Вилоятда парранда гўшти етиштиришни кенгайтириш мақсадида 1,5 миллион бош парранда боқиш қувватига эга 20 та корхона ишга туширилиши белгиланди.

Улуғнор ва Бўстонда 2 та йирик сутни қайта ишлаш корхонаси ташкил қилинади. Уй ва чорва хўжаликларида наслни яхшилаш бўйича янги тизим яратиш муҳимлиги таъкидланди.

Озиқ-овқат саноатига хорижий бренд корхоналарини жалб қилиб, 342 та лойиҳага 220 миллион доллар ажратилиши айтилди.

Андижон, Улуғнор ва Жалақудуқда мева-сабзавотни қайта ишлаш қувватларини кўпайтириш, Андижон туманида йирик агрологистика марказини қуриш юзасидан ҳам мутасаддиларга кўрсатмалар берилди.

Facebook|Instagram|X

Давлатимиз раҳбари Марҳаматдаги пиллачилик кластери Андижоннинг барча туманлари ва республиканинг бошқа вилоятларига намуна бўлганини қайд этди.

Кластер 30 гектарда юқори ҳосилли тут экиб, кўчат ва хизмат кўрсатишдан йилига 25 миллион доллар экспорт қилмоқда, япон технологияси асосида 37 миллион долларлик ипакчилик комплексини барпо қилмоқда.

Ушбу тажрибани ёйиш, барча туманларда камида 3 гектардан ҳосилдор тут экиш лозимлиги қайд этилди.

Facebook|Instagram|X

Йиғилишда Андижон вилоятида ижтимоий соҳани ривожлантиришга эътибор қаратилди.

Ёшларнинг таълимдан кейинги бандлигини таъминлаш ва меҳнат бозорига тайёрлаш масаласи Андижонда ҳам долзарб экани қайд этилди.

Янги тизимга кўра, 10-11 синф ўқувчиларига аниқ, табиий ва чет тили фанидан бирини чуқур ўрганиш ёки ишчи ва IT касбларга ўқиш имкони яратилади.

Мутасаддиларга 16 та туман ва шаҳарда биттадан мактабни танлаб, бу тизимни жорий қилиш топширилди.

Facebook|Instagram|X

Балиқчидаги Кўл маҳалласида мактаб йўқлиги учун 752 нафар бола бошқа 4 та маҳалладаги мактабга қатнашга тўғри келаётгани танқид қилинди. Ваҳоланки, ушбу маҳаллада жойлашган 600 ўринли педагогика коллежида 370 нафар бола ўқийди.

Агар коллежнинг бўш биносида мактаб ташкил қилинса, янги бино қуришга эҳтиёж бўлмайди, 4 та маҳалладаги мактаб ҳам бир сменага ўтади.

Мутасаддиларга бу борада тегишли кўрсатмалар берилди.

Facebook|Instagram|X

Асака агротехнология техникуми билан Андижон қишлоқ хўжалиги институти ўртасида “2+2” дастури жорий қилиниши белгиланди.

Яъни, техникумда икки йил давомида етарли “кредит” тўплаган ўқувчилар олийгоҳнинг иккинчи ёки учинчи курсида ўқиш имконига эга бўлади. Техникумни тугатиб, икки ёки уч йил ишлаган, тажрибаси бор ўқувчиларга имтиҳон асосида, бакалаврга тенг малака даражаси берилади.

Миллий рейтингда охирги ўринда турган Андижон иқтисодиёт ва қурилиш институтида бошқарув ва ўқитиш методикаларини тўлиқ янгилаш зарурлиги кўрсатиб ўтилди.

Андижон шаҳар касб-ҳунар мактабида йўлга қўйилган тажрибани бошқа профтаълим муассасаларида ҳам жорий қилиш топширилди.

Facebook|Instagram|X

Андижонга ҳар йили 10 минг хорижий сайёҳ арзон ва сифатли тиббий ёрдам олиш учун келади. Шу муносабат билан кардио-, эндо- ва микрохирургия йўналишида тиббий хизмат экспортини 2 баробар ошириш мумкинлиги таъкидланди.

