Бүгүн сарсыарда Ньурбатааҕы оҕо балыыһатыгар «Биир ньыгыл Арассыыйа» аахсыйатын быһыытынан «Коробка храбрости» диэн оонньуурдардаах дьааһыгы илдьэн туттардым. Маны сэргэ В.А.Петрова аатынан Ньурбатааҕы Улуустар икки ардыларынааҕы ДИПИ профкома эмиэ туттарда. Балыыһаҕа эмтэниини ааһа сылдьар оҕолор кинилэргэ сөптөөх элбэх араас оонньуурдары, канцелярскай табаардары ылан улаханнык үөрдүлэр. Кинилэр этэҥҥэ үтүөрэллэригэр, чэгиэн-чэбдик буолалларыгар баҕаран алгыспын тиэртим. Маннык тэрээһин дойду үрдүнэн ыытыллыбыта балачча буолла, сылын аайы көхтөөхтүк кыттыһабыт. Атын тэрилтэлэр даҕаны оҕолорбут тустарыгар маннык аахсыйаҕа көхтөөхтүк кыттыһалларыгар, эмтэнэ сылдьар кырачааннарбытыгар санааларын көтөҕөн, аралдьытан күүс-көмө буолалларыгар ыҥырабын!

Бүгүн СВО-тан уоппускатыгар кэлэ сылдьар Ньурба куорат олохтооҕун Александры көрүстүбүт. Кини бу ый бүтэһигэр чааһыгар төннүөхтээх. Буойуммутугар дойдутугар сынньанан күүс-уох мунньунарыгар, барыта этэҥҥэ буолан кыайыы көтөллөөх эргиллэн кэлэригэр баҕарабын.

Бүгүн Өҥөлдьөҕө сырыттым. Үүккэ былааннара - 118 т, былааннарын аһарда 170 т тиэрдибиттэр. Ынах сүөһү ахсаана - 597, онтон ынаҕа - 232, сылгы - 517, ол иһигэр биэ - 302.
Олохтоохтор сылгыны чиптээһини, биир таһымнаах былаас, тыа хаһаайыстыбатын сокуонугар киириэхтээх уларыйыы туһунан ыйыттылар. Ынах төбөтүгэр 39 тыһ. солк. ылар дьон үүтү эмиэ туттарыахтаах диэн этиилээхтэр. Оҕуруот аһын олордор тэриллиилээх хаһаайыстыбалар үлэлииллэрэ наадатын бэлиэтээтим, улуус олохтоохторун, үөрэх тэрилтэлэрин уо.д.а. тэрилтэлэри хааччыйарга. Кэтэх ыаллар сүөһүлэрин эһэллэрин оннугар кэпэрэтиипкэ туттаран көрдөрөллөрө ордук буолуо этэ диэн нэһилиэнньэ эмиэ бэлиэтиир. Ынах сүөһү ахсаана манна биллэ аҕыйаабыт, онон ити туһунан толкуйдуохтарын наада. Сыллата Өҥөлдьө нэһилиэнньэтин ахсаана кыччыыр: көһөн барыы элбэх, оҕо төрөөһүнэ аҕыйах. Онон боппуруос уустук. Манна олохтоохтор улахан мунньах оҥорон сайдыы боппуруостарыгар, демографическай балаһыанньа тупсарын туһугар үлэлиэхтэрин наада.

Бүгүн Аҕа дойдуну көмүскээччилэр дьиэ кэргэттэрин Кэмитиэтин Саха сиринээҕи ыстаабын кытта бииргэ улуустааҕы дьахтар Сэбиэтэ улууска Ийэ ыйын чэрчитинэн Сүлэҕэ автопробегы тэрийэн ыыттылар. "Эрэллээх тыыл - Кыайыыга суол!" патриотическай аахсыйаҕа бу курдук куусталарынан элбэх киһи кыттыылаах киэҥ хабааннаах үгүс тэрээһиннэр буолаллар. Хаххаланар сиэккэлэри оҥорорго, обмундирование тигэргэ уо.д.а. үөрэтэр маастар-кылаастары, субуотунньуктары, быыстапкалары тэрийэн ыыталлар. Бүгүн Сүлэҕэ автопробег түмүгүнэн СВО фондатыгар уопсайа 49 160 солк. харчыны киллэрдилэр. Алаһа дьиэ арчыһыттара, уопсастыбаннай үлэҕэ саамай көхтөөх дьоммут кимиэхэ баҕарар үтүөкэн холобуру көрдөрөллөр. Кыайыыны чугаһатарга бэйэлэрин кылааттарын киллэрэллэр. Куусталарынан маннык патриотическай автопробег тэриллибитин кэннэ, нэһилиэктэр СВО-ҕа көмөлөрө кэҥээн-улаатан иһэрэ бэлиэтэнэр. Онон кинилэргэ махталбын тиэрдэбин!

Бүгүн Октябрьскай нэһилиэк олохтоохторун кытта көрүстүбүт. Элбэх ыйытыы киирдэ, киэҥ кэпсэтии таҕыста. Ветучаастак сэбиэдиссэйэ Николай Васильевич буойуна сыаҕа биир күдьүс үлэлээбэтин, онон эт туттарыытыгар кэккэ мэһэйдэр тахсалларын этиннэ. Октябрьскай нэһилиэккэ эдэр ыччат эмиэ тыа хаһаайыстыбатынан дьарыктанара үөрдэр. Ол курдук Артур Лотов, Игорь Иванов сүөһүлээхтэр. Олохтоохтор "Ньурба-Агро МТС" иккис тыынын ылан сайдан эрэриттэн үөрэллэр, улуус көмөтө итиннэ элбэҕин бэлиэтииллэр, өссө да ити тэрилтэ кэҥииригэр, сүөһүтүн ахсаана элбииригэр улуус дьаһалтата өйүө диэн эрэнэллэр. Олохтоох дьаһалта от тиэйэр стоговозтаах тыраахтыр дэриэбинэ иһигэр үлэлиирин хааччыйыан наадатын эттим.