Бүгүн улуус муниципальнай тэриллиилэрин баһылыктарын Сэбиэтин сүбэ мунньаҕын салайан ыыттым. Мунньахха Ил Түмэн сис кэмитиэттэрин бэрэссэдээтэллэрэ Владимир Михайлович Прокопьев уонна Георгий Русланович Балакшин кытыннылар. Улуус Герой-ийэлэрин тустарынан кинигэни таһаарыы, Улуу Кыайыы үбүлүөйдээх 80 сылын тэрээһиннэрин, быйылгы нэһилиэктэр Кэлим спартакиадаларын балаһыанньатын, Ньурба куорат уонна нэһилиэктэр бу сыллааҕы бүддьүөттэрин хааччыллыытын уонна улуус ситэриилээх былааһын ааспыт сыллааҕы отчуотун түмүктэрин туһунан боппуруостары көрдүбүт.

Бүгүн улууспут олоҕор улахан суолталаах историческай түгэн буолла! Аан дойдуга алмаас хостооһунугар инники күөҥҥэ сылдьар «АЛРОСА» хампаанньа генеральнай дириэктэрэ Павел Маринычевы кытта Ньурба улууһун 2025-2027 сс. социальнай-экэнэмиичэскэй сайдыытыгар бииргэ үлэлээһин туһунан сөбүлэһиигэ илии баттаатыбыт. Павел Алексеевич бу докумуону түһэрсээри, сөмөлүөт кыайан көппөккө массыынанан Ньурбаҕа айаннаан кэллэ. Бу хампаанньа салалтата Ньурба оройуонугар, улуус олохтоохторугар улахан болҕомтотун уонна кыһамньытын көрдөрөр. Итинэн улууспут сайдыытыгар көмө бырагыраамата өссө 3 сылга уһатылынна. «АЛРОСА» бу сыалга 1 млрд. кэриҥэ солк. ыытыаҕа. Улууспут инники сайдыытыгар төһүү буолар дьоһун суолталаах сөбүлэһии салҕаммытын иһин Павел Алексеевич Маринычевка уонна СӨ Ил Дархана Айсен Сергеевич Николаевка улуус дьонун-сэргэтин аатыттан барҕа махталбытын тиэрдэбит!

«АЛРОСА» хампаанньа генеральнай дириэктэрэ Павел Маринычев көрсүһүүгэ тоҕоостоох түгэн көстүбүччэ, улуус олохтоохторун ыйытыыларыгар хоруйдаата. Улуус баһылыгын солбуйааччыта Наталия Петрова хампаанньа өттүттэн Ньурбаҕа үлэлиир регион таһымнаах диализнай Кииҥҥэ көмө, СӨ норуоттарын IX Спортивнай оонньууларыгар бэлэмнэнии чэрчитинэн Ньурбаҕа АЛРОСА Кубогун 2025 с. тустууга уонна 2026 с. оҕунан ытыыга ыытар наадатын туһунан туруоруста. Ньурбатааҕы техникум дириэктэрэ Андрей Федоров Ньурбатааҕы техникум выпускниктарын алмаастаах хампаанньаҕа үлэҕэ ылыы боппуруоһун көтөхтө. Итини таһынан Накыыҥҥа үлэлиир дьоммут «Саха» НКИХ биэриилэрэ көстөрө наадатын уонна сайын Накыыҥҥа ыһыах ыытарга туруорсууларын тиэртибит. Олохтоох ас-үөл бородууксуйатын атыылааһын, Ньурбаҕа Амакинка скверигэр эбии композиялары тутуу уо.д.а. боппуруостар эмиэ киирдилэр. Павел Маринычев киирбит боппуруостары барытын үөрэтиэх буолла, сорохторго тута быһаарыы ылыммытын иһитиннэрдэ. Ол курдук, Ньурбатааҕы техникум выпускниктарын үлэҕэ ылыы боппуруоһугар Ньурбаҕа хампаанньа персоналга сулууспатын ыытыаҕын, хампаанньаҕа наставничество тиһигин олохо киллэрбиттэрин уонна стажердары ылыы бырагыраамата баарын эттэ. «АЛРОСА» курдук улахан хампаанньа салайааччыта дьону кытта бу курдук утарыта көрсөн олорон кэпсэтэн барбыта олус үчүгэй. «АЛРОСА»-ны кытта 3 сылга сөбүлэһии түһэрсиибит улуус инники сайдыытыгар улахан төһүү буолар.

Дьокуускайтан "АПК Ресурснай хааччыйыы киинэ" ГКУ салайааччыта Илья Степанов, Тыа хаһаайыстыбатын министиэристибэтин Экэниэмикэ уонна стратегическай былааннааһын департаменын салайааччыта Инна Оконешникова, "АПК Ресурснай хааччыйыы киинэ" ГКУ кылаабынай экэнэмииһэ Майя Гуляева Ньурбаҕа кэлэн үлэлии сылдьаллар. Бу сылтан улуустарга тыа хаһаайыстыбатын боломуочуйалара бэриллиитинэн сибээстээн саҥа уларыйыылар, "Электроннай бүддьүөт" туһунан сэминээр ыыттылар. Нэһилиэктэр тыа хаһаайыстыбатын исписэлиистэрэ, тыа хаһаайыстыбатын тэрилтэлэрэ, улуустааҕы тыа хаһаайыстыбатын департаменын үлэһиттэрэ кыттыыны ыллылар. Сэминээр үөрэтэр хайысхалаах буолан, үлэһиттэргэ улахан туһалаах буолла.