Мутасаддиларга йил якунигача 126 турдаги тиббий ускуна билан жиҳозлашга 7 миллион доллар жалб қилиш топширилди.

Вилоятда даволаш ва диагностика хизматлари оқилона жойлашмагани кўрсатиб ўтилди. Биргина Андижон шаҳрида 1,5 километр радиусда 8 та шифохона жойлашган.

Уларни кластер усулида бирлаштириб, аҳолига янада қулай ва сифатли тиббий хизматни йўлга қўйиш муҳимлиги қайд этилиб, Тиббиёт институти клиникаси негизида кўп тармоқли тиббиёт маркази ташкил қилиш масаласини ўрганиш топширилди.

Facebook|Instagram|X

Айрим тиббиёт муассасаларида шифокорларнинг иш вақти нотўғри ташкил қилингани сабаб беморлар узоқ вақт навбат кутишга, врач қабулига кириш учун 2-3 марта келишга мажбур бўлмоқда.

Соғлиқни сақлаш вазирлигига Асака туманида шифокор ва ҳамширалар ишини тўғри ташкил этиш намунасини яратиш ва барча туманларда жорий қилиш топширилди.

Шунингдек, беморларга кўрсатилган хизматни муассасани ўзида, телефон ёки онлайн сўровнома ўтказиш орқали баҳолаш тизимини ташкиллаштириш вазифаси қўйилди.

Facebook|Instagram|X

Буюк ватандошимиз, давлат арбоби ва саркарда, аллома ва шоир, Андижон фарзанди Заҳириддин Муҳаммад Бобур таваллудининг 541 йиллиги нафақат юртимиз, балки дунёнинг кўплаб мамлакатларида кенг нишонланмоқда.

Давлатимиз раҳбари фурсатдан фойдаланиб, бутун халқимизни шу кун – адабиёт ва илм-маърифат байрами билан чин дилдан табриклади.

Бобур ва унинг аждодлари хотирасига муносиб ҳурмат-эҳтиром кўрсатиш мақсадида Андижон шаҳрида Бобур номидаги маданият ва истироҳат боғи ҳудудида жуда кенг кўламли қурилиш ишлари режалаштирилгани маълум қилинди.

Бўлажак мажмуа ҳар жиҳатдан муҳташам, бетакрор мазмун ва шаклга эга бўлиши, Бобур ва бобурийлар сулоласининг оламшумул шон-шуҳратига тўла муносиб бўлиши кераклиги таъкидланди.

Facebook|Instagram|X

Президентимиз ўзбек қўшиқчилик санъати ривожида ўчмас из қолдирган Ўзбекистон ва Тожикистон халқ артисти, Алишер Навоий мукофоти совриндори, машҳур ҳофиз Шерали Жўраев номини барчамиз алоҳида ҳурмат билан эсга олишимизни таъкидлади.

Давлатимиз раҳбари Андижон шаҳридаги санъат мактабига Шерали Жўраев номини бериш таклифини илгари сурди.

Бу мактаб Мусиқа ва санъат коллежига айлантирилиб, грант асосида замонавий кадрлар тайёрлаш йўлга қўйилади. Янги ўқув ва турар жой биноси, зарур инфратузилма объектлари барпо этилади, шунингдек, Шерали Жўраев бюсти ўрнатилади.

Йиғилишда вилоят ҳокими, комплекс ва тармоқлар раҳбарларининг ҳисоботлари тингланди.

Facebook|Instagram|X

Бироздан сўнг Президент Шавкат Мирзиёев раислигида ижтимоий ҳимоя соҳасидаги хизматлар қамровини янада кенгайтириш бўйича устувор вазифалар юзасидан видеоселектор йиғилиши бошланади.
—
Скоро под председательством Президента Шавката Мирзиёева начнется видеоселекторное совещание по приоритетным задачам дальнейшего расширения охвата услугами в сфере социальной защиты.

