Студатрадаўцы з Кобрына Брэсцкай вобласці працуюць на карысць любімага горада — дапамагаюць гарадской ЖКГ

🧩 Мы заспелі іх за фарбаваннем вулічнага плоту. За пэндзаль узяліся дзеці і падлеткі з розных устаноў адукацыі — сярэдняй школы № 7 Кобрына, Кобрынскага дзяржаўнага каледжа сферы абслугоўвання, Брэсцкага дзяржаўнага політэхнічнага каледжа — студатрад зборны. Некаторыя такой працай займаліся ўпершыню. Кажуць, праца не складаная, а галоўнае, ёсць матывацыя — добры заробак.

Ксенія Карнялюк з Кобрынскага дзяржаўнага каледжа сферы абслугоўвання прызналася, што фарбаваць плот ёй нават падабаецца, а пах фарбы зусім не перашкаджае. Да таго ж падчас працы ўсе студатрадаўцы добра пасябравалі.

Прадстаўнік Кобрынскай ЖКГ Віталь Хільковіч адзначыў, што за 10 дзён працы маладыя работнікі атрымліваюць 470 рублёў — гэта вельмі добры заробак. А сістэме гарадской гаспадаркі студатрады кожны год аказваюць значную дапамогу.

📌 У раённым аддзеле па адукацыі расказалі, што на канец ліпеня гэтага года ў студатрадах працаўладкаваны 502
чалавекі. Сярод пастаянных прымаючых арганізацый — Кобрынская ЖКГ, Кобрынскі доследны лясгас, аздараўленчы лагер “Хваля-Любань” Кобрынскага раёна.