нæ раздæр, нæдæр абон цæуыны бар нæ уыд æмæ нæй. Уыдонæн ис Рекомæй чысыл дæлдæр Чызджыты Майрæм æмæ Мады Майрæмы дзуæрттæ. Ам ис чызджыты чысыл кафæн фæз æмæ уым сæхицæн скæнынц хъазт, фæкафынц, фæзарынц, хистæр кары сылгоймæгтæй ма рагон ирон хъæзтытæ чи фæзоны, уыдон сæ фæамонынц æрыгон чызджытæн.

🐎Ахæм кафæн фæз ис Рекомы тæккæ фæстæ нæлгоймæгтæн дæр. Фæлæ дзы уый фæзынд хæд æрæджы. Цъæйы хъæуы хистæртæ-иу куыд дзырдтой, уымæ гæсгæ дзуары хæд бын не ꞌмбæлы нæдæр хъæрæй дзурын, нæ дæр кафын. Хъуамæ дзы, зæгъынц, хъуыса æрмæстдæр хистæрты куывд æмæ кæстæрты Оммен. Кафтæн, дугъæн, ерыстæн та Рекомæй чысыл æддæдæр уыд уæрæх фæз, хонгæ дæр æй кодтой «Хъазæн фæз». Ацы бынаты-иу куывдмæ æрбацæуæг æрыгон фæсивæд ерыстæ кодтой кафынæй, зарынæй, бæхтыл дугъ уадзынæй, хъæбысæй хæцынæй æмæ афтæ дарддæр. Фæлæ, зæгъынц, æнусон ницы у, тæрккъæвдаты фæстæ «Хъазæн фæз»-ы сæрмæ хох фехæлд æмæ йæ дурæй байдзаг кодта, фæстæдæр та уæвгæдæр схъæд.

💥 Рекомы бæрæгбонмæ-иу хъæуы цæрджытæ кодтой къусбар. Æрæмбырд-иу кодтой кæмæн цы йæ бон уыд иумæйаг куывдмæ хойрагæй, уый. Фæлæ-иу къусбарæй фæстæмæ алы хæдзары дæр æппын къаддæр уыд сæрмагондæй цы нывонд фыркъа хастой ахæм кусарт.

🔴ЗОНИНАГ🔴: -Абон, ныры фæсивæды, уыимæ хистæр кары чи ис, уыдоны ꞌхсæн дæр арæх фенæн вæййы ахæм фæзынд, æмæ Рекомы бынмæ цæугæйæ, уд сыгъдæггæнæн къадзон-мадзон фæндаджы райдиан сæ къахдарæс раласынц. Зæгъгæ, дам, нæ фыдæлтæ дæр афтæ кодтой. Афтæмæй та дзы бирæты фыдæлтæ, Реком кæцы ран ис, уый зонгæ дæр нæ кодтой.
О, кæй зæгъын æй хъæуы, нæ рагфыдæлты рæстæг уыд ахæм фæзынд æмæ-иу айдагъ Рекомы бынмæ нæ, фæлдæ кæцыфæнды кувæндонмæ цæугæйæ дæр раластой сæ къахдарæс. Уый та уый тыххæй нæ, æмæ æгъдау афтæ домдта, фæлæ-иу сæ зæрдæ ꞌхсайдта сæ дзабыртæ цы сæракæй хуыд уыдысты, уымæ. Ома, мыййаг, нæфæччиаг фосы цармæй куы уой…

🎓Арæх фенæн вæййы уый дæр æмæ, зымæгон, фæсивæд дзуæртты бынмæ куы фæцæуынц. Уый, кæй зæгъын æй хъæуы хорз у. Фæлæ-иу хистæртæй куыд æрыхъуыстон, афтæмæй дзуары бынмæ зымæгон цæуыны бар нæ уыд. Зæгъгæ, дам, зымæг дзуæрттæ арвæй дæлæмæ æрцæуынц æмæ тæрхæттæ фæхæссынц. Нæ сын вæййы хъыгдарæн сæ сабырдзинад.
🔥Афтæ дæр ма-иу æрыхъуыстон, зæгъгæ, дам, зымæгон дзуæрттæ сæ ком бабæттынц, дзуарылæгтæ та – суадзынц.
Алы ирон бинонты дæр, æмæ йын йæ ном кадджыныл чи нымайы, уыдоны Рекомы хорзæх уæд!

ЦЪӔЙЙАГ
alamirkasaev

С 8 по 15 июня в Осетии отмечают праздник "Реком".

Празднование проходит в Цейском ущелье Северной Осетии на территории святилища "Реком".

О том, как, согласно традициям, приготовиться к празднику, что приносить с собой, как одеться - рассказывает Хæмыцаты Раман.