Facebook|Instagram|X

Президент Шавкат Мирзиёев раислигида ижтимоий ҳимоя соҳасидаги устувор вазифалар юзасидан видеоселектор йиғилиши бошланди.

Маълумки, ўтган йил июнь ойида Ижтимоий ҳимоя миллий агентлиги ташкил этилган эди.

Ўтган даврда 10 дан ортиқ давлатнинг тажрибаси чуқур ўрганилди, ижтимоий хизмат бўйича мутахассис-экспертлар билан ҳамкорликда соҳанинг аҳволи ўрганилди.

Таҳлил ва ўрганишлар кўрсатганидек, одамлар ташвишини ичига кирмаган, ўзидан ўтказмаган эски тизим тубдан ўзгариши керак ва бу мураккаб, комплекс жараён.

Facebook|Instagram|X

Давлатимиз раҳбари соҳадаги баъзи камчиликларни санар экан, 20 дан зиёд идоранинг ижтимоий ҳимоя борасидаги фаолияти ҳужжатларда пухта ўйланмасдан, бетартиб белгиланганини кўрсатиб ўтди.

Ҳудуд раҳбарлари ҳам муҳтож оилалар билан манзилли ишламай, пул ва озиқ-овқат бериш, маиший техника совға қилиш билан чекланиб келгани қайд этилди.

Эски ижтимоий ҳимоя тизимида одамларга умид бериш, ҳаётини яхшилаши, банд бўлишига кўмаклашиш энг охирги ўринга тушиб қолган.

Facebook|Instagram|X

Ногиронлиги бўлган шахсларни тиббий ва ижтимоий реабилитация қилиш, касбга ўргатиш орқали тўлақонли ҳаётга қайтаришга эътибор сустлашиб кетгани танқид қилинди.

Ногиронлиги бор шахслар ишлаши мумкин бўлган касблар рўйхати замон талабларидан келиб чиқиб қайта кўриб чиқилмагани сабабли улар ўзининг меҳнат салоҳиятини тўлиқ рўёбга чиқара олмаяпти.

Оғир ижтимоий аҳволдаги одамларни ҳаётга илҳомлантирадиган, рағбат уйғотадиган таъсирчан контент, шеър, қўшиқ, фильм ва бошқа бадиий асарлар яратилмаяпти.

Facebook|Instagram|X

Президент бу соҳада умумий ёндашув ўзини оқламагани, ҳар бир оила ва инсон тақдирига алоҳида профессионал ёндашиш лозимлигини қайд этиб, устувор йўналишларни белгилаб берди.

Буни маҳалла даражасида манзилли, шаффоф ва адолатли ташкил этиш зарурлиги таъкидланди.

Масалан, кам таъминланган оилаларни аниқлаш мезонларини ишлаб чиқиш, тизимни шаффоф қилиш ҳисобига доимий даромадга эга оилалар эҳтиёжманд тоифасидан чиқарилди.

Facebook|Instagram|X

Рақамлаштириш ҳисобига, ўрнидан тура олмайдиган, ўзгалар парваришига муҳтож ёлғиз 2 минг кишига ёрдам кўрсатиш йўлга қўйилди.

Масалан, Навоий шаҳрида яшайдиган ногиронлиги бор ёлғиз аёлни 12 ёшли фарзанди мактабга чиқмасдан парваришлаб келаётган эди.

Унга ижтимоий кўмакчи бириктирилиб, уйида хизмат кўрсатиш йўлга қўйилгани сабаб, фарзанди мактабга чиқиб, оиланинг ижтимоий аҳволи яхшиланмоқда.

Ижтимоий ҳимоя тизими билан 250 та хизмат қамраб олинган бўлса-да, маҳалладаги аҳоли уларнинг ярмидан ҳам бехабар. Масалан, ногиронлиги бор фарзандини парваришлаш нафақасини олиши мумкин бўлган 33 минг ота-она ушбу имтиёздан фойдаланмаяпти.

