❗️ Чӑвашла вӗренес текенсене кӑҫал "Хавал" 14-мӗш хутчен пуҫтарчӗ.

Паян ҫуллахи "Хавал" университетӑн 1-мӗш кунӗ иртрӗ. Асӑрхарӑр-и, кӑҫалтан "Хавал" лагерь мар – университет. Кунта ҫичӗ факультет ӗҫлет. Вӗсене Эдуард Фомин, Александр (Алпарух) Блинов, Александр (Айтар) Степанов, Владимир Хрущев, Элтияр Александров, Ксюша (Чувишенка) Кошелева, Николай (Аҫтахар) Плотников ертсе пыраҫҫӗ.

✔️"Хавал" университета тӗрлӗ ӳсӗмри ҫынсем хутшӑнаҫҫӗ: чи кӗҫӗнни – Григорьевсен кӑкӑр ачи – Хӗвел, чи асли – 67 ҫулти Селиме Кошелева. Пурӗ – 90 яхӑн хутшӑнакан, ертӳҫӗсемпе тата вӗрентекенсемпе пӗрле – 120 ҫынна яхӑн.

"Ҫын шучӗ, ытти ҫулсемпе танлаштарсан, хальхинче тата ытларах", – теҫҫӗ йӗркелӳҫӗсем.

Видео авторӗ: Константин Доброхотов
Сӑмах май, Костя та хӑйӗн ывӑлӗсене "Хавала" илсе килнӗ.

❗️ Паян ҫуллахи "Хавал" университетра вӗренекенсем патне тӗнчипе паллӑ чӑваш ӳнерҫи Праски Витти хӑнана килчӗ.

Виталий Петрович хӑйӗн пурнӑҫӗн тӗрлӗ тапхӑрӗпе, ӗҫӗ-хӗлӗпе паллаштарчӗ.

🎨"Эпӗ пултаруллӑ ҫын пулса ҫуралман. Эпӗ 11 ҫул вӗреннӗ, ӳнер ӗҫӗпе 50 ҫул ытла ӗҫлетӗп".

🎨"Мана ҫак тӗнчене ҫуратма эпӗ заявлени ҫырман. Пирӗшти мана питӗ телейлӗ пурнӑҫ парнелерӗ".

🎨"Мана халь ура ҫинче тӑма йывӑр, вырӑн ҫинче выртсан пӗтӗм шӑм-шак ыратать, алла кисточкӑна тытсан вара сывӑ ҫын пекех пулса кайса иртен пуҫласа каҫччен ӳкерме пултаратӑп".

🤔Пӗлме:
Праски Витти (Виталий Петрович Петров) 1936-мӗш ҫулхи авӑн уйӑхӗн 17-мӗшӗнче ҫуралнӑ. Вӑл РСФСР тава тивӗҫлӗ ӳнерҫи, Чӑваш Ен халӑх ӳнерҫи тата йышлӑ наградӑсемпе премисене тивӗҫлӗ пултаруллӑ чӑваш халӑх ҫынни. Тӗнчери тӗрлӗ ҫӗршывсенче хӑйӗн ӗҫӗсен куравне йӗркелекенскере ют халӑх ҫыннисем те хисеплеҫҫӗ.

🎥Видео авторӗ: Константин Доброхотов