👆🏻5 юрӑ сыпӑкӗ👆🏻
(ҫӳлерех ҫырнӑ поста вуламалла)

Мӗн кӗтет унта?

Кӑварлӑ вут чунра ҫунса
ӑшна пӗр канлӗх те ямасть.
Тӑварлӑ куҫҫулӳ юхса
ҫӗрле те ҫывӑрма памасть.

Эс ирсерен те, каҫсерен
пӗрмай шутлатӑн кунсерен.
Пӑхатӑн та чӳречерен
ҫанталӑкпа пӗрле йӗрен.

Малашлӑх - мӗн кӗтет унта?
Тен лайӑххи, тен начарри?
Пурнатпӑр паянхи кунпа,
шанса кӗтетпӗр ҫеҫ ырри.

13.01.25 00:00
К.Д.

Утас пулсан суйламалла.

Сана сукмак никам кӑтартмӗ,
суйлас пулать халь хӑвӑнах.
Шывра путсан никам хӑтармӗ,
сывлас тесессӗн тухмаллах.

Йӗри-тавра ҫынни чылай та,
ҫав вӑхӑтрах эсӗ пӗччен.
Умра сукмакӗсем нумай та,
анчах утма эс шикленен.

Пӗр вырӑнта ҫапла тӑратӑн,
ни малалла, ни каялла.
Ҫав вӑхӑтрах эс ӑнланатӑн,
утас пулсан суйламалла.

13.01.25. 00:40
К.Д.

Чи ҫывӑх вырӑн.

Куҫа хупатӑп, ҫывӑратӑп,
ыйха путсассӑн - тӗлӗкре,
тӳрех яла вӗҫсе каятӑп -
чи ҫывӑх вырӑн тӗнчере.

Алла ҫунат пекех суллатӑп,
вӗҫетӗп ялӑн тӳпинче.
Телейлӗ вӑхӑта куратӑп,
ачалӑх куҫӑм умӗнче.

Вун пилӗк ҫул ӗнтӗ ак ҫитрӗ,
ялтан хуланалла куҫни.
Ак ҫывӑрма та вӑхӑт ҫитрӗ,
кӗтет мана яла вӗҫни.

13.01.25. 01:25
К.Д.

Чӑваш Енӗн тӗп хулинче - Шупашкарта СУРХУРИ йӑла-йӗркине туса ирттерчӗҫ. Тӗплӗнрех 1 сехет пыракан сюжетра курма пулать. 2025 ҫ. Курмалли мелсем:

Ютуб - https://youtu.be/gtQc7pVUsGE?si=kUFSOHfEvm8xmMER

Рутуб - https://rutube.ru/video/4d7c750fb8b8d4997df462a33ba176b0/

Вконтакте - https://vk.com/video-175721657_456239088

Сӑмах ҫӑрса.

Сӑмах ҫӑрса сӑвва ҫыратӑп,
кама-ши кирлӗ - никама.
Чун ыйтнипе кӑна тӑватӑп,
тек тӑрса юлтӑр асӑмра.

Хӗвел кулсассӑн эп те кулӑп,
унпа тултарӑп чунӑма.
Мана курсассӑн эп те курӑп,
пӗлтерӗп хамӑн туйӑма.

14.01.25. 01:49
К.Д.

Пӗр тискер.

Ӗлӗкрех Шупашкар вырӑссен пулнӑ тет,
пӗтӗмпех пулнӑ тет вырӑсла.
Чӑвашсем ялсенчен хулана килсенех
маннӑ тет чӑвашла калаҫма.

Паянхи Шупашкар чӑвашпа тулнӑскер,
кӗр кӗрлер-и тӑван хамӑрла?
Кӗр кӗрлетпӗр те-ха, анчах пур пӗр тискер
- ачасем калаҫмаҫ чӑвашла...

15.01.25. 01:55
К.Д.

Кӑрлач уйӑхӗн 30-мӗшӗ. 2025 ҫ.
+1 градус ӑшӑ.
Чӑваш Ен, Елчӗк тӑрӑхӗнчи Патреккел ялӗ.