Facebook|Instagram|X

Ижтимоий ҳимояга муҳтож аҳолини ҳар томонлама қўллаб-қувватлаш, хизматлар кўрсатиш жараёнларини соддалаштириш ва тезлаштириш мақсадида:

- эҳтиёжманд тоифани белгилаш бўйича мезонлар ишлаб чиқилади ва айнан қандай ёрдамга муҳтожлик борлиги аниқ белгилаб берилади;

- ҳар бир муҳтож фуқаро бўйича индивидуал ижтимоий хизматлар дастури бўлади.

Маҳалладаги “еттилик” учун ижтимоий хизматлар бўйича ягона саволнома жорий қилинади.

Маҳалладаги барча ижтимоий хизматларни босқичма-босқич ижтимоий хизмат кўрсатиш шартномаси орқали тақдим этиш йўлга қўйилади.

Facebook|Instagram|X

Давлатимиз раҳбари ҳокимлар ва сектор раҳбарлари маҳаллада ўтказаётган қабуллар ҳам ўзгариши кераклиги, қабулларда маҳалла “еттилиги” кўтарган энг оғир масалаларнинг ечими бўлиши лозимлигини таъкидлади.

Ижтимоий ҳимоя миллий агентлигига вилоят ҳокимлари билан бирга барча маҳаллаларда ижтимоий ходимлар фаолиятини ташкил қилиш топширилди.

Протез воситаларини бериш, нафақа ва қаровсиз қолган болаларга васийликни расмийлаштириш, ўзгалар парваришига муҳтож кексаларни ёлғиз деб эътироф этиш каби 49 та ижтимоий хизмат маҳаллагача туширилиши белгиланди.

Маҳаллада ижтимоий хизматлар кўрсатиш электрон платформаси ишлаб чиқилади.

Facebook|Instagram|X

Йиғилишда “Мурувват” уйлари ва Ижтимоий қўллаб-қувватлаш марказларида ижтимоий хизматларни мобил ва кундузги қатнов шаклида кўрсатишни йўлга қўйиш топширилди.

Келгуси йилдан 40 та туманда реабилитация, соғломлаштириш ва ногиронлиги бор шахсларга қарайдиганларни ўқитиш бўйича кўп тармоқли ижтимоий хизматлар марказлари ишга туширилади.

Бу орқали, яна 60 минг эҳтиёжманд аҳоли ижтимоий хизматлар билан қамраб олинади, уларга қараётган 3 минг киши ўқитилади.

Ҳозирда нафақа олаётган, лекин меҳнат қилиб, даромад олиш истагида бўлган 660 минг аҳоли учун зарур шароитлар яратилиши уларнинг ижтимоий ва моддий фаровонлиги яхшиланишига хизмат қилади.

Facebook|Instagram|X

1 октябрдан аҳолига кўрсатиладиган барча ижтимоий ёрдамларни “ижтимоий карта” орқали молиялаштиришни жорий этилади.

Бунда, энг аввало, “Саховат ва кўмак”, “Аёллар”, “Ёшлар” дафтарлари жамғармалари, кейинчалик босқичма-босқич 74 турдаги ижтимоий нафақа ва ёрдамлар ўтказилади.

Ушбу карта орқали транспорт ва коммунал соҳалардаги имтиёзлардан ҳам фойдаланиш мумкин бўлади.

Facebook|Instagram|X

Йиғилишда ногиронлиги бўлган шахсларни қўллаб-қувватлаш масалалари муҳокама қилинди.

Ўзбекистон 2021 йилда Ногиронлиги бўлган шахслар ҳуқуқлари тўғрисидаги конвенцияга қўшилгани тарихий воқеа бўлди ва ундаги мажбуриятларни бажариш бўйича тизимли ишлар амалга оширилмоқда.

Шу билан бирга, вилоят ва туман ҳокимлари ушбу шахсларга ёрдам бериш, уларнинг уюшмалари ва ташкилотлари билан мулоқот қилиш, шароит яратиш билан етарлича шуғулланамаётгани кўрсатиб ўтилди.

Айрим вазирлик, идоралар ва вилоят ҳокимликларда ногиронлиги бўлган бирорта одам ишга олинмагани танқид қилинди.

Facebook|Instagram|X