Бүгүн улууска бэлиэ түгэн буолла. СӨ "Быыһыыр сулууспата" судаарыстыбаннай тэрилтэ уонна Ньурба улууһун икки ардыгар бииргэ үлэлиир туһунан сөбүлэһии илии баттанна. СӨ Быыһыыр сулууспата өрөспүүбүлүкэ 11 улууһугар көрдүүр-быыһыыр этэрээттэрдээх. Ньурбатааҕы көрдүүр-быыһыыр этэрээт өрөспүүбүлүкэ үрдүнэн бастыҥ үлэлээҕинэн биллэр. Этэрээт матырыйаалынай-техническэй базата хаҥыырыгар уонна үлэтин хайысхата, географията кэҥииригэр олук уурулунна. Водолазнай оборудование уонна анал көстүүмнэр ылыллыахтара, 4 штат көрүллүөҕэ, кинилэри үөрэтии тэриллиэҕэ. Мирнэйгэ тиийэ, Быыһыыр сулууспа салайааччыта Иннокентий Андросов эппитинэн, табылыннаҕына Ленскэйгэ тиийэ үлэлиэхтэрэ. СӨ Быыһыыр сулууспатын салайааччыта Иннокентий Михайловичка улахан махталбын тиэрдэбин уонна бу үлэбит өссө даҕаны салҕана-кэҥии турарыгар эрэнэбин.
Бүгүн сарсыардаттан СӨ Бырабыыталыстыбатын Бэрэссэдээтэлин солбуйааччыта Георгий Михайлович Степанов салайааччылаах оробуочай бөлөх толору састаабынан Антоновкаҕа үлэлээтэ. Тус боппуруостарынан приемҥа 6 киһи сырытта. Отчуоттуур мунньахха 102 киһи кытынна. Нэһилиэк олохтоохторуттан "Сунтаар-Ньурба" үрдүк күүрүүлээх уот линиятын, 150 миэстэлээх "Ромашка" оҕо уһуйаанын, 288 миэстэлээх начаалынай оскуола, квартальнай хочуолунай тутуутун, каадырынан хааччыйыы, эдэр исписэлиистэри олохсутан үлэлэтии, уот сыанатын, Бүлүү водохранилищетыгар экологическай мониторинг, тыа хаһаайыстыбатын, доруобуйа харыстабылын, федеральнай суолга сүөһү-сылгы массыынаҕа киирэн биэрэн өлүүтүн, кинилэр суолу туоруулларыгар анал бэлиэлэри туруоруу, босхо эминэн хааччыллыы, элбэх оҕолоох дьиэ кэргэттэргэ көмө-өйөбүл, оҕо сайыҥҥы лааҕырдарын үбүлээһини улаатыннарыы, өрөспүүбүлүкэҕэ олохтоох аһынан-үөлүнэн хааччыллыы туһунан уо.д.а. боппуруостар киирэн хоруйданнылар. Үөрэх эйгэтин эбийиэктэрин тутуу федеральнай бырагыраамаҕа тохтотуллан турар. Ол иһин 150 миэстэлээх "Ромашка" оҕо уһуйаанын улууска алмаастан киирэр үп суотугар саҕалыахпыт, быйыл бырайыага оҥоһуллуохтаах. 288 миэстэлээх начаалынай оскуола самалык дьиэтин бырайыагар куонкурус биллэриллибитэ. Маннык улахан таһымнаах Бырабыыталыстыба оробуочай бөлөҕө кэлэн, олохтоохтор ыйытыктарыгар толору хоруйдары ылан астыннылар. Октябрьскай нэһилиэк олохтоохторо өрөспүүбүлүкэ ситэриилээх былааһын ааспыт сыллааҕы үлэтин отчуотун биһирииллэрин биллэрдилэр. Бүгүн 16 ч. СӨ Бырабыыталыстыбатын отчуота Ньурба к. "Кыталык" КД-гар буолуоҕа. Ол иннинэ 15:30 ч. "Кыайыы Знамятын" көрсүһүү ыытыллыаҕа. Ньурба куорат олохтоохторун онно көхтөөхтүк кэлэн кыттаргытыгар ыҥырабын!
Бүгүн Ньурбаҕа улуустааҕы култуура департаменын иһинэн "Медиа-киин" аһылынна. СӨ Бырабыыталыстыбатын Бэрэссэдээтэлин солбуйааччыта Георгий Михайлович Степанов салайааччылаах улахан оробуочай бөлөх кыттыыта тэрээһин суолтатын үрдэттэ. "Медиа-киин" Ньурба улууһунааҕы кииннэммит бибилэтиэкэ дьиэтигэр олохсуйан үлэлиир. Саҥа тэрилтэҕэ инники үлэтигэр ситиһиилэри баҕарабын!