ІІ Міжнародная навукова-метадычная канферэнцыя "Забеспячэнне якасці адукацыі: стан, праблемы і перспектывы" прайшла ў Мінску

🔹 У яе рабоце прынялі ўдзел прадстаўнікі міністэрстваў адукацыі, арганізацый па забеспячэнні якасці адукацыі і адукацыйных устаноў Беларусі, Расіі, Азербайджана, Казахстана, Таджыкістана, Узбекістана. Да міжнароднага дыялогу падключыліся пляцоўкі з рэгіёнаў нашай краіны.

— Беларусь нездарма з’яўляецца ініцыятарам у абмеркаванні пытанняў якасці адукацыі, — адзначыў намеснік міністра адукацыі Аляксандр Кадлубай. — Мы прайшлі пэўную эвалюцыю за перыяд суверэннай Беларусі. У гэтай сістэме было адмаўленне ад ліцэнзавання: сёння на заканадаўчым узроўні гэты важны элемент кантролю якасці адукацыі вернуты. У нас ёсць дакладна выбудаваная сістэма, пачынаючы ад ацэнкі якасці атэстацыі школьнікаў, навучэнцаў у сістэме каледжаў, студэнтаў устаноў вышэйшай адукацыі і заканчваючы непасрэдна кантролем якасці ў цэлым устаноў адукацыі, вучэбных планаў, праграм — усяго таго, што рэгламентуецца нарматыўнай прававой дакументацыяй.

Падчас работы канферэнцыі былі разгледжаны сучасныя праблемы забеспячэння якасці адукацыі ў дзяржавах — удзельніцах СНД, выпрацаваны адзіныя падыходы да вызначэння крытэрыяў ацэнкі і кіравання якасцю адукацыі, а таксама падведзены папярэднія вынікі рэалізацыі Рэспубліканскага плана мерапрыемстваў па правядзенні ў 2024 годзе Года якасці ў сферы адукацыі.

📌 Саветнік Дэпартамента па супрацоўніцтве ў палітычнай, гуманітарнай і сацыяльнай сферах Выканаўчага камітэта СНД Галіна Казак акрэсліла асноўныя напрамкі развіцця агульнай адукацыйнай прасторы СНД. Пра ролю заканадаўчага забеспячэння ў павышэнні якасці адукацыі расказаў член Пастаяннай камісіі Палаты прадстаўнікоў Нацыянальнага сходу Рэспублікі Беларусь па адукацыі, культуры і навуцы Міхаіл Мірончык. Як наладжана навукова-метадычнае суправаджэнне даследаванняў якасці дашкольнай і агульнай сярэдняй адукацыі, прадставіла рэктар Акадэміі адукацыі Ірына Старавойтава.